ନୂଆଦିଲ୍ଲୀ: ଗୋଟିଏ ଯୁଦ୍ଧରେ ଯବନିକା ପଡ଼ିଲା, ଆଉ ଏକ ଯୁଦ୍ଧ ଛିଡ଼ିଲା । ଶାନ୍ତି ଚୁକ୍ତି ସହ ଆମରିକା-ଇରାନ ଯୁଦ୍ଧ ସରିଛି । ହେଲେ ଆମେରିକା-ଇରାନ ମଧ୍ୟରେ ହୋଇଥିବା ଚୁକ୍ତିକୁ ସହଜରେ ଗ୍ରହଣ କରି ପାରୁନି ଇସ୍ରାଏଲ୍ ।

ଯାହାର ଫଳ ସ୍ଵରୂପ ଶାନ୍ତି ଚୁକ୍ତି ପରେ ଲେବାନନ ଉପରେ ଇସ୍ରାଏଲ୍ ଆଟାକ୍ ଜାରି ରଖିଛି । ସଦ୍ୟ ସୂଚନା ଅନୁସାରେ, ଇସ୍ରାଏଲ୍ ସୈନିକ ଦକ୍ଷିଣ ଲେବାନନ ଉପରେ ରାତି ଅଧିଆ ଆକ୍ରମଣ କରିଛି । ଇସ୍ରାଏଲ୍ ଆକ୍ରମଣରେ ପ୍ରାୟ ୧୬ ଜଣଙ୍କ ମୃତ୍ୟୁ ହୋଇଥିବା ଲେବାନନର ଗଣମାଧ୍ୟମ ରିପୋର୍ଟ କରିଛନ୍ତି ।

ଏଥିସହ ପଢ଼ନ୍ତୁ: ହର୍ମୁଜ ପ୍ରଣାଳୀରୁ ନାକାବନ୍ଦୀ ହଟାଇଲା ଆମେରିକା, ୬୦ ଦିନ ଯାଏଁ ବିନା ଶୁଳ୍କରେ ଯାତାୟାତ କରିପାରିବ ଜାହାଜ 

ତେବେ ଲେବାନନ ଉପରେ ଇସ୍ରାଏଲ୍‌ର ଆକ୍ରମଣ ଶାନ୍ତି ଚୁକ୍ତିକୁ ପ୍ରଭାବିତ କରିପାରେ । କାରଣ ଚୁକ୍ତି ଅନୁସାରେ, ଦୁଇ ଦେଶ କୌଣସି ପ୍ରକାର ସାମରିକ କାର୍ଯ୍ୟାନୁଷ୍ଠାନ ଗ୍ରହଣ କରିବା ନାହିଁ । ଅନ୍ୟପଟେ ଲେବାନନରେ ହିଜବୁଲ୍ଲାର ଉପସ୍ଥିତିକୁ ଇସ୍ରାଏଲ୍‌ ବିପଦ ଆଶଙ୍କା କରୁଛି ।

ଯାହାକୁ ନେଇ ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ପଛକୁ ହଟିବେ ନାହିଁ କହିଛନ୍ତି । ନେତାନ୍ୟାହୁ କହିଛନ୍ତି, "ଯେବେ ପର୍ଯ୍ୟନ୍ତ ହିଜବୁଲ୍ଲାର ଅନ୍ତ ନ ହୋଇଛି, ସେବେ ପର୍ଯ୍ୟନ୍ତ ଇସ୍ରାଏଲ୍ ସୈନିକ ଲେବାନନ ଉପରେ ଆକ୍ରମଣ ଜାରି ରଖିବେ ।"

ଗୋଟିଏ ପଟେ ସ୍ଵିଜରଲ୍ୟାଣ୍ଡରେ ଇରାନ ଓ ଆମେରିକା ଯୁଦ୍ଧ ସମ୍ପୂର୍ଣ୍ଣ ସମାପ୍ତି ନେଇ ଆଲୋଚନା କରିବାକୁ ଥିବା ବେଳେ ଇସ୍ରାଏଲ, ଲେବାନନ ଉପରେ ଆକ୍ରମଣ କରି କ୍ଷେତ୍ରରେ ପୁଣି ଥରେ ଉତ୍ତେଜନା ସୃଷ୍ଟି କରିଛି ।

ଅଟକିଲା ସ୍ଵିଜରଲ୍ୟାଣ୍ଡ ଆଲୋଚନା

ଗୁରୁବାର ଆମେରିକା ଉପରାଷ୍ଟ୍ରପତି ଜେଡି ଭାନ୍ସ ଇରାନ ସହ ଆଲୋଚନା ପାଇଁ ସ୍ଵିଜରଲ୍ୟାଣ୍ଡ ଯିବାର ଥିଲା । ତେବେ ଲଜିଷ୍ଟିକ୍ସ ସମସ୍ୟା ପାଇଁ ଜେଡି ଭାନ୍ସ ଯାଇ ପାରି ନଥିବା ହ୍ଵାଇଟ୍ ହାଉସ୍ ପକ୍ଷରୁ କୁଯାଇଛି ।

ଏଥିସହ ପଢ଼ନ୍ତୁ: ତାତିଲେଣୀ ଇସ୍ରାଏଲୀ; ନିର୍ବାଚନ ଆଗରୁ ବଢୁଛି ନେତାନ୍ୟାହୁଙ୍କ ଚିନ୍ତା

ଅନ୍ୟପଟେ ଇରାନ ସମର୍ଥିତ ହିଜବୁଲ୍ଲା ସହ ଜଡ଼ିତ ଏକ ଚ୍ୟାନେଲ୍ କହିଛି, "ତେହରାନ ତାର ପ୍ରତିନିଧିଙ୍କୁ ସ୍ଵିଜରଲ୍ୟାଣ୍ଡ ପଠାଇବାରେ ବିଳମ୍ବ କରୁଛି ।" ଏବେ ସମସ୍ତଙ୍କ ନଜର ସ୍ଵିଜରଲ୍ୟାଣ୍ଡରେ ଆମେରିକା-ଇରାନ ଆଲୋଚନା ଲେବାନନ-ଇସ୍ରାଏଲ୍ ଯୁଦ୍ଧକୁ କେବେ ରୋକୁଛି ।

ସେପଟେ ବୁଧବାର ଫ୍ରାନ୍ସ ରାଷ୍ଟ୍ରପତି ଏମ୍ମାନୁଏଲ୍ ମାକ୍ରନଙ୍କ ସହ ରାତ୍ରୀଭୋଜନ ବେଳେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନ ଚୁକ୍ତିର ପ୍ରାରମ୍ଭିକ ନଥିପତ୍ରରେ ହସ୍ତାକ୍ଷର କରିବା ସହ ତାହା ତୁରନ୍ତ ଲାଗୁ ହୋଇଛି ।

ଚୁକ୍ତିରେ ଟ୍ରମ୍ପଙ୍କ ସ୍ଵାକ୍ଷର ପରେ ଉପରାଷ୍ଟ୍ରପତି ଜେଡି ଭାନ୍ସ ଇସ୍ରାଏଲ୍‌କୁ ଚେତାବନୀ ଦେଇଛନ୍ତି । କହିଛନ୍ତି, "ବିଶ୍ଵରେ ଟ୍ରମ୍ପ ହେଉଛନ୍ତି ଏଭଳି ଜଣେ ନେତା ଯିଏକି, ଇସ୍ରାଏଲ୍‌କୁ ଏବେ ଦୟା କରୁଛନ୍ତି ।"