Argus News - ମିଛ ପରିଚୟ ନେଇ ବୁଲୁଥିଲେ କିମ୍; ଭାଇରାଲ ପୋଷ୍ଟକୁ ନେଇ ହଇଚଇ

ଉତ୍ତର କୋରିଆର ଏକଛତ୍ରବାଦ ଶାସକ କିମ୍ ଜୋଙ୍ଗ ଉନ ପୁଣି ଚର୍ଚ୍ଚାରେ । ଏଥର କୌଣସି ଅଜବ ନିୟମ ପାଇଁ ନୁହେଁ, ବରଂ ନିଜର ମିଛ ପରିଚୟ ପତ୍ର ପାଇଁ । ସୋସିଆଲ ମିଡିଆରେ ଭାଇରାଲ ହେଉଥିବା ଏକ ପୋଷ୍ଟ ଅନୁଯାୟୀ କିମ୍ ଜୋଙ୍ଗ ଉନ୍ ଏକ ନକଲି ପାସପୋର୍ଟ ଧରି ଜାପାନ ବୁଲିବାକୁ ଯାଇଥିଲେ । ଏହି ପୋଷ୍ଟରେ ଏହା ମଧ୍ୟ ଦାବି କରାଯାଇଛି ଯେ କିମ୍ ବ୍ରାଜିଲର ଏହି ନକଲି ପାସପୋର୍ଟ ବ୍ୟବହାର କରି ଜାପାନ ଯାଇଥିଲେ ।

ଭାଇରାଲ ପୋଷ୍ଟ ଅନୁସାରେ, ୧୯୯୧ ମସିହାରେ ୮ ବର୍ଷୀୟ କିମ୍ ଜୋଙ୍ଗ ଉନ୍ ନକଲି ପାସପୋର୍ଟର ବ୍ୟବହାର କରିଥିଲେ । ସେ ନିଜ ବଡ଼ ଭାଇ ଜୋଙ୍ଗ ଚୁଲଙ୍କ ସହିତ ବ୍ରାଜିଲ ପାସପୋର୍ଟ ଧରି ଜାପାନ ଯାଇଥିଲେ । ପୋଷ୍ଟରେ ଏହା ମଧ୍ୟ କୁହାଯାଇଛି ଯେ ତାଙ୍କ ସହିତ ୧୦ ଜଣ ଉତ୍ତର କୋରିଆର ଅଧିକାରୀ ମଧ୍ୟ ଥିଲେ । ସେଠାରେ ସେମାନେ ଗୋଟିଏ ସପ୍ତାହରୁ ଅଧିକ ସମୟ ଯାଏଁ ଥିଲେ ଏବଂ ଅନେକ ଥର ଟୋକିଓ ଡିସନିଲ୍ୟାଣ୍ଡ ମଧ୍ୟ ପରିଭ୍ରମଣ କରିଛନ୍ତି ।

• ନକଲି ପରିଚୟରେ ବୁଲୁଥିଲେ କିମ୍

ପୋଷ୍ଟରେ ଦାବି କରାଯାଇଛି ଯେ କିମ୍ ଜୋଙ୍ଗ ଉନ୍ ଏହି ଯାତ୍ରା ସମୟରେ 'ଜୋସେଫ' ନାଁର ପରିଚୟ ନେଇଥିଲେ । କିମ୍ ବ୍ରାଜିଲର ପାସପୋର୍ଟ ଚୟନ କରିବାର କାରଣ ହେଉଛି ସେଠାରେ ରାଷ୍ଟ୍ରର ବିଭିନ୍ନ ପ୍ରାନ୍ତରୁ ଲୋକେ ବସବାସ କରନ୍ତି । ଏହାର ସୁଯୋଗ ନେଇ ସେ ସହଜରେ ଲୋକଙ୍କ ସହିତ ମିଶିପାରିବେ । ପୋଷ୍ଟରେ ଏହା ମଧ୍ୟ କୁହାଯାଇଛି ୟେ ୨୦୦୧ରେ କିମଙ୍କ ସାବତ ଭାଇ କିମ୍ ଜୋଙ୍ଗ ନାମ୍ ମଧ୍ୟ ନକଲି ପାସପୋର୍ଟ ଧରି ଜାପାନ ଯାଉଥିଲେ, କିନ୍ତୁ ତାଙ୍କୁ ଜାପାନ ବିମାନ ବନ୍ଦରରେ ଚିହ୍ନଟ କରାଯାଇ ଅଟକ ରଖାଯାଇଥିଲା । ଏହାପରେ ତାଙ୍କର ଭାବମୂର୍ତ୍ତିକୁ କ୍ଷତି ପହଞ୍ଚିଥିଲା ।

ପଢନ୍ତୁ ଏହି ଖବର: ହର୍ମୁଜ ପ୍ରଣାଳୀ ସଙ୍କଟ; ଖୋଲାଖୋଲି ଏହି ଦୁଇ ରାଷ୍ଟ୍ର ଉପରେ ବର୍ଷିଲା ଚୀନ

• ବ୍ରାଜିଲରେ ତିଆରି ହୋଇଥିଲା ନକଲି ପାସପୋର୍ଟ

ଏକ ରିପୋର୍ଟ ଅନୁସାରେ, କିମ୍ ଜୋଙ୍ଗ ଉନ୍ ଓ ତାଙ୍କ ପିତା କିମ୍ ଜୋଙ୍ଗ ଇଲ୍ ୧୯୯୦ରେ ବ୍ରାଜିଲରୁ ନକଲି ପାସପୋର୍ଟ ହାସଲ କରିଥିଲେ । ଏଥିରେ କିମ୍ ଜୋଙ୍ଗ ଉନ୍ ତାଙ୍କ ନାଁ 'ଜୋସେଫ ପଗ୍' ରଖିଥିଲେ । ଏହି ପାସପୋର୍ଟ ଅସଲି ପରି ଦେଖାଯାଉଥିବା ଜଣେ ବ୍ରାଜିଲ ଅଧିକାରୀ କହିଛନ୍ତି । ଏହାବ୍ୟତୀତ ୨୦୧୧ରେ ଜାପାନି ଗଣମାଧ୍ୟମ ଦାବି କରିଥିଲା ଯେ କିମ୍ ଜୋଙ୍ଗ ଉନ୍ ଓ ତାଙ୍କ ଭାଇ ୧୯୯୧ରେ ଡିସନିଲ୍ୟାଣ୍ଡ ବ୍ରାଜିଲ ପାସପୋର୍ଟ ଦେଖାଇ ଯାଇଥିଲେ ।