Nithya Raman Wins / ଆମେରିକା ନିର୍ବାଚନ; ମୂଳ ଭାରତୀୟ ନିତ୍ୟା ରମଣଙ୍କୁ ନେଇ ଚର୍ଚ୍ଚା

ୱାଶିଂଟନ୍: ଆମେରିକାରେ ପୁଣି ଜଣେ ଭାରତୀୟ ବଂଶୋଦ୍ଭବ ମହିଳାଙ୍କ ବଡ଼ ସଫଳତା । ଲସ୍ ଆଞ୍ଜେଲସ୍‌ର ମେୟର ନିର୍ବାଚନରେ ବିଜୟୀ ହୋଇଛନ୍ତି ଭାରତର କେରଳରେ ଜନ୍ମିତ ମହିଳା ନିତ୍ୟା ରମଣ । ସେ ବର୍ତ୍ତମାନର ମେୟର କରେନ୍ ବାସ୍‌ଙ୍କୁ ପରାସ୍ତ କରିଛନ୍ତି । ଏହି ବିଜୟ ଆମେରିକାର ଦ୍ୱିତୀୟ ବୃହତ୍ତମ ସହରର ରାଜନୀତିରେ ଏକ ବଡ଼ ପରିବର୍ତ୍ତନ ଆଣିବ ବୋଲି ଆକଳନ କରାଯାଉଛି ।

୪୫ ବର୍ଷୀୟ ନିତ୍ୟା ରମଣ ଲସ୍ ଆଞ୍ଜେଲସ୍ ସିଟି କାଉନସିଲ୍‌ର ଜଣେ ସଦସ୍ୟ ଥିଲେ । ଡେମୋକ୍ରାଟିକ୍ ସୋସିଆଲିଷ୍ଟସ୍ ଅଫ୍ ଆମେରିକାର ସମର୍ଥନରେ ତାଙ୍କର ଏହି ନିର୍ବାଚନୀ ଲଢ଼େଇ ଆରମ୍ଭ ହୋଇଥିଲା । ଆମେରିକାରେ ଡେମୋକ୍ରାଟିକ୍ ପାର୍ଟି ମଧ୍ୟରେ ଚାଲିଥିବା ଆଭ୍ୟନ୍ତରୀଣ ମତଭେଦ ମଧ୍ୟରେ ତାଙ୍କର ବିଜୟକୁ ଏକ ଗୁରୁତ୍ୱପୂର୍ଣ୍ଣ ରାଜନୈତିକ ସଙ୍କେତ ଭାବେ ଦେଖାଯାଉଛି ।

• ବର୍ତ୍ତମାନ ମେୟରଙ୍କ ହାରିବାର ମୁଖ୍ୟ କାରଣ

ନିତ୍ୟା ପ୍ରଥମେ କରେନ୍ ବାସ୍‌ଙ୍କୁ ସମର୍ଥନ କରିଥିଲେ । କିନ୍ତୁ ପରେ ନିଜର ନିଷ୍ପତ୍ତି ବଦଳାଇ ମେୟର ପଦ ପାଇଁ ନିଜେ ପ୍ରାର୍ଥୀ ହୋଇଥିଲେ । ସହରର ସ୍ଥିତି ଏକ “ବ୍ରେକିଂ ପଏଣ୍ଟ”ରେ ପହଞ୍ଚିଛି ବୋଲି କହି ସେ ନିର୍ବାଚନ ମୈଦାନକୁ ଓହ୍ଲାଇଥିଲେ । କରେନ୍ ବାସ୍‌ଙ୍କ ପ୍ରଥମ କାର୍ଯ୍ୟକାଳ ସମୟରେ ଘଟିଥିବା ପାଲିସେଡ୍ସ୍ ଅଗ୍ନିକାଣ୍ଡ ତାଙ୍କ ପାଇଁ ବଡ଼ ଚ୍ୟାଲେଞ୍ଜ ହୋଇଥିଲା । ଭୟାବହ ଅଗ୍ନିକାଣ୍ଡ ସମୟରେ ସେ ଦେଶ ବାହାରେ ଥିବା ଏବଂ ଅଗ୍ନିଶମ ବିଭାଗ ପ୍ରସ୍ତୁତ ନଥିବା ନେଇ ଭୋଟରଙ୍କ ମଧ୍ୟରେ ଅସନ୍ତୋଷ ରହିଥିଲା । ଏହି କାରଣରୁ ପୁନଃନିର୍ବାଚନରେ ବାସ୍‌ଙ୍କୁ ପରାଜୟର ସାମ୍ନା କରିବାକୁ ପଡ଼ିଛି ।

