Iran Targeted Netanyahu Son / ‘ଇରାନ ମୋ ପୁଅକୁ ମାରିବାକୁ ଚେଷ୍ଟା କରିଥିଲା…’, ନେତନ୍ୟାହୁଙ୍କ ସାଂଘାତିକ ଦାବି

ଇସ୍ରାଏଲ୍ ଓ ଇରାନ୍ ମଧ୍ୟରେ ବଢ଼ୁଥିବା ତିକ୍ତତା ମଧ୍ୟରେ ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ ଏକ ବଡ଼ ଦାବି କରିଛନ୍ତି । ନେତନ୍ୟାହୁ କହିଛନ୍ତି ଯେ ଇରାନ ତାଙ୍କ ପୁଅଙ୍କୁ ହତ୍ୟା କରିବାକୁ ଚେଷ୍ଟା କରିଥିଲା । ତେବେ ଏହି କଥିତ ଷଡ଼ଯନ୍ତ୍ର ସମ୍ପର୍କରେ ସେ କୌଣସି ଠୋସ୍ ପ୍ରମାଣ କିମ୍ବା ବିସ୍ତୃତ ସୂଚନା ସାର୍ବଜନୀନ କରିନାହାନ୍ତି ।
ସୋମବାର ଇସ୍ରାଏଲ୍‌ର ଚ୍ୟାନେଲ୍ 14କୁ ଦେଇଥିବା ଏକ ଟେଲିଫୋନ୍ ସାକ୍ଷାତକାରରେ ନେତନ୍ୟାହୁ ଏହି ଦାବି କରିଥିଲେ । ସେ କହିଥିଲେ, ଇରାନ ତାଙ୍କ ଜଣେ ପୁଅଙ୍କୁ ଟାର୍ଗେଟ୍ କରିଥିଲା । ଏହି କାରଣରୁ ଇସ୍ରାଏଲ୍‌ରେ ପ୍ରଧାନମନ୍ତ୍ରୀ ପଦ ପାଇଁ ପ୍ରାର୍ଥୀ ହେଉଥିବା ନେତାମାନଙ୍କୁ ସୁରକ୍ଷା ଯୋଗାଇବା କୌଣସି ବିଳାସିତା ନୁହେଁ, ବରଂ ଏହା ଅତ୍ୟନ୍ତ ଆବଶ୍ୟକ ବୋଲି ସେ ମତ ଦେଇଛନ୍ତି ।

ତେବେ ନେତନ୍ୟାହୁ ତାଙ୍କ କେଉଁ ପୁଅଙ୍କୁ ଇରାନ ଟାର୍ଗେଟ୍ କରିଥିଲା, ତାହା ସ୍ପଷ୍ଟ କରିନାହାନ୍ତି । ତାଙ୍କ ବଡ଼ ପୁଅ ୟାଇର୍ ନେତନ୍ୟାହୁ ମିଆମିରେ ରହୁଛନ୍ତି । ଅନ୍ୟପଟେ, ଏହି ଅଭିଯୋଗ ଉପରେ ଇରାନର ନ୍ୟୁୟର୍କସ୍ଥିତ ମିଶନ୍ ପକ୍ଷରୁ ତୁରନ୍ତ କୌଣସି ପ୍ରତିକ୍ରିୟା ମିଳିନାହିଁ ।

ନେତନ୍ୟାହୁଙ୍କ ଏହି ବୟାନ ଏଭଳି ଏକ ସମୟରେ ଆସିଛି, ଯେତେବେଳେ ଇସ୍ରାଏଲ୍, ଆମେରିକା ଓ ଇରାନ ମଧ୍ୟରେ ସଂଘର୍ଷ ପରେ ଉତ୍ତେଜନା ଚରମ ସୀମାରେ ପହଞ୍ଚିଛି । ଏହି ସଂଘର୍ଷରେ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନେଇଙ୍କ ସମେତ ଅନେକ ବରିଷ୍ଠ ଇରାନୀ ନେତା ନିହତ ହୋଇଥିବା ନେଇ ଦାବି ମଧ୍ୟ କରାଯାଇଥିଲା ।

