No War Training / ଯୁଦ୍ଧ ପାଇଁ ପ୍ରଶିକ୍ଷଣ ନିଅନ୍ତି ନାହିଁ ଏହି ଦେଶର ଯବାନ; ନାହିଁ ଟ୍ୟାଙ୍କ ଓ ଯୁଦ୍ଧ ବିମାନ

ନୂଆଦିଲ୍ଲୀ: ସେନା କହିଲେ ମନକୁ ଆସେ ସୀମା ସୁରକ୍ଷା ଓ ଯୁଦ୍ଧ ଲଢ଼ିବା କଥା । କିନ୍ତୁ ମେକ୍ସିକୋର କାହାଣୀ ପୂରା ଭିନ୍ନ । ପ୍ରାୟ ୧୩ କୋଟି ଜନସଂଖ୍ୟା ବିଶିଷ୍ଟ ଏହି ଦେଶର ସେନା ପାଖରେ ଶତ୍ରୁ ସହ ଲଢ଼ିବାକୁ ନା ଅଛି ଟ୍ୟାଙ୍କ ନା ଆକାଶ ମାର୍ଗରୁ ସୁରକ୍ଷା ଲାଗି ଅତ୍ୟାଧୁନିକ ଯୁଦ୍ଧ ବିମାନ ।

ଆଶ୍ଚର୍ଯ୍ୟର କଥା ହେଉଛି ୧୯୮୨ରେ ମେକ୍ସିକୋ, ଆମେରିକା ଠାରୁ ୧୨ଟି ସୁପରସୋନିକ ବିମାନ କିଣିଥିଲା । ସେଥିରୁ ଆଜି ୩ଟି ଉଡ଼ାଣ କରିବାର ସ୍ଥିତିରେ ରହିଛି । ବିଗତ ୫୦ ମଧ୍ୟରେ ମେକ୍ସିକୋ ଗୋଟିଏ ବି ନୂଆ ଯୁଦ୍ଧ ବିମାନ କିଣିନାହିଁ । ଯେତେବେଳେ କି ମେକ୍ସିକୋର ପଡ଼ୋଶୀ ବ୍ରାଜିଲ୍ ଓ ଚିନି ରଖିଛନ୍ତି ଏକାଧିକ ଯୁଦ୍ଧ ବିମାନ ।

ଏଥିସହ ପଢ଼ନ୍ତୁ: କେଉଁ ଦେଶରେ ଏବଂ କାହିଁକି ଆମର ସୈନିକମାନଙ୍କୁ ନିୟୋଜିତ କରାଯାଇଛି

ଯୁଦ୍ଧ ପାଇଁ ପ୍ରସ୍ତୁତ ନ ହେବାର ଇତିହାସ

ମେକ୍ସିକୋ ସେନା ପାରମ୍ପରିକ ଯୁଦ୍ଧ ଲାଗି ପ୍ରସ୍ତୁତ ନ ହେବା ପଛରେ ରହିଛି ବିଶେଷ ରଣନୀତି ଓ ଇତିହାସ । ମେକ୍ସିକୋ ଅନୁସାରେ, ତାର ପଡ଼ୋଶୀରେ କେହି ଏଭଳି ଶତ୍ରୁ କିମ୍ବା ବିପଦ ନାହିଁ । ଗୋଟିଏ ପଟେ ଦୁନିଆର ମହାଶକ୍ତି ଆମେରିକା, ଯାହା ସହ ମେକ୍ସିକୋ ଲଢ଼ି ପାରିବ ନାହିଁ । ଅନ୍ୟପଟେ ଗୁଏତମାଳା ଭଳି ଛୋଟ ଦେଶ ପକ୍ଷରୁ କୌଣସି ବିପଦ ନାହିଁ ।

ଏହି କାରଣ ପାଇଁ ମେକ୍ସିକୋ ତାର ସେନାକୁ ଘାତକ ଅସ୍ତ୍ରଶସ୍ତ୍ର ବଦଳରେ ଅନ୍ତରୀଣ ବ୍ୟବସ୍ଥା ଓ ଡ୍ରଗ୍ସ ମାଫିଆଙ୍କ ଠାରୁ ବର୍ତ୍ତିବା ଲାଗି ଏକ ସୁରକ୍ଷା ବଳ ଭାବେ ବ୍ୟବହାର କରୁଛି ।

କ'ଣ କହୁଛନ୍ତି ବିଶେଷଜ୍ଞ ?

