Argus News - ପ୍ରଥମ ଥର ପାକିସ୍ତାନ ଫେଲ୍; ପୁଣି ଇରାନ ଆମେରିକା ମଧ୍ୟରେ ଶାନ୍ତି ବୈଠକ

ପଶ୍ଚିମ ଏସିଆରେ ବଢ଼ୁଥିବା ଉତ୍ତେଜନା ମଧ୍ୟରେ ଇରାନ ଏବଂ ଆମେରିକା ମଧ୍ୟରେ ଆଉ ଏକ ପର୍ଯ୍ୟାୟ ଶାନ୍ତି ଆଲୋଚନା ହେବାକୁ ଯାଉଛି । ସୋମବାର ପାକିସ୍ତାନର ରାଜଧାନୀ ଇସଲାମାବାଦରେ ଉଭୟ ଦେଶର ପ୍ରତିନିଧି ଦଳ ସାକ୍ଷାତ କରିବେ । ପ୍ରତିନିଧି ଦଳ ରବିବାର ସୁଦ୍ଧା ପହଞ୍ଚିବେ ବୋଲି ଆଶା କରାଯାଉଛି । ଏହା ପୂର୍ବରୁ ପ୍ରଥମ ଶାନ୍ତି ବୈଠକରେ ପାକିସ୍ତାନ ମଧ୍ୟସ୍ଥତା କରିଥିଲା । ହେଲେ କୌଣସି ନିଷ୍କର୍ସ ବାହାରିନଥିବାରୁ ଫେରିଯାଇଥିଲେ ଉଭୟ । ଏବେ ଦ୍ଵିତୀୟ ଥର ଲାଗି ପାକିସ୍ତାନ ମଧ୍ୟସ୍ଥତା କରିବ ।

ଆମେରିକା ଏବଂ ଇରାନ ମଧ୍ୟରେ ଉତ୍ତେଜନା ହ୍ରାସ କରିବା ପାଇଁ ଅନ୍ତର୍ଜାତୀୟ ସ୍ତରରେ ପ୍ରୟାସ କରାଯାଉଛି । ଏଥିଲାଗି, କାତାରର ଆମିର ଶେଖ୍ ତାମିମ୍ ବିନ୍ ହମାଦ୍ ଅଲ୍ ଥାନି ଏବଂ ତୁର୍କୀ ରାଷ୍ଟ୍ରପତି ରେସେପ୍ ତାୟିପ୍ ଏର୍ଡୋଗାନ୍ ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫଙ୍କୁ ଭେଟିଥିଲେ । ଏହି ବୈଠକ ଆଣ୍ଟାଲିଆ କୂଟନୀତି ଫୋରମ୍ ସମୟରେ ଅନୁଷ୍ଠିତ ହୋଇଥିଲା, ଯେଉଁଠାରେ ସମସ୍ତ ନେତା ଏହି ଅଞ୍ଚଳରେ ଶାନ୍ତି ଏବଂ କୂଟନୈତିକ ସମାଧାନ ଉପରେ ଗୁରୁତ୍ୱାରୋପ କରିଥିଲେ ।

• ଇରାନରେ ପାକିସ୍ତାନ ସେନା ମୁଖ୍ୟ

ଏପଟେ ପାକିସ୍ତାନର ସେନା ମୁଖ୍ୟ ଅସୀମ ମୁନିର ଇରାନରେ ପହଞ୍ଚିଛନ୍ତି । ସେ ତେହେରାନରେ ଇରାନ ସଂସଦର ବାଚସ୍ପତି ମହମ୍ମଦ ବାକର ଗାଲିବାଫଙ୍କ ସହ ସାକ୍ଷାତ କରିଛନ୍ତି । ଏହି ବୈଠକକୁ ଆମେରିକା-ଇରାନ ଆଲୋଚନା ପୁନଃ ଆରମ୍ଭ କରିବାର ପ୍ରୟାସର ଏକ ଅଂଶ ଭାବରେ ଦେଖାଯାଉଛି । କୁହାଯାଉଛି ଯେ ମୁନିର ଆମେରିକାର ଏକ ପ୍ରସ୍ତାବ ନେଇ ଇରାନରେ ପହଞ୍ଚିଛନ୍ତି ।

• ସୋମବାର ଦ୍ଵିତୀୟ ଶାନ୍ତି ବୈଠକ

ଦ୍ୱିତୀୟ ପର୍ଯ୍ୟାୟ ଆଲୋଚନା ପାକିସ୍ତାନ ରାଜଧାନୀ ଇସଲାମବାଦରେ ସୋମବାର ହେବାକୁ ଯାଉଛି । ପାକିସ୍ତାନ ପୁଣିଥରେ ଆମେରିକା ଏବଂ ଇରାନ ମଧ୍ୟରେ ମଧ୍ୟସ୍ଥତା କରୁଛି । ଦୁଇ ଦେଶ ମଧ୍ୟରେ ପ୍ରଥମ ପର୍ଯ୍ୟାୟ ଆଲୋଚନା ମଧ୍ୟ ପାକିସ୍ତାନରେ ହୋଇଥିଲା, କିନ୍ତୁ ସେହି ଆଲୋଚନା ବିଫଳ ହୋଇଥିଲା । ପ୍ରଥମ ପର୍ଯ୍ୟାୟରେ, ଦୁଇ ଦେଶ କିଛି ଦାବି ଉପରେ ସହମତିରେ ପହଞ୍ଚିପାରିଲେ ନାହିଁ ।

ପଢନ୍ତୁ ଏହି ଖବର: ଟ୍ରମ୍ପଙ୍କୁ ନେଇ ଚିହିଁକିଲା ଇରାନ, କହିଲା 'ହର୍ମୁଜ୍‌ରେ ଚାଲିବ କେବଳ ଆମ ଆଇନ୍'

• ପାକିସ୍ତାନ ଯାଇପାରନ୍ତି ଟ୍ରମ୍ପ

ଯଦି ଏଥର ଆମେରିକା ଓ ଇରାନ ମଧ୍ୟରେ ହେଉଥିବା ଶାନ୍ତି ବୈଠକର ସମାଧାନ ବାହାରେ, ତେବେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପାକିସ୍ତାନକୁ ଯାଇପାରନ୍ତି ବୋଲି ହ୍ଵାଇଟ୍ ହାଉସରେ ଗଣମାଧ୍ୟମ ପ୍ରତିନିଧିଙ୍କୁ କହିଛନ୍ତି । ତେବେ ପାକିସ୍ତାନ ଏହା ଚାହୁଁଛି ବୋଲି ଟ୍ରମ୍ପ କହିଛନ୍ତି । ଟ୍ରମ୍ପ ଏହା ମଧ୍ୟ କହିଛନ୍ତି ଯେ ଇରାନ ସହିତ କୂଟନୈତିକ ବାର୍ତ୍ତାଳାପ ଏକ ସକାରାତ୍ମକ ଦିଗରେ ଆଗଉଛି । ଖୁବଶୀଘ୍ର ନିଷ୍କର୍ସ ବାହାରିବ ବୋଲି ସେ କହିଛନ୍ତି ।