• ନିତ୍ୟାଙ୍କ ନିର୍ବାଚନୀ ପ୍ରତିଶ୍ରୁତି

ନିତ୍ୟାଙ୍କ ନିର୍ବାଚନୀ ପ୍ରତିଶ୍ରୁତିରେ ସହରର ମୌଳିକ ସେବାରେ ସୁଧାର, ରାସ୍ତାଘାଟର ମରାମତି, ସୁରକ୍ଷା ବ୍ୟବସ୍ଥା ଓ ଗୃହହୀନଙ୍କ ସମସ୍ୟାର ସମାଧାନ ରହିଛି । ସେ ପୋଲିସ୍ ମୁଖ୍ୟଙ୍କୁ ହଟାଇବାକୁ ଚାହୁଁଛନ୍ତି। ଫେଡେରାଲ୍ ଇମିଗ୍ରେସନ୍ ଅଧିକାରୀଙ୍କ ସହ ପୋଲିସ୍ ବିଭାଗର ଅତ୍ୟଧିକ ସହଯୋଗକୁ ନେଇ ସେ ଅସନ୍ତୁଷ୍ଟ । ଗୃହହୀନଙ୍କ ସମସ୍ୟା ନିଥ୍ୟାଙ୍କ ପାଇଁ ଅନ୍ୟତମ ପ୍ରମୁଖ ଚ୍ୟାଲେଞ୍ଜ । ରାସ୍ତା ଓ ବସ୍ତିରେ ରହୁଥିବା ଲୋକଙ୍କ ପାଇଁ ଅଧିକ ମେଡିକାଲ୍ ଟିମ୍ ନିୟୋଜିତ କରିବାକୁ ସେ ଯୋଜନା କରିଛନ୍ତି । ଏହାଦ୍ୱାରା ଲୋକଙ୍କ ମଧ୍ୟରେ ବିଶ୍ୱାସ ସୃଷ୍ଟି କରି ସେମାନଙ୍କୁ ଧୀରେ ଧୀରେ ଆଶ୍ରୟସ୍ଥଳକୁ ଆଣିବା ତାଙ୍କର ଲକ୍ଷ୍ୟ ଅଛି। ୨୦୨୮ରେ ଲସ୍ ଆଞ୍ଜେଲସ୍‌ରେ ଅଲିମ୍ପିକ୍ସ ଆୟୋଜନ ହେବାକୁ ଥିବାବେଳେ ସେହି ସମୟ ସୁଦ୍ଧା ରାସ୍ତାରେ ରହୁଥିବା ଗୃହହୀନଙ୍କ ସଂଖ୍ୟାକୁ ଅତିକମ୍‌ରେ ୫୦ ପ୍ରତିଶତ କମାଇବାକୁ ନିତ୍ୟା ଲକ୍ଷ୍ୟ ରଖିଛନ୍ତି।

ପଢନ୍ତୁ ଏହି ଖବର: ୧୩ ବର୍ଷ ବୟସରୁ ରାଜନୀତି ସ୍ୱପ୍ନ; ଆମେରିକା ପାର୍ଲାମେଣ୍ଟରେ ପହଞ୍ଚିଲେ ମୂଳ ଭାରତୀୟ ପିଆ ଦାଣ୍ଡିଆ

• ନିତ୍ୟାଙ୍କ ସପକ୍ଷରେ ଥିଲା ବଡ଼ ନେତାଙ୍କ ସମର୍ଥନ

ନିତ୍ୟାଙ୍କ ବିଜୟ ଆମେରିକାର ରାଜନୈତିକ ପ୍ରତିଷ୍ଠାନ ପାଇଁ ମଧ୍ୟ ଏକ ବଡ଼ ଝଟକା । ତାଙ୍କୁ ଡେମୋକ୍ରାଟିକ୍ ପାର୍ଟିର ବହୁ ବଡ଼ ନେତାଙ୍କ ସମର୍ଥନ ମିଳିନଥିଲା । ଅନ୍ୟପକ୍ଷରେ କରେନ୍ ବାସ୍‌ଙ୍କୁ କାଲିଫର୍ଣ୍ଣିଆ ଗଭର୍ଣ୍ଣର ଗାଭିନ୍ ନ୍ୟୁସମ୍, ପୂର୍ବତନ ଉପରାଷ୍ଟ୍ରପତି କମଳା ହାରିସ୍ ଏବଂ ପୂର୍ବତନ ହାଉସ୍ ସ୍ପିକର୍ ନାନ୍ସି ପେଲୋସିଙ୍କ ସମର୍ଥନ ମିଳିଥିଲା । ସହରର ଦୀର୍ଘଦିନର ସମସ୍ୟା, ଗୃହହୀନଙ୍କ ସ୍ଥିତି ଓ ମୌଳିକ ସେବାରେ ଅବ୍ୟବସ୍ଥାକୁ ନେଇ ଭୋଟରଙ୍କ ଅସନ୍ତୋଷ ନିତ୍ୟାଙ୍କ ବିଜୟର ମୁଖ୍ୟ କାରଣ ହୋଇଥିବା କୁହାଯାଉଛି ।