ତେବେ ବିଶେଷଜ୍ଞଙ୍କ ମତ ହେଉଛି ଟିକିଏ ଭିନ୍ନ । ସୁରକ୍ଷା ବିଶେଷଜ୍ଞଙ୍କ ଅନୁସାରେ, ମେକ୍ସିକୋର ସରକାର ଜାଣିଶୁଣି ସେନାକୁ ଅସ୍ତ୍ରଶସ୍ତ୍ର ଠାରୁ ଦୂରେଇ ରଖୁଛନ୍ତି । ଯେତେବେଳେ କି ଲାଟିନ୍ ଆମେରିକାର ଇତିହାସରେ ସୈନ୍ୟ ସରକାର ବଦଳାଇ ଦେବାର ଅନେକ ଘଟଣା ଘଟିଛି ।

ମେକ୍ସିକୋ ଲୋକ ସେଠାକାର ସେନାକୁ ସମ୍ମାନ ଦେଇଥାନ୍ତି । ସେଠାକାର ଲୋକ ସେନା କିମ୍ବା ନୌସେନାର ଅଂଶ ହେବା ନେଇ ଗର୍ବ ଅନୁଭବ କରିଥାନ୍ତି । ସେମାନଙ୍କ ଅନୁସାରେ, ସେନା କେବଳ ସୀମାରେ ନୁହେଁ ବରଂ ସଡ଼କରେ ପୋଲିସ ସହ ମିଶି କାମ କରେ ।

କିନ୍ତୁ ମେକ୍ସିକୋର ଏହି ବ୍ୟବସ୍ଥା ଭିତରେ ପ୍ରଭେଦ ରହିଛି । ସେନା ଭିତରେ ରହିଛି ଧନୀ ଓ ଗରିବର ରେଖା । ଯେଉଁଠି ସେନାର ଉଚ୍ଚ ଅଧିକାରୀ ବିଦେଶରେ ଟ୍ରେନିଂ ନିଅନ୍ତି । ସେଠି ସ୍ଥଳ ସୈନିକ କମ୍ ସମ୍ବଳ ଓ ପୁରୁଣା ଟ୍ରେନିଂକୁ ଭରସା କରି ନିଶା ମାଫିଆଙ୍କ ସହ ଲଢ଼ନ୍ତି ।

ଏଥିସହ ପଢ଼ନ୍ତୁ: ୟୁକ୍ରେନ୍‌ର 'ରୋବୋଟ ଆର୍ମି' ଆଗରେ ହାର୍ ମାନିଲା ଋଷ; ଜେଲେନସ୍କିଙ୍କ ବଡ଼ ଦାବି

୨୦୦୬ରେ ମେକ୍ସିକୋରେ ନିଶା ଦ୍ରବ୍ୟ ବିରୋଧରେ ଏକ ଆକ୍ରମଣାତ୍ମକ ଯୁଦ୍ଧ ଆରମ୍ଭ ହୋଇଥିଲା । ସେତେବେଳେ ସରକାର ସେନାକୁ ସଡ଼କକୁ ଓହ୍ଲାଇଥିଲେ । ହେଲେ ଫଳ ଓଲଟା ହୋଇଥିଲା । ବିବିସି ଅନୁସାରେ, ସେତେବେଳେ ହତ୍ୟା ମାମଲା ୨୦୦ ପ୍ରତିଶତ ବଢ଼ିବା ସହ ନିଶା ମାଫିଆ ଆହୁରି ଶକ୍ତିଶାଲୀ ହୋଇ ଉଠିଥିଲେ ।

ନିକଟରେ ସେନାର ଏକ ସ୍ଵତନ୍ତ୍ର ୟୁନିଟ୍ ମେକ୍ସିକୋର ଡ୍ରଗ୍ସ କିଙ୍ଗ କୁହାଯାଉଥିବା ଅଲ୍ ମିଞ୍ଚୋକୁ ନିହତ କରିଥିଲା । ଅଲ୍ ମିଞ୍ଚୋଙ୍କ ନିହତ ପରେ ମାଫିଆ ୨୦ ରାଜ୍ୟରେ ହିଂସା ସହ ଗୁଳିଗୋଳା ବର୍ଷଣ କରି ସେନାକୁ ଘେରିଥିଲେ । ଯାହା ଦର୍ଶାଉଛି ଅତ୍ୟାଧୁନିକ ଅସ୍ତ୍ରଶସ୍ତ୍ର ଓ ଗୁଇନ୍ଦା ସୂଚନା ବିନା ସେନା ଦେଶ ଭିତରେ ଶତ୍ରୁକୁ କାବୁ କରିବା କଷ୍ଟକର ।