ଆମେରିକା-ଇସ୍ରାଏଲ-ଇରାନ ଯୁଦ୍ଧ ଆରମ୍ଭ ହେବାର ଏକ ମାସ ବିତିଗଲାଣି । ଦିନକୁ ଦିନ ଭୟଙ୍କର ହେବାରେ ଲାଗିଛି ଯୁଦ୍ଧ ପରିସ୍ଥିତି । ଏହି ସମୟରେ ଯୁଦ୍ଧବିରତିର ଅନେକ ରିପୋର୍ଟ ସାମ୍ନାକୁ ଆସିଛି, କିନ୍ତୁ ଏପର୍ଯ୍ୟନ୍ତ କୌଣସି ଠୋସ୍ ଆଲୋଚନା ହୋଇନାହିଁ ।

ଏହାରି ମଧ୍ୟରେ ପାକିସ୍ତାନ ଦାବି କରିଥିଲା ​​ଯେ ସେ ଆମେରିକା ଏବଂ ଇରାନ ମଧ୍ୟରେ ଚାଲିଥିବା ଯୁଦ୍ଧ ସମାପ୍ତ କରିବା ପାଇଁ ସିଧାସଳଖ ଆଲୋଚନା ଆୟୋଜନ କରିବାକୁ ପ୍ରସ୍ତୁତ । କିନ୍ତୁ ଇରାନ ଏହି ପ୍ରସ୍ତାବକୁ ସମ୍ପୂର୍ଣ୍ଣ ପ୍ରତ୍ୟାଖ୍ୟାନ କରିଛି ।

ପାକିସ୍ତାନର ମଧ୍ୟସ୍ଥତାକୁ ପ୍ରତ୍ୟାଖ୍ୟାନ କଲା ଇରାନ । ଆମେରିକା ଏବଂ ଇରାନ ମଧ୍ୟରେ ଚାଲିଥିବା ୟୁଦ୍ଧ ସମାପ୍ତ କରିବା ପାଇଁ ପାକିସ୍ତାନ ମଧ୍ୟସ୍ଥିତା କରିବାକୁ ପ୍ରସ୍ତୁତ ବୋଲି ଦାବି କରିଥିବା ବେଳେ ଏହାକୁ ପ୍ରତ୍ୟାଖ୍ୟାନ କରିଦେଇଛି ଇରାନ । ମୁମ୍ବାଇସ୍ଥିତ ଇରାନର କନସୁଲେଟ୍ ଜେନେରାଲ୍ ସୋମବାର କହିଛନ୍ତି ଯେ ଆମେରିକା ସହ କୌଣସି ପ୍ରତ୍ୟକ୍ଷ ଆଲୋଚନା ହୋଇନାହିଁ । କେବଳ ମଧ୍ୟସ୍ଥିଙ୍କ ଜରିଆରେ ଅତ୍ୟଧିକ ଏବଂ ଅଯୌକ୍ତିକ ଦାବିଗୁଡ଼ିକ ଆମ ପାଖକୁ ଆସୁଛି । ଆମେରିକାର 'କୂଟନୀତି' କ୍ରମାଗତ ଭାବେ ବଦଳୁଛି, କିନ୍ତୁ ଆମର ଆଭିମୁଖ୍ୟ ସ୍ପଷ୍ଟ । ପାକିସ୍ତାନର ମଞ୍ଚ ସେମାନଙ୍କର ନିଜସ୍ୱ ବ୍ୟାପାର, ଆମେ ସେଥିରେ ଅଂଶଗ୍ରହଣ କରିନାହୁଁ ।

ରବିବାର ଦିନ ପାକିସ୍ତାନର ବୈଦେଶିକ ମନ୍ତ୍ରୀ ଇଶାକ ଦାର୍ ଇସଲାମାବାଦରେ ସାଉଦି ଆରବ, ମିଶର ଏବଂ ତୁର୍କୀର ବୈଦେଶିକ ମନ୍ତ୍ରୀମାନଙ୍କ ସହ ଆଲୋଚନା କରିଥିଲେ । ଏହାପରେ ସେ ଦାବି କରିଥିଲେ ଯେ ଇସଲାମାବାଦରେ ଆମେରିକା-ଇରାନ ମଧ୍ୟରେ ସମ୍ଭାବ୍ୟ ଆଲୋଚନା ପାଇଁ ଏହି ଦେଶଗୁଡ଼ିକ ସମର୍ଥନ ଜଣାଇଛନ୍ତି । ସେ ଆହୁରି ମଧ୍ୟ କହିଥିଲେ ଯେ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫ୍ ଇରାନ ରାଷ୍ଟ୍ରପତି ମାସୁଦ ପେଜେସକିଆନଙ୍କ ସହ ଫୋନ୍‌ରେ କଥା ହୋଇଛନ୍ତି ।

ଏଥିସହ ପଢ଼ନ୍ତୁ: ଇରାନକୁ ପୁଣି ଧମକ ଦେଲେ ଟ୍ରମ୍ପ, ହର୍ମୁଜ ପ୍ରଣାଳୀ ନ ଖୋଲିଲେ ଖାର୍ଗ ଦ୍ବୀପକୁ ଧ୍ବଂସ କରିଦେବି