Argus News - ମଧ୍ୟପ୍ରାଚ୍ୟରେ ହୋଇପାରେ ୪୫ ଦିନିଆ ଅସ୍ତ୍ରବିରତି; ଚାଲିଛି ଆଲୋଚନା

ମଧ୍ୟପ୍ରାଚ୍ୟରେ ଜାରି ରହିଥିବା ଯୁଦ୍ଧ ଇତିମଧ୍ୟରେ ୩୩ ଦିନରେ ପହଞ୍ଚିଛି । ଗୋଟିଏ ପଟେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଧମକ ଦେଉଥିବାବେଳେ ସେପଟେ ଇରାନ ଏହାର କଡ଼ା ଜବାବ ଦେଉଛି । ଫଳରେ ଯୁଦ୍ଧ ଭୟଙ୍କର ରୂପ ନେଉଛି । ସେପଟେ ଟ୍ରମ୍ପ ଇରାନକୁ ମଙ୍ଗଳବାର ପର୍ଯ୍ୟନ୍ତ ଅଲ୍ଟିମେଟ୍ ଦେଇଛନ୍ତି । ଯଦି ତେହରାନ ଗୁରୁତ୍ଵପୂର୍ଣ୍ଣ ସାମୁଦ୍ରିକ ପଥ ହର୍ମୁଜ୍ ଷ୍ଟ୍ରେଟକୁ ନଖୋଲେ, ତେବେ ଆମେରିକା ପରିସ୍ଥିତି ଭୟାବହ ହେବ ବୋଲି ଟ୍ରମ୍ପ ଧମକ ଦେଇଛନ୍ତି । ଏହାରି ମଧ୍ୟରେ ଏକ ବଡ଼ ରିପୋର୍ଟ ସାମ୍ନାକୁ ଆସିଛି । ମଧ୍ୟପ୍ରାଚ୍ୟରେ ହେଉଥିବା ଯୁଦ୍ଧରେ ୪୫ ଦିନିଆ ଅସ୍ତ୍ରବିରତି ନେଇ ଆଲୋଚନା ଜାରି ରହିଛି । ତେବେ ଆସନ୍ତା ୪୮ ଘଣ୍ଟା ମଧ୍ୟରେ ବୁଝାମଣା ହୋଇପାରେ ବୋଲି କୁହାଯାଉଛି ।

• ଅସ୍ତ୍ରବିରତି ନେଇ କଣ ଆଲୋଚନା ହେଲା ?

ଏକ୍ସିୟୋସର ଏକ ରିପୋର୍ଟରେ କୁହାଯାଉଛି ଯେ ଦୁଇଟି ପର୍ଯ୍ୟାୟରେ ସର୍ତ୍ତାବଳୀ ଉପରେ ଆଲୋଚନା ହେଉଛି । ପ୍ରଥମ ପର୍ଯ୍ୟାୟରେ ୪୫ ଦିନିଆ ସମ୍ଭାବିତ ଅସ୍ତ୍ରବିରତି ଉପରେ ଦୁଇ ପକ୍ଷ ମଧ୍ୟରେ କଥାବାର୍ତ୍ତା ହେଉଛି । ଦ୍ଵିତୀୟ ପର୍ଯ୍ୟାୟରେ ଯୁଦ୍ଧ ଉପରେ ସମ୍ପୂର୍ଣ୍ଣ ବିରାମ ଲଗାଯିବା ଉପରେ ଆଲୋଚନା ହେବ । ଯଦି ଦୁଇ ପକ୍ଷ ମଧ୍ୟରେ ବୁଝାମଣା ପାଇଁ ଅଧିକ ସମୟ ଲାଗିବ, ତେବେ ଅସ୍ତ୍ରବିରତି ସମୟ ସୀମାକୁ ବୃଦ୍ଧି କରାଯିବ । ସେପଟେ ହର୍ମୁଜ ପ୍ରଣାଳୀକୁ ଖୋଲିବା ଲାଗି ଟ୍ରମ୍ପ ଇରାନ ଉପରେ ଚାପ ପକାଉଛନ୍ତି । ଯଦି ହର୍ମୁଜ୍ ନ ଖୋଲାଯାଏ, ତେବେ ଇରାନର ପ୍ରମୁଖ ଭିତ୍ତିଭୂମି ଉପରେ ଆକ୍ରମଣ କରାଯିବା ନେଇ ଟ୍ରମ୍ପ ଧମକ ଦେଇଛନ୍ତି ।

