Argus News - ହର୍ମୁଜ ପ୍ରଣାଳୀ ସଙ୍କଟ; ଖୋଲାଖୋଲି ଏହି ଦୁଇ ରାଷ୍ଟ୍ର ଉପରେ ବର୍ଷିଲା ଚୀନ

ପଶ୍ଚିମ ଏସିଆରେ ଜାରି ଯୁଦ୍ଧ ଯୋଗୁଁ ସାରା ବିଶ୍ଵରେ ଶକ୍ତି ସଙ୍କଟ ଉପୁଜିଛି । କେଉଁ ରାଷ୍ଟ୍ରରେ କାର୍ଯ୍ୟ ସପ୍ତାହକୁ କମ କରିଦିଆଗଲାଣି ତ କେଉଁଠି ଆକାଶଛୁଆଁ ହେଲାଣି ତୈଳ ଦର । ଇରାନ ବିରୁଦ୍ଧରେ ଆମେରିକା ଓ ଇସ୍ରାଏଲର ଆକ୍ରମଣ ଯୋଗୁଁ ସାରା ଦେଶରେ ନାନା ସମସ୍ୟା ଦେଖାଦେଇଛି । ବିଶେଷ କରି ହର୍ମୁଜ ପ୍ରଣାଳୀ ଦେଇ ତୈଳ ଜାହାଜ ଯାତାୟାତ ବାଧାପ୍ରାପ୍ତ ମୁଖ୍ୟ କାରଣ ପାଲଟିଛି । ଶେଷରେ ପଶ୍ଚିମ ଏସିଆ ଯୁଦ୍ଧକୁ ନେଇ ମୁହଁ ଖୋଲିଛି ଶକ୍ତିଶାଳୀ ରାଷ୍ଟ୍ର ଚୀନ । ବେଜିଂ ସିଧାସଳଖ ଆମେରିକା ଓ ଇସ୍ରାଏଲକୁ ନାଟର ଗୋବର୍ଦ୍ଧନ ବୋଲି କହିଛି ।

ଚୀନ ଗୁରୁବାର କହିଛି ଯେ ଇରାନ ଉପରେ ଆମେରିକା ଓ ଇସ୍ରାଏଲର ମିଳିତ ଆକ୍ରମଣ ଯୋଗୁଁ ଇରାନ ହର୍ମୁଜ ପ୍ରଣାଳୀକୁ ବନ୍ଦ କରିଛି । ଏହି ଯୁଦ୍ଧ ଯୋଗୁଁ ଦୁନିଆରେ ଇନ୍ଧନ ସଙ୍କଟ ଦେଖାଦେଇଛି । ତେବେ ଚୀନର ଏହି ବୟାନ ସେତେବେଳେ ଆସିଛି, ଯେତେବେଳେ ଆମେରିକା ଶକ୍ତିଶାଳୀ ଦେଶଗୁଡ଼ିକୁ ଗୁରୁତ୍ଵପୂର୍ଣ୍ଣ ସମୁଦ୍ର ପଥ ହର୍ମୁଜ ଉପରେ କବଜା କରିବାକୁ ଅପିଲ୍ କରିଛି । ତେବେ ହର୍ମୁଜ ଦେଇ ଯେଉଁ ଯେଉଁ ଦେଶଗୁଡ଼ିକୁ ତେଲ ପହଞ୍ଚୁଛି, ସେମାନେ ଏହାର ସମାଧାନ ଲାଗି ଉପାୟ ଖୋଜନ୍ତୁ କହି ଟ୍ରମ୍ପ ହାତ ଝାଡ଼ି ଦେଇଛନ୍ତି ।

