Argus News - ଇସ୍ରାଏଲକୁ 'ସୈତାନ' କହିଲା ପାକିସ୍ତାନ; ଖୋଲା ଧମକ ଦେଲେ ନେତାନ୍ୟାହୁ

ମଧ୍ୟପ୍ରାଚ୍ୟରେ ଶାନ୍ତି ଆଲୋଚନା ଚାଲିଥିବା ବେଳେ ଇସ୍ରାଏଲ ଏବଂ ପାକିସ୍ତାନ ଏବେ ମୁହାଁମୁହିଁ ସ୍ଥିତିରେ ଅଛନ୍ତି । ପାକିସ୍ତାନ ଇରାନ ଏବଂ ଆମେରିକା-ଇସ୍ରାଏଲ ମଧ୍ୟରେ ଯୁଦ୍ଧବିରତି ପାଇଁ ମଧ୍ୟସ୍ଥତା କରୁଛି । ଏପରି ପରିସ୍ଥିତିରେ ଏହି ଦୁଇ ଦେଶ ମଧ୍ୟରେ ସଂଘର୍ଷ ଯୁଦ୍ଧବିରତିକୁ ବିପଦରେ ପକାଇପାରେ । କାରଣ ପାକିସ୍ତାନର ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ 'ଇସ୍ରାଏଲ ମାନବତା ପାଇଁ ଅଭିଶାପ' । ଏହାପରେ ଇସ୍ରାଏଲ ଏହି ବିବୃତ୍ତିର ପ୍ରତିଶୋଧ ନେଇ ଇସଲାମାବାଦର ମଧ୍ୟସ୍ଥତା ପ୍ରସ୍ତାବକୁ ନିନ୍ଦା କରିଛି ଓ ଖୋଲା ଧମକ ଦେଇଛି ।

• କାହିଁକି ଇସ୍ରାଏଲକୁ 'ସୈତାନ' କହିଲା ପାକିସ୍ତାନ ?

ଲେବାନନ୍ ଉପରେ ଆକ୍ରମଣ କରିବା ପରେ ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖ୍ଵାଜା ଆସିଫ୍ ଇସ୍ରାଏଲକୁ "ସୈତାନ" ଏବଂ "ମାନବତା ପାଇଁ ଅଭିଶାପ" ବୋଲି କହିଥିଲେ । ଏ ନେଇ ଆସିଫ୍ X ରେ ଲେଖିଥିଲେ, "ଇସଲାମାବାଦରେ ଶାନ୍ତି ଆଲୋଚନା ଚାଲିଥିବା ବେଳେ, ଲେବାନନରେ ନରସଂହାର କରାଯାଉଛି । ଇସ୍ରାଏଲ ଦ୍ୱାରା ନିର୍ଦ୍ଦୋଷ ନାଗରିକଙ୍କୁ ହତ୍ୟା କରାଯାଉଛି, ପ୍ରଥମେ ଗାଜା, ତା'ପରେ ଇରାନ ଏବଂ ଏବେ ଲେବାନନ୍ ।" ସେ ଆହୁରି ମଧ୍ୟ କହିଛନ୍ତି, "ମୁଁ ଆଶା ଏବଂ ପ୍ରାର୍ଥନା କରୁଛି ଯେ ଯେଉଁମାନେ ୟୁରୋପୀୟ ଯିହୂଦୀମାନଙ୍କଠାରୁ ମୁକ୍ତି ପାଇବା ପାଇଁ ପାଲେଷ୍ଟାଇନୀ ଭୂମିରେ ଏହି କର୍କଟ ରାଷ୍ଟ୍ର ସୃଷ୍ଟି କରିଛନ୍ତି ସେମାନେ ନର୍କରେ ଜଳନ୍ତୁ ।"

