International News / ‘କେହି କାପୁରୁଷ ଥିଲେ ବାହାରିଯାଆନ୍ତୁ’, UNରେ କାହିଁକି ଏମିତି କହିଲେ ଇସ୍ରାଏଲ୍‌ ପ୍ରଧାନମନ୍ତ୍ରୀ ?

ଜାତିସଂଘ ମହାସଭାରେ ଏମିତି ଏକ ଘଟଣା ଦେଖିବାକୁ ମିଳିଛି, ଯାହା ବେଶ୍ ଚର୍ଚ୍ଚା ସୃଷ୍ଟି କରିଛି । ଇସ୍ରାଏଲ୍‌ ପ୍ରଧାନମନ୍ତ୍ରୀ ବେଞ୍ଜାମିନ୍‌ ନେତନ୍ୟାହୁ ଭାଷଣ ଆରମ୍ଭ କରିବା ମାତ୍ରେ ଅନେକ ଦେଶର ପ୍ରତିନିଧି ସଭାଗୃହ ଛାଡ଼ି ବାହାରକୁ ଚାଲି ଯାଇଥିଲେ । ଆଉ ଠିକ୍‌ ଏହି ସମୟରେ ଇସ୍ରାଏଲୀ ପ୍ରତିନିଧିମାନେ ଠିଆ ହୋଇ ତାଳି ବଜାଇଥିଲେ । ଏତିକିରେ ସରିନଥିଲା ଘଟଣା—ଭାଷଣ ମଝିରେ ନେତନ୍ୟାହୁ ହାତରେ ଏକ ପେଜର ଧରି ଯାହା କହିଲେ, ତାହାକୁ ନେଇ ଏବେ ଚର୍ଚ୍ଚା ଜୋର ଧରିଛି ।
ଜାତିସଂଘ ମହାସଭାରେ ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ ଭାଷଣ ଆରମ୍ଭ କରିବାମାତ୍ରେ ଅନେକ ଦେଶର ପ୍ରତିନିଧି ସଭାଗୃହ ଛାଡ଼ି ବାହାରକୁ ଚାଲିଯାଇଥିଲେ । ଅନ୍ୟପଟେ, ଇସ୍ରାଏଲୀ ପ୍ରତିନିଧିମାନେ ଠିଆ ହୋଇ ନେତନ୍ୟାହୁଙ୍କ ସମର୍ଥନରେ ତାଳି ବଜାଇଥିଲେ ।

ଭାଷଣ ଆରମ୍ଭ ପୂର୍ବରୁ ସଭାଗୃହ ଛାଡ଼ି ଯାଉଥିବା ପ୍ରତିନିଧିଙ୍କୁ ନେତନ୍ୟାହୁ ସମାଲୋଚନା କରିଥିଲେ । ସେ କହିଥିଲେ, ଯଦି କୌଣସି ‘ନୈତିକ ଭାବେ କାପୁରୁଷ’ ପ୍ରତିନିଧି ଏବେ ବି ସଭାରେ ରହିଛନ୍ତି, ତେବେ ସେ ମଧ୍ୟ ବାହାରକୁ ଯାଇପାରନ୍ତି ।

ନିଜ ଭାଷଣରେ ନେତନ୍ୟାହୁ ଇସ୍ରାଏଲର ଅନ୍ତର୍ଜାତୀୟ ସମାଲୋଚକ ଏବଂ ସଭାଗୃହ ଛାଡ଼ିଥିବା ପ୍ରତିନିଧିମାନଙ୍କୁ ଟାର୍ଗେଟ୍ କରିଥିଲେ । ଇରାନ୍‌ର ଉଲ୍ଲେଖ କରି ସେ ଦାବି କରିଥିଲେ ଯେ ସେଠାକାର ବର୍ତ୍ତମାନର ଶାସନ ଶେଷରେ ପତନ ହେବ ଏବଂ ଇରାନୀ ଲୋକେ ସ୍ୱାଧୀନ ହେବେ ।