ଅଧିକ ପଢ଼ନ୍ତୁ: ବିଦେଶ ମାଟିରେ ଭାରତୀୟ ନାରୀଙ୍କ ଜଲୱା; Times Squareରେ ଛାଇଗଲା ଦେଶୀ ଲୁକ୍

ଅନ୍ୟପଟେ ଇସ୍ରାଏଲ୍‌ର ସୁରକ୍ଷା ଏଜେନ୍ସି ଶିନ୍ ବେଟ୍‌କୁ ନେଇ ମଧ୍ୟ ବିବାଦ ଚାଲିଛି। ଜଣେ ରାଜନୈତିକ ପ୍ରତିଦ୍ୱନ୍ଦ୍ୱୀଙ୍କୁ ସୁରକ୍ଷା ଦେବାକୁ ଶିନ୍ ବେଟ୍ ମନା କରିଥିବା ନେଇ ରିପୋର୍ଟ ପ୍ରକାଶ ପାଇଥିଲା। ଏହି ପ୍ରସଙ୍ଗରେ ନେତନ୍ୟାହୁ କହିଛନ୍ତି ଯେ ନିର୍ବାଚନରେ ପ୍ରଧାନମନ୍ତ୍ରୀ ପଦ ପାଇଁ ଲଢ଼ୁଥିବା ପ୍ରତ୍ୟେକ ପ୍ରାର୍ଥୀଙ୍କୁ ଉପଯୁକ୍ତ ସୁରକ୍ଷା ଦିଆଯିବା ଦରକାର। ଏନେଇ ସେ ଶିନ୍ ବେଟ୍ ମୁଖ୍ୟ ଡେଭିଡ୍ ଜିନିଙ୍କ ସହ କଥା ହୋଇଥିବା ମଧ୍ୟ କହିଛନ୍ତି ।

ଇସ୍ରାଏଲ୍‌ରେ ଅକ୍ଟୋବର ୨୭ରେ ସାଧାରଣ ନିର୍ବାଚନ ହେବାକୁ ଥିବାରୁ ଏହି ବୟାନର ରାଜନୈତିକ ପ୍ରଭାବ ମଧ୍ୟ ରହିପାରେ । ବର୍ତ୍ତମାନର ଓପିନିଅନ୍ ପୋଲ୍‌ଗୁଡ଼ିକରେ ନେତନ୍ୟାହୁଙ୍କ ମେଣ୍ଟ ସରକାର ପଛରେ ଥିବା ଦେଖାଯାଉଛି । ରିପୋର୍ଟ ଅନୁସାରେ ଗାଦି ଆଇଜେନକୋଟ୍‌ଙ୍କ ଦଳ ସର୍ବାଧିକ ସିଟ୍ ଜିତିପାରେ । ତେବେ ଇସ୍ରାଏଲ୍‌ରେ ସରକାର ଗଠନ ପାଇଁ ସାଧାରଣତଃ ଏକାଧିକ ଦଳର ମେଣ୍ଟ ଆବଶ୍ୟକ ହୋଇଥାଏ ।

ଏଭଳି ପରିସ୍ଥିତିରେ ନେତନ୍ୟାହୁଙ୍କ ଇରାନ ବିରୋଧରେ ଆସିଥିବା ଏହି ଦାବି ନିର୍ବାଚନୀ ମାହୋଲରେ ସୁରକ୍ଷା ଓ ଇରାନର ବିପଦକୁ ନେଇ ଚର୍ଚ୍ଚାକୁ ଆହୁରି ତୀବ୍ର କରିପାରେ । ତେବେ ବର୍ତ୍ତମାନ ସୁଦ୍ଧା ତାଙ୍କ ପୁଅଙ୍କୁ ହତ୍ୟା କରିବା ପାଇଁ ଇରାନ କଥିତ ଭାବେ କରିଥିବା ଷଡ଼ଯନ୍ତ୍ର ସମ୍ପର୍କରେ ନେତନ୍ୟାହୁଙ୍କ ପକ୍ଷରୁ କୌଣସି ବିସ୍ତୃତ ପ୍ରମାଣ କିମ୍ବା ସ୍ପଷ୍ଟ ତଥ୍ୟ ସାମ୍ନାକୁ ଆସିନାହିଁ ।