• ଅସ୍ତ୍ରବିରତି ପାଇଁ ପାକିସ୍ତାନ କରୁଛି ମଧ୍ୟସ୍ଥତା

ରିପୋର୍ଟରେ କୁହାଯାଉଛି ଯେ, ପାକିସ୍ତାନ, ମିଶରୀୟ ଓ ତୁର୍କୀ ମଧ୍ୟସ୍ଥିଙ୍କ ଜରିଆରେ ଇରାନ ଓ ଆମେରିକା ଯୁଦ୍ଧ ଉପରେ ବିରାମ ଲଗାଇବା ଲାଗି କଥାବାର୍ତ୍ତା ହେଉଛି । ସେପଟେ ଟ୍ରମ୍ପଙ୍କ ରାଷ୍ଟ୍ରଦୂତ ଷ୍ଟିଭ ୱିଚକାଫ୍ ଓ ଇରାନର ବୈଦେଶିକ ମନ୍ତ୍ରୀ ଅବ୍ବାସ ଅରାଘଚିଙ୍କ ମଧ୍ୟରେ ମେସେଜ ଜରିଆରେ ବାର୍ତ୍ତାଳାପ ହେଉଛି । ଆମେରିକାର ଜଣେ ଅଧିକାରୀ କହିଛନ୍ତି ଯେ ଟ୍ରମ୍ପ ପ୍ରଶାସନ ଯୁଦ୍ଧ ଭିତରେ ଇରାନକୁ ଅନେକ ପ୍ରସ୍ତାବ ଦେଇଛନ୍ତି, ହେଲେ ଇରାନ ତାହାକୁ ସ୍ଵୀକାର କରିନାହିଁ ।

ପଢନ୍ତୁ ଏହି ଖବର: ଟ୍ରମ୍ପ ପୁଣି ଦେଲେ ଇରାନକୁ ଅଲ୍ଟିମେଟମ୍; 'ମଙ୍ଗଳବାର ଯାହା ହେବ ଭାବି ପାରିବନି'

• ହର୍ମୁଜ୍ ନେଇ ଘନଉଛି ସ୍ଥିତି

ଇରାନର ରିଭୋଲ୍ୟୁସନାରୀ ରବିବାର ହର୍ମୁଜକୁ ନେଇ ଆମେରିକା ଓ ଇସ୍ରାଏଲକୁ କଡ଼ା ଚେତାବନୀ ଦେଇଛି । ଯଦି ହର୍ମୁଜ୍ ନିକଟରେ ନୂଆ ସୁରକ୍ଷା ବ୍ୟବସ୍ଥା ଜାରି ରହିବ, ତେବେ ଏହି ବିଶ୍ଵର ଏହି ଗୁରୁତ୍ଵପୂର୍ଣ୍ଣ ସାମୁଦ୍ରିକ ପଥ ପୂର୍ବ ପରି ରହିବ ନାହିଁ । ସେପଟେ ଆମେରିକା ରାଷ୍ଟ୍ରପତି ଟ୍ରମ୍ପ ପାଲଟା ଜବାବ ଦେଇ କହିଛନ୍ତି ଯେ, ଯଦି ଇରାନ ଶୀଘ୍ର ହର୍ମୁଜ୍ ରାସ୍ତା ଖୋଲୁନାହିଁ ତେବେ ଇରାନର ପାୱାର ପ୍ଲାଣ୍ଟ ଓ ପୋଲଗୁଡ଼ିକୁ ଟାର୍ଗେଟ କରାଯିବ । ଏଠାରେ କହିରଖୁଛୁ କି, ଯୁଦ୍ଧ ଯୋଗୁଁ ଇରାନ ହର୍ମୁଜ୍ ପ୍ରଣାଳୀକୁ ବନ୍ଦ କରିଦେଇଛି, ଯାହାଦ୍ଵାରା ବିଶ୍ଵବ୍ୟାପୀ ତୈଳ ବଜାର ପ୍ରଭାବିତ ହୋଇଛି । ହୁ ହୁ ହୋଇ ତେଲ ଦର ବଢିଯାଇଥିବାରୁ ସାଧାରଣ ଲୋକେ ମହଙ୍ଗା ମାଡ଼ର ଶିକାର ହୋଇଛନ୍ତି । ଏହାସହିତ ପୂରା ବିଶ୍ଵର ଅର୍ଥବ୍ୟବସ୍ଥା ଉପରେ ମଧ୍ୟ ଗଭୀର ପ୍ରଭାବ ପଡ଼ିଛି ।