CEO Romance Controversy / ପ୍ରେମ ସମ୍ପର୍କ ପାଇଁ ଗଲା CEO ପଦ; McDonaldsରୁ Nestle ଯାଏଁ, ବିବାଦରେ ଫସିଲେ ବଡ଼ ବଡ଼ କମ୍ପାନୀର ମୁଖିଆ

ନୂଆଦିଲ୍ଲୀ: କୋଟି କୋଟି ଟଙ୍କାର କମ୍ପାନୀ, ହଜାର ହଜାର କର୍ମଚାରୀ ଏବଂ କ୍ଷମତାଶାଳୀ ପଦବୀ । ହେଲେ ଗୋଟିଏ ବ୍ୟକ୍ତିଗତ ସମ୍ପର୍କ ପାଇଁ ହରାଇବାକୁ ପଡ଼ିଲା ନିଜର ପ୍ରତିଷ୍ଠା ଓ ପଦ । ବିଶ୍ୱର ଅନେକ ବଡ଼ ବଡ଼ କମ୍ପାନୀର CEO ନିଜର ବ୍ୟକ୍ତିଗତ ସମ୍ପର୍କ ଓ ବିବାଦକୁ ନେଇ ଚାକିରି ହରାଇଛନ୍ତି । ପରକୀୟା ପ୍ରୀତି ଯୋଗୁଁ ଚର୍ଚ୍ଚାକୁ ଆସି ପଦବୀ ହରାଇଛନ୍ତି । ମ୍ୟାକଡୋନାଲ୍ଡସ୍‌ଠାରୁ ନେସ୍‌ଲେ, BP ଏବଂ ଆଷ୍ଟ୍ରୋନୋମର ଭଳି କମ୍ପାନୀର ମୁଖ୍ୟମାନେ ମଧ୍ୟ ଏହି ବିବାଦରୁ ବର୍ତ୍ତିପାରିନାହାନ୍ତି । ଏବେ ଏହି ତାଲିକାରେ ସାମିଲ ହୋଇଛନ୍ତି ଏନଭିଡିଆ ସିଇଓ ଜେନସେନ ହୁଆଙ୍ଗ, ଯିଏକି ଜଣେ ଚୀନର ଗୁପ୍ତଚର ମହିଳାଙ୍କ ହନିଟ୍ରାପରେ ଫସିଥିଲେ ।

କର୍ପୋରେଟ୍ ଦୁନିଆରେ CEO ପଦ ଯେତିକି ସମ୍ମାନଜନକ, ସେତିକି ଦାୟିତ୍ୱପୂର୍ଣ୍ଣ ମଧ୍ୟ । କମ୍ପାନୀର ନୀତିନିୟମଠାରୁ ଆରମ୍ଭ କରି କର୍ମଚାରୀଙ୍କ ଆଚରଣ ପର୍ଯ୍ୟନ୍ତ ପ୍ରତ୍ୟେକ କ୍ଷେତ୍ରରେ ମୁଖିଆଙ୍କ ଆଚରଣ ଏକ ଉଦାହରଣ ହୋଇଥାଏ । କିନ୍ତୁ ଯେତେବେଳେ କମ୍ପାନୀର ମୁଖ୍ୟ ନିଜେ ବ୍ୟକ୍ତିଗତ ସମ୍ପର୍କ ଓ ବିବାଦରେ ଫସିଯାଆନ୍ତି, ସେତେବେଳେ ତାହାର ପ୍ରଭାବ ତାଙ୍କ ପଦବୀ ଉପରେ ପଡ଼ିଥାଏ ।