ପଢନ୍ତୁ ଏହି ଖବର: ଲେବାନନ ଆକ୍ରମଣରେ ଚିହିଁକି ଉଠିଲା ଇରାନ; ବନ୍ଦ କରିଦେଲା ହର୍ମୁଜ୍

• ପାକିସ୍ତାନକୁ ଇସ୍ରାଏଲର ଖୋଲା ଧମକ

ଆସିଫଙ୍କ ମନ୍ତବ୍ୟ ଉପରେ ପ୍ରତିକ୍ରିୟା ପ୍ରକାଶ କରି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଇସ୍ରାଏଲର ବିନାଶ ପାଇଁ ଆହ୍ୱାନକୁ "ଅପରାଧଜନକ" ବୋଲି କହିଛନ୍ତି । ସେ କହିଛନ୍ତି ଯେକୌଣସି ସରକାରଙ୍କ ପକ୍ଷରୁ, ବିଶେଷକରି ଶାନ୍ତି ପାଇଁ ମଧ୍ୟସ୍ଥତା କରୁଥିବା ସରକାରଙ୍କ ପକ୍ଷରୁ ଏପରି ବୟାନକୁ ସହ୍ୟ କରାଯାଇପାରିବ ନାହିଁ । ଇସ୍ରାଏଲର ବୈଦେଶିକ ମନ୍ତ୍ରୀ ଗିଡିଓନ୍ ସାଆର୍ ମଧ୍ୟ ଏହି ମନ୍ତବ୍ୟ ଉପରେ ପାକିସ୍ତାନର ନେତୃତ୍ୱକୁ ନିନ୍ଦା କରିଛନ୍ତି । ସାଆର୍ ଆସିଫଙ୍କୁ "ସ୍ପଷ୍ଟ ଇହୁଦୀ ବିରୋଧୀ ନିନ୍ଦା" କରୁଥିବାର ଅଭିଯୋଗ କରିଛନ୍ତି ଏବଂ ଚେତାବନୀ ଦେଇଛନ୍ତି ଯେ ଇସ୍ରାଏଲକୁ "କର୍କଟ" ବୋଲି କହିବା ଏହାର ବିନାଶ ପାଇଁ ଆହ୍ୱାନ କରିବା ସହିତ ସମାନ ।

• ପାକିସ୍ତାନକୁ 'ଆତଙ୍କବାଦୀ' କହିଲା ଇସ୍ରାଏଲ

ଇସ୍ରାଏଲୀ ବୈଦେଶିକ ମନ୍ତ୍ରୀ ଆହୁରି କହିଛନ୍ତି, "ଇସ୍ରାଏଲ ଏହାର ବିନାଶ ପ୍ରତିଜ୍ଞା କରୁଥିବା ଆତଙ୍କବାଦୀଙ୍କ ବିରୁଦ୍ଧରେ ନିଜକୁ ରକ୍ଷା କରିବ ।" ଇସ୍ରାଏଲ ପକ୍ଷରୁ ଏପରି ଧମକ ଆସିବା ପରେ ଆସିଫ ନିଜ ପୋଷ୍ଟଗୁଡ଼ିକୁ Xରୁ ଡିଲିଟ୍ କରିଛନ୍ତି । ସର୍ବୋଚ୍ଚ ନେତା ଆୟତୁଲ୍ଲାହ ଅଲ୍ଲୀ ଖାମେନେଇଙ୍କ ହତ୍ୟାର ପ୍ରତିଶୋଧ ସ୍ୱରୂପ ଇରାନ ସମର୍ଥିତ ହିଜବୋଲା ଇସ୍ରାଏଲୀ ସହରଗୁଡ଼ିକରେ ରକେଟ ମାଡ଼ କରିବା ପରେ ଇସ୍ରାଏଲ-ଲେବାନନ୍ ବିବାଦ ତୀବ୍ର ହୋଇଥିଲା । ଏହାର ଜବାବରେ ଇସ୍ରାଏଲ ମଧ୍ୟ ଗୁରୁବାର ଲେବାନନ୍ ଉପରେ ବଡ଼ ଧରଣର ଆକ୍ରମଣ କରିଥିଲା । ତେବେ ଆମେରିକା ଓ ଇରାନ ମଧ୍ୟରେ ଯୁଦ୍ଧବିରତି ଘୋଷଣା ପରେ ଇସ୍ରାଏଲ ଏହି ଆକ୍ରମଣ କରିବାରୁ ପାକିସ୍ତାନ ଏହାକୁ ନିନ୍ଦା କରିଥିଲା । ମାତ୍ର ଆମେରିକା ଓ ଇସ୍ରାଏଲ ଉଭୟ ସ୍ପଷ୍ଟ କରିଥିଲେ ଯେ ଏହି ଯୁଦ୍ଧବିରତି କେବଳ ଇରାନ ପର୍ଯ୍ୟନ୍ତ ଥିଲା, ଲେବାନନ୍ ଏଥିରେ ସାମିଲ ନଥିଲା ।