Tunnel Workers Rescue / ଏବେ ବି ସରିନି ଜୀବନର ଆଶା; ନେପାଳ ପ୍ରଳୟଙ୍କରୀ ବନ୍ୟାର ୯ ଦିନ ପରେ ଚମତ୍କାର

କାଠମାଣ୍ଡୁ: ନେପାଳରେ ଏବେ ବି ସରିନି ଜୀବନର ଆଶା । ପ୍ରଳୟଙ୍କରୀ ବନ୍ୟାର ୯ ଦିନ ପରେ ଚମତ୍କାର ଘଟିଛି । ସୁଡଙ୍ଗ ଭିତରୁ ଉଦ୍ଧାର ହୋଇଛନ୍ତି ଦୁଇ ଜଣ ଶ୍ରମିକ । ସେମାନେ ହେଉଛନ୍ତି ହାଇଡ୍ରୋ ପାଓ୍ବାରର କର୍ମଚାରୀ । ଅଗଷ୍ଟ ୨୬ରେ ଭୟଙ୍କର ବନ୍ୟା ପରେ ସେମାନେ ପୋତି ହୋଇଯାଇଥିଲେ । ତେବେ ଆଜି ଉଦ୍ଧାର କାର୍ଯ୍ୟ ବେଳେ ମାଟି ତଳୁ ଦୁଇ ଶ୍ରମିକଙ୍କୁ ଉଦ୍ଧାର କରିଛନ୍ତି ଉଦ୍ଧାରକାରୀ ଟିମ୍ । ୯ ଦିନ ପରେ ମାଟି ତଳୁ ଜୀବନ ମିଳିଥିବା ଖବର ଆସିବା ପରେ ସମସ୍ତେ ଚକିତ ହୋଇପଡ଼ିଛନ୍ତି ।

• 'ରଖେ ହରି ତ ମାରେ କିଏ'

ନେପାଳର ବିଭିନ୍ନ ସୁଡଙ୍ଗରେ ୯୦୦ରୁ ଅଧିକ ଶ୍ରମିକ ନିଖୋଜ ଅଛନ୍ତି । ତ୍ରିଶୂଳି ହାଇଡ୍ରୋପାଓ୍ବାର ପ୍ରୋଜକ୍ଟରେ କାମ କରୁଥିବା କବିର ମହାର୍ଜନ ଓ ସଞ୍ଜୟ ଶାହଙ୍କୁ ଉଦ୍ଧାର କରାଯାଇଛି । ସଞ୍ଜୟ ଶାହ ମେକାନିକାଲ ଫୋରମ୍ୟାନ ଭାବେ କାମ କରୁଥିବା ବେଳେ ମହାର୍ଜନ ସୁପରଭାଇଜର ଅଛନ୍ତି । ସେମାନଙ୍କ ହାତ ଓ ଗୋଡରେ କ୍ଷତ ହୋଇଛି । ସମ୍ଭବତଃ ସୁଡଙ୍ଗରୁ ଘୁଷୁରି ଘୁଷୁରି ବାହାରିବାକୁ ଉଦ୍ୟମ କରୁଥିବା ବେଳେ ସେମାନେ ଆହତ ହୋଇଥିବା ଅନୁମାନ କରାଯାଉଛି ।

