Argus News - ଲେବାନନ ଆକ୍ରମଣରେ ଚିହିଁକି ଉଠିଲା ଇରାନ; ବନ୍ଦ କରିଦେଲା ହର୍ମୁଜ୍

ପଶ୍ଚିମ ଏସୀୟ ଦେଶ ଲେବାନନ ଉପରେ ଇସ୍ରାଏଲର ଆକ୍ରମଣ ପରେ ଚିହିଁକି ଉଠିଲା ଇରାନ । ପୁଣି ବନ୍ଦ କରିଦେଲା ଗୁରୁତ୍ଵପୂର୍ଣ୍ଣ ସାମୁଦ୍ରିକ ପଥ ହର୍ମୁଜ୍ । ଏ ସମ୍ପର୍କରେ ଇରାନର ଅର୍ଦ୍ଧ-ସରକାରୀ ସମାଚାର ଏଜେନ୍ସି ଫାର୍ସ ନ୍ୟୁଜ୍ ଦ୍ଵାରା କୁହାଯାଇଛି । ଯୁଦ୍ଧବିରତି ଦୁଇ ସପ୍ତାହ ପାଇଁ ଲାଗୁ ହେବା ସତ୍ତ୍ଵେ ଇସ୍ରାଏଲ ଲେବାନନ ଉପରେ ଆକ୍ରମଣ କରିଛି । ହର୍ମୁଜ୍ ପ୍ରଣାଳୀ ପୁଣି ବନ୍ଦ ହେବା ପରେ ବିଶ୍ଵ ତୈଳ ଯୋଗାଣ ପାଇଁ ଏକ ବିପଦ ସୃଷ୍ଟି ହୋଇଛି । ଇରାନ ଏହା ମଧ୍ୟ ଚେତାବନୀ ଦେଇଛି ଯେ ଯଦି ଇସ୍ରାଏଲ ଲେବାନନ ଉପରେ ଆକ୍ରମଣ ଜାରି ରଖେ, ତେବେ ଦେଶ ଯୁଦ୍ଧବିରତିରୁ ବାହାରିବ ।

ଆମେରିକା ଓ ଇରାନ ମଧ୍ୟରେ ଦୁଇ ସପ୍ତାହ ପାଇଁ ଯୁଦ୍ଧ ବିରତି ଘୋଷଣା ହେବା ପରେ ପୁରା ବିଶ୍ଵକୁ ଆଶ୍ଵସ୍ତି ମିଳିଥିଲା । ତେବେ ବୁଧବାର ରାତିରେ ଇସ୍ରାଏଲ ଲେବାନନ୍ ସଶସ୍ତ୍ର ଗୋଷ୍ଠୀ ହିଜବୋଲାକୁ ଟାର୍ଗେଟ୍ କରି ୧୦୦ରୁ ଅଧିକ ମିସାଇଲ ମାଡ଼ କରିବା ପରେ ପୁଣି ଯୁଦ୍ଧ ସ୍ଥିତି ଘନେଇଛି । ଏବେ ଏହି ନୂଆ ଘଟଣାକ୍ରମ ସାରା ବିଶ୍ଵରେ ବଜାର, ବିଶେଷ କରି ଅଶୋଧିତ ତୈଳ ବଜାର ଓ ସେୟାର ବଜାର ଉପରେ ବଡ଼ ପ୍ରଭାବ ପକାଇବାକୁ ଯାଉଛି । ଏଠାରେ କହିରଖୁଛୁ କି, ହର୍ମୁଜ୍ ପ୍ରଣାଳୀ ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ତୈଳ ମାର୍ଗ ମଧ୍ୟରୁ ଗୋଟିଏ, ଯାହା ବିଶ୍ୱ ତୈଳ ଯୋଗାଣର ଏକ ଗୁରୁତ୍ୱପୂର୍ଣ୍ଣ ଅଂଶ ପରିବହନ କରେ । ତେଣୁ, ଏହାର ବନ୍ଦ ହେବା ସିଧାସଳଖ ବିଶ୍ୱ ଶକ୍ତି ବଜାରକୁ ପ୍ରଭାବିତ କରେ ।