• McDonald’sର ପୂର୍ବ ସିଇଓ ଷ୍ଟିଭ୍

ଏହି ତାଲିକାରେ ପ୍ରଥମେ ଆସୁଛି, ଫାଷ୍ଟଫୁଡ୍ ଜଗତର ଏହି ବଡ଼ କମ୍ପାନୀର ପୂର୍ବତନ CEO ଷ୍ଟିଭ୍ ଇଷ୍ଟରବ୍ରୁକ୍‌ଙ୍କୁ ୨୦୧୯ ନଭେମ୍ବରରେ ପଦରୁ ହଟାଇ ଦିଆଯାଇଥିଲା । କମ୍ପାନୀର ଜଣେ କର୍ମଚାରୀଙ୍କ ସହ ତାଙ୍କର ପାରସ୍ପରିକ ସହମତିରେ ବ୍ୟକ୍ତିଗତ ସମ୍ପର୍କ ଥିବା ଜଣାପଡ଼ିଥିଲା । ଯାହା କମ୍ପାନୀର ନୀତି ବିରୋଧୀ ଥିଲା । ପରବର୍ତ୍ତୀ ତଦନ୍ତରେ ଅନ୍ୟ କର୍ମଚାରୀଙ୍କ ସହ ସମ୍ପର୍କ ଏବଂ ତଥ୍ୟ ଲୁଚାଇବା ଭଳି ଅଭିଯୋଗ ମଧ୍ୟ ସାମ୍ନାକୁ ଆସିଥିଲା । ୨୦୨୩ରେ ଆମେରିକାର SEC ମଧ୍ୟ ଏହି ମାମଲାରେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇଥିଲା ।

• BPର ପୂର୍ବତନ CEO ବର୍ଣ୍ଣାର୍ଡ ଲୁନି

ବ୍ରିଟିଶ୍ ଏନର୍ଜି କମ୍ପାନୀ BPର ପୂର୍ବତନ CEO ବର୍ଣ୍ଣାର୍ଡ ଲୁନିଙ୍କୁ ମଧ୍ୟ ନିଜର ବ୍ୟକ୍ତିଗତ ସମ୍ପର୍କ ପାଇଁ ପଦ ହରାଇବାକୁ ପଡ଼ିଥିଲା । ୨୦୨୩ ସେପ୍ଟେମ୍ବରରେ ସେ ସିଇଓ ପଦରୁ ଇସ୍ତଫା ଦେଇଥିଲେ । କମ୍ପାନୀର ବୋର୍ଡ ଜାଣିବାକୁ ପାଇଥିଲା ଯେ ସେ ନିଜର ପୂର୍ବ ସମ୍ପର୍କ ବିଷୟରେ ସମ୍ପୂର୍ଣ୍ଣ ତଥ୍ୟ ଦେଇନଥିଲେ । ପରେ ଡିସେମ୍ବର ୨୦୨୩ରେ ଗୁରୁତର ଅସଦାଚରଣ ଅଭିଯୋଗରେ ତାଙ୍କୁ ବିନା ନୋଟିସ୍‌ରେ ବରଖାସ୍ତ କରାଯାଇଥିଲା ।

• Nestle ପୂର୍ବତନ ସିଇଓ ଲରେଣ୍ଟ

ନେସ୍‌ଲେର ପୂର୍ବତନ CEO ଲରେଣ୍ଟ ଫ୍ରେକ୍ସଙ୍କ ନାଁ । ୨୦୨୫ ସେପ୍ଟେମ୍ବରରେ ନେସ୍‌ଲେ ତାଙ୍କୁ ପଦରୁ ବରଖାସ୍ତ କରିଥିଲା । କମ୍ପାନୀର ତଦନ୍ତରୁ ଜଣାପଡ଼ିଥିଲା ଯେ ତାଙ୍କର ଜଣେ ମହିଳା ସହକର୍ମୀଙ୍କ ସହ ବ୍ୟକ୍ତିଗତ ସମ୍ପର୍କ ଥିଲା ଏବଂ ସେ ଏହି ସମ୍ପର୍କ ବିଷୟରେ କମ୍ପାନୀକୁ ଜଣାଇନଥିଲେ । ଏହାକୁ କମ୍ପାନୀର ବ୍ୟବସାୟିକ ଆଚରଣ ସଂହିତାର ଉଲ୍ଲଂଘନ ବୋଲି ବିବେଚନା କରାଯାଇଥିଲା । ପରେ ଫିଲିପ୍ ନଭାରାଟିଲ୍‌ଙ୍କୁ ନୂଆ CEO ଭାବେ ନିଯୁକ୍ତ କରାଯାଇଥିଲା ।

