ମଧ୍ୟପ୍ରାଚ୍ୟରେ ଯୁଦ୍ଧ ପରିସ୍ଥିତି କିଛି ମାତ୍ରାରେ ଶାନ୍ତ ପଡ଼ିଥିବାବେଳେ ଯୁଦ୍ଧକୁ ବନ୍ଦ କରିବା ଲାଗି ଇସଲାମାବାଦରେ କୂଟନୈତିକ ସ୍ତରରେ ଉଦ୍ୟମ କରୁଛି । କିନ୍ତୁ ପାକିସ୍ତାନ ପ୍ରଥମ ପର୍ଯ୍ୟାୟ ଆଲୋଚନା ବିଫଳ ହୋଇଥିଲା । ଏବେ ପାକିସ୍ତାନ ଦ୍ଵିତୀୟ ଥର ପାଇଁ ପୁଣି ଥରେ ଶାନ୍ତି ବୈଠକ ଡାକିଛି । ଏକ ଆମେରିକୀୟ ପ୍ରତିନିଧି ଦଳ ସୋମବାର ପାକିସ୍ତାନରେ ପହଞ୍ଚିବାର କାର୍ଯ୍ୟକ୍ରମ ରହିଛି । ହ୍ୱାଇଟ୍ ହାଉସ୍ ନିଶ୍ଚିତ କରିଛି ଯେ ସ୍ୱତନ୍ତ୍ର ଦୂତ ଷ୍ଟିଭ୍ ୱିଟକଫ୍ ଏବଂ ଜାରେଡ୍ କୁଶନର ଏହି ଗସ୍ତରେ ଯିବେ । କିନ୍ତୁ ସେପଟେ ଇରାନ ଆମେରିକାର ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛି ଏବଂ ଆଲୋଚନାରେ ଅଂଶଗ୍ରହଣ କରିବାକୁ ସିଧା ସିଧା ମନା କରିଦେଇଛି ।

• ଇରାନ ସହ ଫୋନର କଥା ହେଲା ପାକିସ୍ତାନ

ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫ ଦ୍ୱିତୀୟ ପର୍ଯ୍ୟାୟ ଆଲୋଚନା ପୂର୍ବରୁ ଇରାନ ରାଷ୍ଟ୍ରପତି ମାସୁଦ ପେଜେଶକିୟାନଙ୍କ ସହ ଫୋନ୍ ମାଧ୍ୟମରେ କଥା ହୋଇଛନ୍ତି । ଏପରିକି ଶେହବାଜ ସରିଫ ସାଉଦି ଆରବ, କତାର ଏବଂ ତୁର୍କୀର ନେତାମାନଙ୍କ ସହ ତାଙ୍କର ସାମ୍ପ୍ରତିକ ଆଲୋଚନା ବିଷୟରେ ମଧ୍ୟ ଇରାନ ରାଷ୍ଟ୍ରପତିଙ୍କୁ ଅବଗତ କରାଇଥିଲେ । ଏହି ଆଲୋଚନାର ଲକ୍ଷ୍ୟ ଥିଲା ଯୁଦ୍ଧଗ୍ରସ୍ତ ଅଞ୍ଚଳରେ ସ୍ଥାୟୀ ଶାନ୍ତି ପାଇଁ ଏକ ପଥ ଖୋଜିବା । କିନ୍ତୁ ଇରାନ ଦ୍ଵିତୀୟ ଶାନ୍ତି ବୈଠକରେ ଯୋଗଦେବ ନାହିଁ ବୋଲି ସିଧା ସିଧା ମନା କରିଦେଇଥିବାବେଳେ ବୈଠକରେ ସାମିଲ ହେବା ଲାଗି ଏକ ସର୍ତ୍ତ ରଖିଛି । ଇରାନ କହିଛି ଯେ ଯଦି ଆମେରିକା ଏହାର ବନ୍ଦରଗୁଡ଼ିକ ଉପରେ ବର୍ତ୍ତମାନ ଲାଗୁ ହୋଇଥିବା ନୌସେନା ଅବରୋଧକୁ ହଟାଇ ଦିଆଯାଏ, ତେବେ ହିଁ ସେ ଆଲୋଚନାରେ ଅଂଶଗ୍ରହଣ କରିବ ।

ପଢନ୍ତୁ ଏହି ଖବର: ପ୍ରଥମ ଥର ପାକିସ୍ତାନ ଫେଲ୍; ପୁଣି ଇରାନ ଆମେରିକା ମଧ୍ୟରେ ଶାନ୍ତି ବୈଠକ

• ପ୍ରଥମ ବୈଠକ ଫେଲ୍ ମାରିଥିଲା

ଏହା ପୂର୍ବରୁ ଆମେରିକା ଏବଂ ଇରାନ ମଧ୍ୟରେ ଗତ ଏପ୍ରିଲ ୧୧ ଏବଂ ୧୨ ତାରିଖରେ ପ୍ରଥମ ଶାନ୍ତି ବୈଠକ ଇସଲାମାବାଦରେ ଅନୁଷ୍ଠିତ ହୋଇଥିଲା । ଏହି ଶାନ୍ତି ବୈଠକରେ ପାକିସ୍ତାନ ମଧ୍ୟସ୍ଥତା କରିଥିବାବେଳେ ବୈଠକ ସମ୍ପୂର୍ଣ୍ମ ଫେଲ୍ ମାରିଥିଲା । ଏଣୁ ପାକିସ୍ତାନ ଦ୍ଵିତୀୟ ଥର ଲାଗି ଉଭୟ ରାଷ୍ଟ୍ର ମଧ୍ୟରେ ସ୍ଥାୟୀ ସମାଧାନ କରିବାକୁ ଅଣ୍ଟା ଭିଡ଼ିଛି । ଅନ୍ୟପଟେ ଏପ୍ରିଲ ୨୨ ତାରିଖରେ ଆମେରିକା ଓ ଇରାନ ମଧ୍ୟରେ ହୋଇଥିବା ଅସ୍ତ୍ରବିରତି ସମୟ ସୀମା ଶେଷ ହେବାକୁ ଯାଉଛି ।