ଦକ୍ଷିଣ ଲେବାନନରେ ଇସ୍ରାଏଲ ଏବଂ ହିଜବୁଲ୍ଲା ମଧ୍ୟରେ ଚାଲିଥିବା ଉତ୍ତେଜନା ମଧ୍ୟରେ ଏକ ବଡ଼ ଆକ୍ରମଣ ଘଟଣା ସାମ୍ନାକୁ ଆସିଛି । ଏକ ରେସ୍କ୍ୟୁ ଅପରେସନ୍‌ ସମୟରେ ହିଜବୁଲ୍ଲା ଇସ୍ରାଏଲୀ ସେନାଙ୍କୁ ଲକ୍ଷ୍ୟ କରି ଡ୍ରୋନ୍‌ ମାଧ୍ୟମରେ ଆକ୍ରମଣ କରିଥିଲା । ଯେଉଁଥିରେ ଜଣେ ସୈନିକଙ୍କ ମୃତ୍ୟୁ ହୋଇଥିଲା ଏବଂ ଅନେକ ଆହତ ହୋଇଥିଲେ ।

ରିପୋର୍ଟ ଅନୁଯାୟୀ, ଏହି ଘଟଣା ଲେବନନର ତୈୟବେହ ଅଞ୍ଚଳରେ ଘଟିଥିଲା, ଯେଉଁଠାରେ ଇସ୍ରାଏଲୀ ସେନାର ୭୭ତମ ବଟାଲିଅନର ଗୋଟିଏ ଟ୍ୟାଙ୍କ ଟେକ୍ନିକାଲ ତ୍ରୁଟି କାରଣରେ ଫସି ରହିଥିଲା । ସୈନିକମାନେ ଟ୍ୟାଙ୍କଟିକୁ ମରାମତି କରୁଥିବା ବେଳେ ହିଜବୁଲ୍ଲା ବିସ୍ଫୋରକ ଭର୍ତ୍ତି ଡ୍ରୋନ ଦ୍ୱାରା ଆକ୍ରମଣ କରିଥିଲା । ଡ୍ରୋନଟି ସୈନିକଙ୍କ ପାଖରେ ବିସ୍ଫୋରଣ ହୋଇଥିଲା, ଯାହାର ଫଳରେ ସେଠାରେ ଥିବା ସୈନିକମାନେ ଗୁରୁତର ଆହତ ହୋଇଥିଲେ ।

ଆକ୍ରମଣ ପରେ ଆହତମାନଙ୍କୁ ଉଦ୍ଧାର କରିବା ପାଇଁ ଇସ୍ରାଏଲୀ ବାୟୁସେନାର ହେଲିକପ୍ଟର ପଠାଯାଇଥିଲା । କିନ୍ତୁ ରେସ୍କ୍ୟୁ ଅପରେସନ ସମୟରେ ମଧ୍ୟ ହିଜବୁଲ୍ଲା ଆକ୍ରମଣ ଜାରି ରଖିଥିଲା । ଖବର ଅନୁସାରେ, ଆଉ ଦୁଇଟି ଡ୍ରୋନ ଛଡ଼ାଯାଇଥିଲା, ଯାହାର ମଧ୍ୟରୁ ଗୋଟିଏକୁ ଇସ୍ରାଏଲୀ ସେନା ଆକାଶରେ ଧ୍ୱଂସ କରିଦେଇଥିଲେ, କିନ୍ତୁ ଅନ୍ୟଟି ହେଲିକପ୍ଟର ଓ ସେନାଙ୍କ ନିକଟରେ ବିସ୍ଫୋରଣ ହୋଇଥିଲା । ତେବେ ଏହି ଦ୍ୱିତୀୟ ବିସ୍ଫୋରଣ ବିଶେଷ କ୍ଷତି କରିନଥିଲା ।

ଅଧିକ ପଢ଼ନ୍ତୁ: ଗୁଳିମାଡ଼ ପରେ ଚର୍ଚ୍ଚାରେ 'ହିଲଟନ୍ ହୋଟେଲ୍'; ଯେଉଁଠି ନିଶ୍ଚିତ ମୃତ୍ୟୁରୁ ବର୍ତ୍ତିଛନ୍ତି ୨ ରାଷ୍ଟ୍ରପତି

ଇସ୍ରାଏଲୀ ସେନା (IDF) ଅନୁଯାୟୀ, ଆକ୍ରମଣରେ ଜଣେ ସୈନିକଙ୍କ ମୃତ୍ୟୁ ହୋଇଥିଲା, ଯେତେବେଳେ ଜଣେ ଅଧିକାରୀ ଏବଂ ତିନି ଜଣ ସୈନିକ ଗୁରୁତର ଆହତ ହୋଇଥିଲେ । ଅନ୍ୟ ଦୁଇ ସୈନିକ ସାମାନ୍ୟ ଆହତ ହୋଇଥିଲେ । ହିଜବୁଲ୍ଲା ଏହି ଆକ୍ରମଣ ପାଇଁ ଦାୟୀ ବୋଲି ଦାବି କରି କହିଛି ଯେ ଏହା ଇସ୍ରାଏଲୀ ଯୁଦ୍ଧବିରତି ଉଲ୍ଲଂଘନର ଜବାବରେ କରାଯାଇଥିଲା ।

ରିପୋର୍ଟ କରାଯାଇଛି ଯେ କିଛି ଡ୍ରୋନ ଫାଇବର-ଅପ୍ଟିକ୍ କେବୁଲ୍ ମାଧ୍ୟମରେ ନିୟନ୍ତ୍ରିତ ହୋଇଥାଏ, ଯାହା ଫଳରେ ଇଲେକ୍ଟ୍ରୋନିକ୍ ଜାମିଂ ମାଧ୍ୟମରେ ସେମାନଙ୍କୁ ଅଟକାଇବା କଷ୍ଟକର ହୋଇପଡୁଛି । ଏହି କାରଣରୁ ଏପରି ଆକ୍ରମଣ ଅଧିକ ସଠିକ୍ ଏବଂ ବିପଜ୍ଜନକ ପ୍ରମାଣିତ ହେଉଛି। ଏହି ଘଟଣା ଏପରି ସମୟରେ ଘଟିଛି ଯେତେବେଳେ ଉଭୟ ପକ୍ଷ ମଧ୍ୟରେ ଯୁଦ୍ଧବିରତି ସମ୍ପ୍ରତି ବୃଦ୍ଧି କରାଯାଇଥିଲା, ତଥାପି ସୀମା ସଂଘର୍ଷ ଜାରି ରହିଛି ।