• ମାଟି ତଳୁ ଶୁଭିଥିଲା ସ୍ଵର

ରସୁଭା ଜିଲ୍ଲା ତ୍ରିଶୂଳି-୩ଏ ହାଇଡ୍ରୋପାୱାର ପ୍ରୋଜେକ୍ଟର ସୁଡ଼ଙ୍ଗ ନିକଟରେ ଉଦ୍ଧାର କାର୍ଯ୍ୟ ଜାରି ଥିଲା । ହଠାତ୍ ମାଟି ତଳୁ ଶୁଭିଥିଲା ମଣିଷ ସ୍ଵର । ଏହାପରେ ଟିମ ସେମାନଙ୍କୁ ତୁରନ୍ତ ସାନ୍ତ୍ଵନା ଦେଇଥିଲା । ଭୟ କରିବାର ଆବଶ୍ୟକ ନାହିଁ ବୋଲି କହିଲା ପରେ ମାଟି ତଳୁ ଜବାବ ଆସିଥିଲା "ଠିକ୍ ଅଛି" । ମାଟି ତଳେ ଏବେ ବି ଜୀବନ ବଞ୍ଚିଥିବା ଅନୁଭବ କରିବା ପରେ ଉଦ୍ଧାରକାରୀ ଟିମ୍ ଅତି ସାବଧାନତାର ସହ ଉଦ୍ଧାର କାର୍ଯ୍ୟକୁ ଆଗକୁ ବଢାଇଥିଲା । ଏହାପରେ ନେପାଳୀ ସେନା ଓ ସଶସ୍ତ୍ର ପୋଲିସ ବଳ ସେମାନଙ୍କୁ ସୁରକ୍ଷିତ ଭାବେ ମାଟି ତଳୁ ବାହାର କରିଥିଲେ ।

ପଢନ୍ତୁ ଏହି ଖବର: ମିଳୁନାହିଁ ପାର୍ଥିବ ଶରୀର; ଘାସ ତିଆରି ପ୍ରତିମୂର୍ତ୍ତିର ଅନ୍ତିମ ସଂସ୍କାର କରୁଛନ୍ତି ପରିଜନ

• ବନ୍ୟାରେ ତ୍ରିଶୂଳି ଘାଟିରେ ବଡ଼ କ୍ଷତି

ଅଗଷ୍ଟ ୨୬ ତାରିଖରେ ହଠାତ୍ ପ୍ରଳୟଙ୍କାରୀ ବନ୍ୟା ଆସିବା ପରେ ନେପାଳର ତ୍ରିଶୂଳ ନଦୀକୂଳରେ ବ୍ୟାପକ କ୍ଷୟକ୍ଷତି ହୋଇଛି । ବନ୍ୟାରେ ହାଇଡ୍ରୋପାୱାର ପ୍ରକଳ୍ପ ବ୍ୟତୀତ ଅନେକ ଗୁରୁତ୍ଵପୂର୍ଣ୍ଣ ରାସ୍ତା ସହ ଯୋଗାଯୋଗ ବିଚ୍ଛିନ୍ନ ହୋଇଛି । ଏଯାବତ୍ ବନ୍ୟାରେ ୧୨୫୨ ଲୋକଙ୍କ ମୃତ୍ୟୁ ଘଟିଛି । ତେବେ ମାଟି ତଳୁ ଆଜି ଦୁଇ ଜଣ ଶ୍ରମିକ ଉଦ୍ଧାର ହେବାପରେ ସୁଡ଼ଙ୍ଗରେ ଉଦ୍ଧାର କାର୍ଯ୍ୟକୁ ତ୍ଵରାନ୍ଵିତ କରାଯାଇଛି । ସୁଡ଼ଙ୍ଗ ଭିତରେ ଆହୁରି ୩୦ରୁ ୪୦ ଲୋକ ଜୀବନ୍ତ ଥିବେ ବୋଲି ସନ୍ଦେହ କରାଯାଉଛି । କାରଣ ଆଜି ସକାଳେ ସୁଡ଼ଙ୍ଗର ବହୁ ଭିତରୁ ଲୋକଙ୍କ ସ୍ଵର ଶୁଣାଯାଇଛି । ଯେତେବେଳେ ବନ୍ୟା ଆସିଥିଲା, ସେତେବେଳେ ନେପାଳର ୧୨ଟି ଜଳବିଦ୍ୟୁତ ପ୍ରକଳ୍ପରେ ପ୍ରାୟ ୯୦୦ରୁ ଅଧିକ କର୍ମଚାରୀ କାମ କରୁଥିଲେ । ଏମାନଙ୍କ ମଧ୍ୟରୁ ପ୍ରାୟ ୫୦୦ କର୍ମଚାରୀ ଏବେ ବି ସୁଡ଼ଙ୍ଗ ଭିତରେ ଫସିରହିଥିବା ଆଶଙ୍କା କରାଯାଉଛି ।