ଇସ୍ରାଏଲକୁ ସମାଲୋଚନା କରୁଥିବା ପ୍ରଦର୍ଶନକାରୀ ଓ କୂଟନୀତିଜ୍ଞମାନଙ୍କୁ ନେତନ୍ୟାହୁ ପ୍ରଶ୍ନ କରିଥିଲେ ଯେ, ଇରାନର କାର୍ଯ୍ୟକଳାପ ଏବଂ ମଧ୍ୟପ୍ରାଚ୍ୟରେ ଖ୍ରୀଷ୍ଟିଆନ୍‌ମାନଙ୍କ ଉପରେ ହେଉଥିବା ନିର୍ଯାତନାକୁ ନେଇ ସେମାନେ କାହିଁକି ନୀରବ ରହୁଛନ୍ତି । ଇସ୍ରାଏଲରେ ଖ୍ରୀଷ୍ଟିଆନ୍ ଜନସଂଖ୍ୟା ବଢ଼ୁଛି ଏବଂ ସେମାନେ ସେଠାରେ ଉନ୍ନତି କରୁଛନ୍ତି ବୋଲି ମଧ୍ୟ ସେ ଦାବି କରିଥିଲେ ।

ଏଥି ସହ ପଢନ୍ତୁ: କିପରି ଭାରତୀୟ ଚଳଚ୍ଚିତ୍ର ମାଧ୍ୟମରେ କିପରି ଟ୍ରମ୍ପଙ୍କୁ ଘେରୁଛି ଇରାନ୍; ଭିଡ଼ିଓ ଭାଇରାଲ

ଭାଷଣର ଶେଷ ଭାଗରେ ନେତନ୍ୟାହୁ କହିଥିଲେ ଯେ ଇସ୍ରାଏଲର ଅସ୍ତିତ୍ୱ କେବେ ଦୁର୍ବଳ ହେବ ନାହିଁ, କାରଣ ତାଙ୍କ କହିବା ଅନୁସାରେ ଇସ୍ରାଏଲ ପାଖରେ ଅନ୍ୟ କୌଣସି ବିକଳ୍ପ ନାହିଁ ।

ନେତନ୍ୟାହୁ ନିଜ ଭାଷଣ ସମୟରେ ଏକ ପେଜର ହାତରେ ଧରି ଦର୍ଶକଙ୍କୁ ଦେଖାଇଥିଲେ ଏବଂ ପଚାରିଥିଲେ—ଏହାକୁ ସେମାନେ ମନେ ରଖିଛନ୍ତି କି ? ହିଜବୁଲ୍ଲାହ ମଧ୍ୟ ଏହି ପେଜରକୁ ନିଶ୍ଚିତ ଭାବେ ମନେ ରଖିଥିବ ବୋଲି ସେ କହିଥିଲେ । ପେଜର ଦେଖାଇବା ପରେ ସଭାରେ ଉପସ୍ଥିତ କିଛି ଲୋକ ତାଳି ବଜାଇଥିଲେ ।
ନେତନ୍ୟାହୁଙ୍କ ଏହି ଇଙ୍ଗିତ ୨୦୨୪ ମସିହାରେ ଲେବାନନ୍‌ରେ ହୋଇଥିବା ପେଜର ବିସ୍ଫୋରଣ ଘଟଣାକୁ ନେଇ ଥିଲା । ସେହି ଘଟଣାରେ ବହୁ ସଂଖ୍ୟାରେ ପେଜର ଏକାସାଙ୍ଗରେ ବିସ୍ଫୋରଣ ହୋଇଥିବା ଖବର ଆସିଥିଲା । ଆଉ ଏହି ପେଜର ବିସ୍ଫୋରଣରେ ୯ ଜଣଙ୍କ ମୃତ୍ୟୁ ଓ ପ୍ରାୟ ୩,୦୦୦ ଜଣ ଆହତ ହୋଇଥିଲେ ।