• Astronomerର ପୂର୍ବତନ ସିଇଓ ଆଣ୍ଡି

ଏହି ତାଲିକାରେ ଆଉ ଏକ ଚର୍ଚ୍ଚିତ ନାଁ ହେଉଛି ଟେକ୍ନୋଲୋଜି କମ୍ପାନୀ ଆଷ୍ଟ୍ରୋନୋମରର ପୂର୍ବତନ CEO ଆଣ୍ଡି ବାୟରନ୍ । ୨୦୨୫ ଜୁଲାଇରେ କୋଲ୍ଡପ୍ଲେ କନସର୍ଟ ସମୟରେ କମ୍ପାନୀର ଚିଫ୍ ପିପୁଲ୍ ଅଫିସର୍ କ୍ରିଷ୍ଟିନ୍ କାବୋଟ୍‌ଙ୍କ ସହ ତାଙ୍କର ଏକ ଭିଡିଓ ଭାଇରାଲ୍ ହୋଇଥିଲା । ଭିଡିଓରେ ଉଭୟଙ୍କୁ ପରସ୍ପରକୁ ଆଲିଙ୍ଗନ କରୁଥିବା ଦେଖାଯାଇଥିଲା । ଏହାକୁ ନେଇ ସୋସିଆଲ୍ ମିଡିଆରେ ଜୋରଦାର ଚର୍ଚ୍ଚା ହୋଇଥିଲା । କମ୍ପାନୀ ତଦନ୍ତ ଆରମ୍ଭ କରିବା ପରେ ବାୟରନ୍‌ଙ୍କୁ ଛୁଟିରେ ପଠାଯାଇଥିଲା ଏବଂ ପରେ ସେ ଇସ୍ତଫା ଦେଇଥିଲେ ।

ପଢନ୍ତୁ ଏହି ଖବର: ହନିଟ୍ରାପ୍ ବିବାଦ ପରେ nVIDIAର CEO ପଦରୁ ଜେନସେନ ହୁଆଙ୍ଗଙ୍କ ଇସ୍ତଫା

• ଏବେ ଚର୍ଚ୍ଚାରେ Nvidia ସିଇଓ ଜେନସେନ୍

ତେବେ ଏହି ତାଲିକାରେ ନୂଆ ଚର୍ଚ୍ଚାର ବିଷୟ ହୋଇଛି Nvidia । ଆମେରିକାର ଏହି ଚର୍ଚ୍ଚିତ ଚିପ୍ ନିର୍ମାତା କମ୍ପାନୀର CEO ଜେନସେନ୍ ହୁଆଙ୍ଗ୍ ୧୨ ନଭେମ୍ବର ୨୦୨୬ରେ ନିଜ ପଦରୁ ଇସ୍ତଫା ଦେଇଥିବା କୁହାଯାଉଛି । ସେ ଜଣେ ଚୀନ ମହିଳାଙ୍କ ସହ ସମ୍ପର୍କରେ ଥିଲେ, ଯିଏକି ପରବର୍ତ୍ତୀ ସମୟରେ ଚୀନର ଗୁପ୍ତଚର ମହିଳା ବୋଲି ଜଣାପଡ଼ିଥିଲା । ଏହାପରେ ଆମେରିକାର ଜାତୀୟ ସୁରକ୍ଷା ସମ୍ପର୍କିତ ପ୍ରଶ୍ନ ଉଠିଥିଲା । ଚୀନ୍ ଏହି ଗୁପ୍ତଚରୀ ଅଭିଯୋଗକୁ ଖାରଜ କରିଛି । ଜେନସେନ୍ ପୂର୍ବରୁ ବିବାହିତ ଥିବାବେଳେ ସେ ଚୀନ ମହିଳାଙ୍କ ସହ ସମ୍ପର୍କରେ ଥିଲେ ।