Indian Death / ମଧ୍ୟପ୍ରାଚ୍ୟରେ ଘନଉଛି ଯୁଦ୍ଧ; ଅକାଳରେ ଚାଲିଗଲା ଭାରତୀୟଙ୍କ ଜୀବନ

ପଶ୍ଚିମ ଏସିଆରେ ବଢୁଛି ଅଶାନ୍ତି । ଚାଲିଛି ଘନ ଘନ ଆକ୍ରମଣ । କୁଏତ, ଲେବନାନ ଓ ଇସ୍ରାଏଲ ମଧ୍ୟରେ ବଢୁଥିବା ଘଟଣାବଳୀ ଏହାର ସଙ୍କେତ ଦେଉଛି । ଏହି ସଂଘର୍ଷରେ ସାଧାରଣ ଲୋକଙ୍କ ଜୀବନ ଯାଉଥିବାବେଳେ ବିଦେଶୀ କର୍ମଚାରୀଙ୍କ ମଧ୍ୟ ଅକଳାରେ ମୃତ୍ୟୁ ଘଟୁଛି । ଏହାରି ମଧ୍ୟରେ ଇରାନ କୁଏତର ଏକ ପାୱାର ପ୍ଲାଣ୍ଟ ଉପରେ ଆକ୍ରମଣ କରିଛି, ଯେଉଁଥିରେ ଜଣେ ଭାରତୀୟ କର୍ମଚାରୀଙ୍କ ମୃତ୍ୟୁ ଘଟିଛି ।

କୁଏତର ବିଦ୍ୟୁତ୍, ଜଳ ଏବଂ ନବୀକରଣୀୟ ଶକ୍ତି ମନ୍ତ୍ରଣାଳୟ ସୋମବାର ଦିନ କହିଛି ଯେ ରବିବାର ସନ୍ଧ୍ୟାରେ ହୋଇଥିବା ଏହି ଆକ୍ରମଣ ଏକ ପ୍ରମୁଖ ବିଦ୍ୟୁତ୍ ଏବଂ ଜଳ ଡିସାଲିନେସନ୍ ପ୍ଲାଣ୍ଟର ସେବା ଭବନକୁ ଟାର୍ଗେଟ କରିଥିଲା । ସେଠାରେ କାର୍ଯ୍ୟରତ ଜଣେ ଭାରତୀୟ କର୍ମଚାରୀଙ୍କ ମୃତ୍ୟୁ ହୋଇଥିଲା ଏବଂ କୋଠାଟି ଗୁରୁତର ଭାବରେ କ୍ଷତିଗ୍ରସ୍ତ ହୋଇଥିଲା ।

• ଘଟଣାସ୍ଥଳରେ ଜରୁରୀକାଳୀନ ଦଳ

ମନ୍ତ୍ରଣାଳୟର ଜଣେ ମୁଖପାତ୍ର କହିଛନ୍ତି, "ଏହି ଆକ୍ରମଣ କୁଏତ ବିରୁଦ୍ଧରେ ଇରାନର ଆକ୍ରମଣର ଏକ ଅଂଶ ଥିଲା । ଆକ୍ରମଣ ପରେ ତୁରନ୍ତ ଘଟଣାସ୍ଥଳରେ ବୈଷୟିକ ଏବଂ ଜରୁରୀକାଳୀନ ଦଳଗୁଡ଼ିକୁ ପଠାଯାଇଥିଲା । ଏହାପରେ ପରିସ୍ଥିତି ପରିଚାଳନା କରିବା ଏବଂ ପ୍ଲାଣ୍ଟକୁ କାର୍ଯ୍ୟକ୍ଷମ ରଖିବା ପାଇଁ କାର୍ଯ୍ୟ ଆରମ୍ଭ କରାଯାଇଥିଲା । ପ୍ରଭାବିତ ଅଞ୍ଚଳକୁ ସୁରକ୍ଷିତ ରଖିବା ଏବଂ ଅତ୍ୟାବଶ୍ୟକୀୟ ସେବାଗୁଡ଼ିକର ଜାରି ରଖିବା ସୁନିଶ୍ଚିତ କରିବା ଉପରେ କାର୍ଯ୍ୟ ହେଉଛି ।" ଅନ୍ୟପଟେ କୁଏତ ସରକାର ଜନସାଧାରଣଙ୍କୁ ଶାନ୍ତି ବଜାୟ ରଖିବାକୁ ଏବଂ ଗୁଜବରୁ ଦୂରେଇ ରହିବାକୁ ନିବେଦନ କରିଛନ୍ତି ।

ପଢନ୍ତୁ ଏହି ଖବର: ଇରାନ ବିରୋଧରେ ଗ୍ରାଉଣ୍ଡ ଅପରେସନ୍ ପାଇଁ ଆମେରିକାର ରଣନୀତି

• ଲେବାନନରେ ବଢୁଛି ଉତ୍ତେଜନା

ଏପଟେ ଲେବାନନରେ ବି ବଢୁଛି ଉତ୍ତେଜନା । ଦକ୍ଷିଣ ଲେବାନନର ଆଡଚିଟ୍ ଅଲ୍-କୁସାୟର ଅଞ୍ଚଳରେ ଥିବା ଜାତିସଂଘ ଶାନ୍ତିରକ୍ଷା ମିଶନ (UNIFIL) ଘାଟିରେ ଏକ କ୍ଷେପଣାସ୍ତ୍ର ମାଡ଼ ଯୋଗୁଁ ଜଣେ ଶାନ୍ତିରକ୍ଷୀଙ୍କ ମୃତ୍ୟୁ ହୋଇଛି ଏବଂ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି । ସେପଟେ ଇସ୍ରାଏଲ ସେନା IDF ଦାବି କରିଛି ଯେ ଦକ୍ଷିଣ ଲେବାନନରେ ଅନେକ ହିଜବୋଲା ଲଢ଼ୁଆଙ୍କୁ ହତ୍ୟା କରାଯାଇଛି, ଯେଉଁମାନେ ଇସ୍ରାଏଲୀ ସୈନ୍ୟଙ୍କ ଉପରେ ଆକ୍ରମଣ କରିବାକୁ ପ୍ରସ୍ତୁତ ହେଉଥିଲେ ।