ଆମେରିକା ହର୍ମୁଜ ପ୍ରଣାଳୀ ଏବଂ ଇରାନର ବନ୍ଦରଗୁଡ଼ିକରୁ ନାକାବନ୍ଦୀ ସମ୍ପୂର୍ଣ୍ଣ ଭାବେ ହଟାଇ ଦେଇଛି । ଆମେରିକା ଏବଂ ଇରାନ ମଧ୍ୟରେ ଚାଲିଥିବା ଯୁଦ୍ଧର ସମାପ୍ତି ପାଇଁ ଏକ ପ୍ରାରମ୍ଭିକ ଶାନ୍ତି ଚୁକ୍ତି ସ୍ବାକ୍ଷରିତ ହେବା ପରେ ଏହି ଗୁରୁତ୍ଵପୂର୍ଣ୍ଣ ପଦକ୍ଷେପ ନିଆଯାଇଛି ।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଇରାନର ରାଷ୍ଟ୍ରପତି ମସୁଦ ପେଜେସ୍କିଆନଙ୍କ ମଧ୍ୟରେ ଏକ ୧୪-ଦଫା ସମ୍ବଳିତ ବୁଝାମଣାପତ୍ର ସ୍ଵାକ୍ଷରିତ ହୋଇଛି । ଏହାପରେ ଆମେରିକାର ସେଣ୍ଟ୍ରାଲ କମାଣ୍ଡ ନାକାବନ୍ଦୀ ହଟାଇବା ନେଇ ଆଧିକାରିକ ଘୋଷଣା କରିଛି ।

ଶାନ୍ତିଚୁକ୍ତି ଅନୁଯାୟୀ, ଦୁଇ ଦେଶ ମଧ୍ୟରେ ଚୂଡ଼ାନ୍ତ ଆଲୋଚନା ପାଇଁ ୬୦ ଦିନର ସମୟ ଧାର୍ଯ୍ୟ କରାଯାଇଛି । ଇରାନକୁ ତା'ର ସମସ୍ତ ସମୃଦ୍ଧ ୟୁରେନିୟମ ଭଣ୍ଡାରକୁ ନଷ୍ଟ କରିବାକୁ ପଡ଼ିବ ଏବଂ ପରମାଣୁ ଅସ୍ତ୍ର ନିର୍ମାଣ ନ କରିବାକୁ ପ୍ରତିଶ୍ରୁତି ଦେବାକୁ ହେବ । ବର୍ତ୍ତମାନ ପାଇଁ ହର୍ମୁଜ ପ୍ରଣାଳୀ ଦେଇ ବାଣିଜ୍ୟିକ ଜାହାଜଗୁଡ଼ିକ ଆଗାମୀ ୬୦ ଦିନ ପର୍ଯ୍ୟନ୍ତ ବିନା କୌଣସି ଶୁଳ୍କରେ ଯାତାୟାତ କରିପାରିବେ ।

ଅଧିକ ପଢ଼ନ୍ତୁ: ତାତିଲେଣୀ ଇସ୍ରାଏଲୀ; ନିର୍ବାଚନ ଆଗରୁ ବଢୁଛି ନେତାନ୍ୟାହୁଙ୍କ ଚିନ୍ତା

ଏହି ନାକାବନ୍ଦୀ ହଟିବା ଦ୍ବାରା ଭାରତ ବଡ଼ ଆଶ୍ଵସ୍ତି ପାଇଛି । ପ୍ରାୟ ତିନି ମାସ ଧରି ଯୁଦ୍ଧାଞ୍ଚଳରେ ଫସି ରହିଥିବା ଭାରତୀୟ ଏଲ୍‌ଏନ୍‌ଜି ଜାହାଜ 'ଦିଶା' ସୁରକ୍ଷିତ ଭାବେ ହର୍ମୁଜ ପ୍ରଣାଳୀ ଅତିକ୍ରମ କରି ଗୁଜରାଟ ଅଭିମୁଖେ ଯାତ୍ରା କରିଛି । ଭାରତ ନିଜର ପ୍ରାୟ ୬୦% ଏଲ୍‌ଏନ୍‌ଜି ଏବଂ ୪୦% ଅଶୋଧିତ ତୈଳ ଏହି ମାର୍ଗ ଦେଇ ଆମଦାନୀ କରିଥାଏ ।

ସୂଚନା ଅନୁସାରେ, ଆମେରିକା-ଇରାନ ମଧ୍ୟରେ ୩ ମାସ ୩ ସପ୍ତାହ ଧରି ଜାରି ରହିଥିବା ଯୁଦ୍ଧର ଯବନିକା ପଡ଼ିଛି । ଯୁଦ୍ଧ ବନ୍ଦ ଲାଗି ଉଭୟ ଦେଶ ମଧ୍ୟରେ ଶାନ୍ତିଚୁକ୍ତି ସ୍ବାକ୍ଷରିତ ହୋଇଛି ।