• ହଠାତ୍ ହର୍ମୁଜ୍ ବନ୍ଦ କରିଦେଲା ଇରାନ

ଆମେରିକା ରାଷ୍ଟ୍ରପତି ଯୁଦ୍ଧ ରୋକିବା ଲାଗି ଇରାନ ସହିତ ହର୍ମୁଜ୍ ପ୍ରଣାଳୀ ଖୋଲିବାକୁ ସର୍ତ୍ତ ରଖିଥିଲେ । ଉଭୟ ରାଷ୍ଟ୍ର ମଧ୍ୟରେ ଦୁଇ ସପ୍ତାହ ଯୁଦ୍ଧ ବନ୍ଦ ହେବା ନେଇ ଘୋଷଣା ହେବା ପରେ ଇରାନ ପୂର୍ବ ପରି ହର୍ମୁଜ୍ ପ୍ରଣାଳୀକୁ ଖୋଲିଥିଲା । ଏହାପରେ ସୁରୁଖୁରୁରେ ହର୍ମୁଜ୍ ଦେଇ ୨ଟି ଟ୍ୟାଙ୍କର ସୁରକ୍ଷିତ ଭାବେ ଅତିକ୍ରମ କରିଥିଲା । କିନ୍ତୁ ଲେବାନନ ଆକ୍ରମଣ ପରେ ତୁରନ୍ତ ସ୍ଥିତି ବଦଳିଥିଲା ଓ ଇରାନ ହର୍ମୁଜ୍ ତୈଳ ମାର୍ଗକୁ ବନ୍ଦ କରିଦେଇଛି । ଯଦି ଦୀର୍ଘ ସମୟ ଧରି ହର୍ମୁଜ୍ ପ୍ରଣାଳୀ ବନ୍ଦ ରୁହେ, ତେବେ ପୁଣି ଥରେ ତୈଳ ସଙ୍କଟ ଉପୁଜିପାରେ ।

ପଢନ୍ତୁ ଏହି ଖବର: ଯୁଦ୍ଧବିରତି ସତ୍ତ୍ଵେ ଲେବାନନ ଉପରେ ଇସ୍ରାଏଲର ଭୟଙ୍କର ଆକ୍ରମଣ; ଛାରଖାର ଦେଶ

• ଲେବାନନ ଉପରେ ଇସ୍ରାଏଲର ଭୀଷଣ ଆକ୍ରମଣ

ଇରାନ ସହିତ ଆମେରିକାର ଯୁଦ୍ଧବିରତିକୁ ଇସ୍ରାଏଲ ସମର୍ଥନ କରିଥିଲା, କିନ୍ତୁ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ କହିଛନ୍ତି ଯେ ଏହି ନିଷ୍ପତ୍ତି ଲେବାନନର ସଶସ୍ତ୍ର ଗୋଷ୍ଠୀ ହିଜବୋଲାଙ୍କ ଉପରେ ଲାଗୁ ହେଉନାହିଁ । ସେ କହିଛନ୍ତି ଯେ ହିଜବୋଲାଙ୍କ ବିରୁଦ୍ଧରେ ଲଢେଇ ଜାରି ରହିବ । ଇସ୍ରାଏଲ ଲେବାନନ ଉପରେ ୧୦୦ରୁ ଅଧିକ ମିସାଇଲ ମାଡ଼ କରିବା ପରେ ସେଠାରେ ପ୍ରାୟ ୨୫୦ରୁ ଅଧିକ ଲୋକଙ୍କ ମୃତ୍ୟୁ ଘଟିଥିବାବେଳେ ୧୧୦୦ରୁ ଅଧିକ ଆହତ ହୋଇଛନ୍ତି । ଏହି ଆକ୍ରମଣରେ ଇସ୍ରାଏଲ ଲେବାନନର ବଡ଼ ବଡ଼ ଅଟ୍ଟାଳିକା ଓ ଭିତ୍ତିଭୂମିକୁ ଟାର୍ଗେଟ କରିଛି ।

• ଟ୍ରମ୍ପଙ୍କ ନୂଆ ଧମକ

ହ୍ୱାଇଟ୍ ହାଉସ୍ ଇରାନର ଏହି ପ୍ରଣାଳୀକୁ ବନ୍ଦ କରିବା ପଦକ୍ଷେପକୁ "ସମ୍ପୂର୍ଣ୍ଣ ଭାବରେ ଅଗ୍ରାହ୍ୟ" ବୋଲି କହିଛି । ଯଦି ପରିସ୍ଥିତି ଜାରି ରହେ ତେବେ ଉତ୍ତେଜନା ଆହୁରି ବୃଦ୍ଧି ପାଇପାରେ ବୋଲି ଇରାନକୁ ଟ୍ରମ୍ପ ଧମକ ଦେଇଛନ୍ତି । ସେପଟେ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ଶରିଫ କହିଛନ୍ତି ଯେ ଯୁଦ୍ଧବିରତି ସବୁଠି ଲାଗୁ ହେବା ଉଚିତ, ଲେବାନନରେ ବି । ଆମେରିକା ଓ ଇରାନ ଅଧିକାରୀଙ୍କ ମଧ୍ୟରେ କୂଟନୈତିକ ଆଲୋଚନା ଜାରି ରହିଛି ବୋଲି ସେ କହିଛନ୍ତି ।

ଅଧିକ ଖବର ପଢନ୍ତୁ...