ତେହରାନ: ଇରାନ-ଇସ୍ରାଏଲ୍ ଯୁଦ୍ଧ ଦିନକୁ ଦିନ ଆହୁରି ଚରମ ସ୍ଥିତିରେ ପହଞ୍ଚୁଛି । ହର୍ମୁଜ ପ୍ରଣାଳୀ ଦେଇ ଭାରତକୁ ଯାଉଥିବା ଜାହାଜ ଉପରେ କୌଣସି କଟକଣା ନଥିବା ଇରାନ କହୁଛି । ହେଲେ ଯୁଦ୍ଧ ଭିତରେ ବୁଧବାର ହର୍ମୁଜ ପ୍ରଣାଳୀ ଦେଇ ଭାରତ ଆସୁଥିବା ଥାଇଲାଣ୍ଡର ଏକ କାର୍ଗୋ ଉପରେ ଆଟାକ୍ କରିଛି ଇରାନ ।

ମିଳିଥିବା ସୂଚନା ଅନୁସାରେ, ମୟୂରୀ ନାରୀ କାର୍ଗୋ ଜାହାଜ ଉପରେ ଇରାନ ବଡ଼ ଧରଣର ଆକ୍ରମଣ କରିଛି । ଏନେଇ ଥାଇଲାଣ୍ଡ ନୌସେନା ସୂଚନା ଦେବା ସହ ଜାରି କରିଛି ଜାହାଜର ଫଟୋ । ଯେଉଁଥିରେ ଜାହାଜର ସମ୍ମୁଖ ଭାଗରୁ ବ୍ୟାପକ ଧୂଆଁ ବାହାରୁଥିବା ଦେଖିବାକୁ ମିଳିଛି ।

ଏଥିସହ ପଢ଼ନ୍ତୁ: ଦୁବାଇ ବିମାନବନ୍ଦର ନିକଟରେ ଡ୍ରୋନ୍ ଆକ୍ରମଣ; ଭାରତୀୟଙ୍କ ସହ ୪ ଗୁରୁତର

ଇରାନର ଆକ୍ରମଣ ସମୟରେ କାର୍ଗୋ ଜାହାଜ ମୟୂରୀ ନାରୀରେ ପ୍ରାୟ ୨୩ ଜଣ କ୍ରିଉ ସଦସ୍ୟ ଥିଲେ । ସେମାନଙ୍କ ମଧ୍ୟରୁ ୨୦ ଜଣଙ୍କୁ ସୁରକ୍ଷିତ ଉଦ୍ଧାର କରାଯାଇଥିବା ସୂଚନା ମିଳିଛି । ଅନ୍ୟ ୩ ଜଣ ଏବେ ନିଖୋଜ ଅଛନ୍ତି ।

ଏହି ଆକ୍ରମଣକୁ ନେଇ ଥାଇଲାଣ୍ଡ ନୌସେନା ବୟାନ ଜାରି କରିଛି । କହିଛି, "ମୟୂରୀ ନାରୀ ନାମକ ଜାହାଜ ଉପରେ ଆକ୍ରମଣ ହୋଇଛି । ଏହି ମାଲବାହୀ ଜାହାଜର ମାଲିକ ହେଉଛି ଥାଇଲାଣ୍ଡର ପ୍ରେଶିୟସ୍ ସିପିଂ ପିସିଏଲ୍ । ଜାହାଜଟି ସାମଗ୍ରୀ ନେଇ ୟୁଏଇର ଖଲିଫା ବନ୍ଦରରୁ ବାହାରି ଗୁଜରାଟର କାଣ୍ଡଲା ବନ୍ଦରକୁ ଯାଉଥିଲା । ହର୍ମୁଜ ପ୍ରଣାଳୀ ଅତିକ୍ରମ କରିବା ସମୟରେ କାର୍ଗୋ ସିପ୍ ଉପରେ ଆକ୍ରମଣ ହୋଇଛି ।"

ତେବେ ଆକ୍ରମଣର କାରଣ ତତ୍‌କ୍ଷଣାତ୍ ଜଣାପଡ଼ି ନାହିଁ । ଆକ୍ରମଣ ପାଇଁ କେହି ନିଜକୁ ଦାୟୀ ମଧ୍ୟ କରିନାହାନ୍ତି । କେଉଁ ପରିସ୍ଥିତିରେ ଏବଂ କିଭଳି କାର୍ଗୋ ଜାହାଜ ଉପରେ ଆକ୍ରମଣ ହେଲା ତାର ତଦନ୍ତ କରାଯାଉଥିବା କହିଛି ରୟାଲ୍ ଥାଇ ନାଭି ।

ଏଥିସହ ପଢ଼ନ୍ତୁ: ଯୁଦ୍ଧ ଭିତରେ ଆସିବ କି ବଡ଼ ବିପର୍ଯ୍ୟୟ ? ସମୂଦ୍ର କୂଳରେ ପଡ଼ିଛି ବିଶାଳକାୟ 'ଡୁମ୍ସଡେ ମାଛ'

ସେପଟେ ଆକ୍ରମଣ ପରେ ଓମାନର ନୌସେନା ପ୍ରତିକ୍ରିୟା ରଖିଛି । କହିଛି, "୨୦ ଜଣ ସେଲରଙ୍କୁ ଉଦ୍ଧାର କରାଯାଇଛି । ଅନ୍ୟ ୩ ଜଣ କ୍ରିଉ ସଦସ୍ୟଙ୍କୁ ଉଦ୍ଧାର ପାଇଁ ପ୍ରୟାସ ଜାରି ରହିଛି ।"

ଏହା ପୂର୍ବରୁ ୟୁନାଇଟେଡ୍ କିଙ୍ଗଡମ୍ ମାରିଟାଇମ୍ ଟ୍ରେଡ୍ ଅପରେସନ୍ ସେଣ୍ଟର କହିଥିଲା, ୩ଟି ବାଣିଜ୍ୟିକ ଜାହାଜ ଉପରେ ମଙ୍ଗଳବାର ଆକ୍ରମଣ ହୋଇଛି । ଆଉ ଏବେ ଥାଇଲାଣ୍ଡ ମୟୂରୀ ନାରୀ କାର୍ଗୋ ଉପରେ ଆକ୍ରମଣ କଥା କହିଛି । ମୟୂର ନାରୀ ଜାହାଜର ଲମ୍ବ ୧୭୮ ମିଟର ହୋଇଥିବା ବେଳେ ଏହା ୩୦ ହଜାର ଟନ୍ ସାମଗ୍ରୀ ପରିବହନ କରିପାରିବ ।