• ସିଧାସଳଖ ଆମେରିକା-ଇସ୍ରାଏଲକୁ ଟାର୍ଗେଟ୍

ଚୀନର ବୈଦେଶିକ ମନ୍ତ୍ରଣାଳୟ ଗୁରୁବାର ଆମେରିକା ଓ ଇସ୍ରାଏଲକୁ ଦାୟୀ କରିଛନ୍ତି । ମନ୍ତ୍ରଣାଳୟର ମୁଖପାତ୍ର ମାଓ ନିଙ୍ଗ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି, "ହର୍ମୁଜ ସାମୁଦ୍ରିକ ପଥ ଦେଇ ଆସୁଥିବା ଜାହାଜ ବାଧାପ୍ରାପ୍ତ ହେବା ପାଇଁ ଆମେରିକା ଓ ଇସ୍ରାଏଲ ଦାୟୀ । ଏହି ଦୁଇ ରାଷ୍ଟ୍ର ଇରାନକୁ ବେଆଇନ ଭାବେ ସୈନ୍ୟ ପଠାଇବା ପରେ ଏସବୁ ଆରମ୍ଭ ହୋଇଛି ।" ଏପରି କହି ପରୋକ୍ଷରେ ଚୀନ ଇରାନକୁ ସମର୍ଥନ କରୁଛି । ଅନ୍ୟପଟେ ସାରା ବିଶ୍ଵରେ ନିଜର ଲୋକପ୍ରିୟତା ହରାଉଥିବା ଟ୍ରମ୍ପ ଖୁବଶୀଘ୍ର ଏହି ଯୁଦ୍ଧ ଶେଷ ହେବ ବୋଲି କହିଛନ୍ତି । ଟ୍ରମ୍ପ ଏହା ମଧ୍ୟ କହିଛନ୍ତି ଯେ ଯୁଦ୍ଧ ସରିବା ପୂର୍ବରୁ ଇରାନ ଉପରେ ଜୋରଦାର ଆକ୍ରମଣ କରାଯିବ ।

ପଢନ୍ତୁ ଏହି ଖବର: ଯୁଦ୍ଧ ଭିତରେ ବନ୍ଧୁତା ପାଳୁଛି ଇରାନ; ହର୍ମୁଜ ପ୍ରଣାଳୀ ଦେଇ ଆସୁଛି ଭାରତୀୟ ଜାହାଜ

• ଇରାନୀ ତେଲର ସବୁଠୁ ବଡ଼ ଗ୍ରାହକ ଚୀନ

ଇରାନରୁ ଅଧିକ ତେଲ ଚୀନ କିଣିଥାଏ । ସେହି ତେଲ ଜାହାଜ ହର୍ମୁଜ ପ୍ରଣାଳୀ ଦେଇ ଚୀନରେ ପହଞ୍ଚିଥାଏ । ଏହି ସମୁଦ୍ର ପଥରେ ଜାହାଜକୁ ଅଟକାଇବା ଦ୍ଵାରା ସାରା ବିଶ୍ଵରେ ତେଲ ଦର ପ୍ରାୟ ୪୦ରୁ ୫୦ ପ୍ରତିଶତ ବଢିଛି । ଏହାଦ୍ଵାରା ବିଭିନ୍ନ ପ୍ରମୁଖ ଶିଳ୍ପ ଯେପରିକି ବିମାନ କ୍ଷେତ୍ର ପ୍ରଭାବିତ ହୋଇଛି । ଇନ୍ଧନ ଦର ବଢିବା ଯୋଗୁଁ ବିମାନ ଯାତ୍ରା ମଧ୍ୟ ମହଙ୍ଗା ହେଉଛି । ଗୋଟିଏ ପଟେ ଇନ୍ଧନ ଦର ବଢୁଥିବାବେଳେ ସେପଟେ ଯୁଦ୍ଧ ଆକାଶରୁ ବର୍ତ୍ତିବା ଲାଗି ବିମାନଗୁଡ଼ିକ ସେମାନଙ୍କ ସ୍ଵାଭାବିକ ରାସ୍ତାକୁ ପରିବର୍ତ୍ତନ କରୁଛନ୍ତି ।