Oil Theft Turns Deadly / ମଝି ସମୁଦ୍ରରେ ଜାହାଜରୁ ତେଲ ଚୋରି ପାଇଁ ଯାଇଥିଲେ, ବିଷାକ୍ତ ଗ୍ୟାସ୍‌ରେ ଆଖି ବୁଜିଲେ ୩୭ ଜଣ

ନୂଆଦିଲ୍ଲୀ: ଗଭୀର ସମୁଦ୍ର, ଅଥଳ ପାଣି । ମଝି ସମୁଦ୍ରରେ ଯାଉଥିବା ଜାହାଜରେ ଚଢ଼ି ସେଥିରୁ ତେଲ ଚୋରି । ଏଭଳି ଦୁଃସାହାସିକ ଚୋରି ବେଳେ ୩୭ ଜଣ ପ୍ରାଣ ହରାଇଛନ୍ତି । ଏକାଧିକ ଜଣ ନିଖୋଜ ଥିବା ଜଣାପଡ଼ିଛି । ନାଇଜେରିଆର ତୈଳ ସମୃଦ୍ଧ ରାଜ୍ୟ ରିଭର୍ସରେ ବଡ଼ ଦୁର୍ଘଟଣା ଘଟିଛି ।

ସୂଚନା ଅନୁସାରେ, ସମୁଦ୍ର ମଝିରେ ତୈଳବାହୀ ଜାହାଜରୁ ଅଶୋଧିତ ତୈଳ ଚୋରାଇବା ପାଇଁ ପ୍ରୟାସ ବେଳେ ପ୍ରାୟ ୩୭ ଜଣଙ୍କ ମୃତ୍ୟୁ ହୋଛି । କୁହାଯାଉଛି, ଜାହାଜରୁ ଡ୍ରମରେ ତୈଳ ଚୋରାଇବା ବେଳେ ବିଷାକ୍ତ ଗ୍ୟାସ୍ ବାହାରିଥିଲା । ଆଉ ସେହି ଗ୍ୟାସ ନିଶ୍ଵାସରେ ଶରୀରକୁ ଯିବାରୁ ଜୀବନ ଚାଲି ଯାଇଛି ।

ଏଥିସହ ପଢ଼ନ୍ତୁ: ଜନ୍ମାଷ୍ଟମୀରେ ନେପାଳ ସୁଡ଼ଙ୍ଗରୁ ଶ୍ରମିକଙ୍କୁ ମିଳିଲା ନୂଆ ଜୀବନ; ୯ ଦିନ ଧରି ଜପୁଥିଲେ 'କୃଷ୍ଣ' ନାମ 

ପରିବେଶ ସହ ଜଡ଼ିତ ସଂଗଠନ ୟୁଥ୍ସ ଏଣ୍ଡ ଏନଭରମେଣ୍ଟାଲ୍ ଆକଭୋକେସି ସେଣ୍ଟର ଶୁକ୍ରବାର ଏହି ଦୁର୍ଘଟଣା ନେଇ ସୂଚନା ଦେଇଛି । ସଂଗଠନ ଅନୁସାରେ, ଏହି ଘଟଣା ଗୁରୁବାର ଘଟିଛି । ଅନେକ ତୈଳ ଚୋରି କରିବାକୁ ନିଜ ନିଜର ଛୋଟ ଡଙ୍ଗା ନେଇ ଯାଇଥିଲେ ।

ଏଥିପାଇ ଏକ ଅବୈଧ ତୈଳ ସଂଗ୍ରହ ସ୍ଥାନର ବ୍ୟବହାର କରାଯାଉଥିଲା । ତୈଳ ଚୋରି କରିବା ସମୟରେ ବିଷାକ୍ତ ଗ୍ୟାସ୍ ଓ ଧୂଆଁ ବାହାରିଥିଲା । ଫଳରେ ଛୋଟ ଡଙ୍ଗା ନେଇ ଯାଇଥିବା ୩୭ ଜଣଙ୍କ ମୃତ୍ୟୁ ହୋଇଥିବା ବେଳେ ଅନେକ ନିଖୋଜ ହୋଇଥିବା କୁହାଯାଉଛି ।

ମଝି ସମୁଦ୍ରରେ ଏଭଳି ଅଘଟଣ ଘଟିଥିବା ନେଇ ଶୁକ୍ରବାର ପୋଲିସ ସ୍ପଷ୍ଟ ସୂଚନା ଦେଇଛି । ତେବେ ପୋଲିସ ମୃତକଙ୍କ ସଂଖ୍ୟା ପ୍ରକାଶ କରି ନାହିଁ । ପୋଲିସ କହିଛି ଯେ, "ମାମଲାର ତଦନ୍ତ ଆରମ୍ଭ କରାଯାଇଛି । ପୋଲିସ କମାଣ୍ଡ ହିଁ ମୃତ୍ୟୁ କଥା କହିପାରିବେ । ତେବେ ଅଶୋଧିତ ତୈଳ ଚୋରି କରିବାକୁ ପ୍ରୟାସ ବେଳେ ଏହି ଅଘଟଣ ଘଟିଛି ।"

ଡେଲ୍ଟାରେ ନୂଆ ନୁହେଁ ତୈଳ ଚୋରି

ସୂଚନାଯୋଗ୍ୟ, ନାଇଜେରିଆର ନାଇଜର ଡେଲ୍ଟା ଅଞ୍ଚଳରେ ଏଭଳି ତୈଳ ଚୋରି ଦୀର୍ଘ ଦିନରୁ ହୋଇ ଆସୁଛି । ଏହି ଅଞ୍ଚଳରେ ଦେଶର ସର୍ବାଧିକ ତୈଳ ଉତ୍ତୋଳନ ହୋଇଥାଏ । ଆଫ୍ରିକାର ସବୁଠୁ ବଡ଼ ତୈଳ ଉତ୍ପାଦନକାରୀ ଦେଶ ହେଉଛି ନାଇଜେରିଆ । କିନ୍ତୁ, ପ୍ରଚୁର ତୈଳ ସମ୍ପଦ ଥିବା ସତ୍ତ୍ଵେ ନାଇଜର ଡେଲ୍ଟା ଜନସଂଖ୍ୟାର ବଡ଼ ଅଂଶ ଗରିବୀ ଓ ବେରୋଜଗାର ସହ ଜୁଝିଛନ୍ତି ।

ଏଥିସହ ପଢ଼ନ୍ତୁ: ୩୦୦୦ ମୁଣ୍ଡ ନେଲାଣି ଇବୋଲା; ଏମିତି ବ୍ୟାପେ ଏହି ଘାତକ ଭାଇରସ୍, ଜାଣନ୍ତୁ କିପରି ସୁରକ୍ଷିତ ରହିବେ 

ଅଞ୍ଚଳରେ ଦଶନ୍ଧି ଧରି ତୈଳ ସନ୍ଧାନ ଓ ଉତ୍ତୋଳନ ପାଇଁ ପରିବେଶ ବେଶ୍ କ୍ଷତି ସହୁଛି । ପାଇପଲାଇନ୍‌ରେ ଅବୈଧ ଭାବେ ଛିଦ୍ର କରି ତୈଳ ଚୋରି ହେଉଛି । ଛୋଟ ଡଙ୍ଗା ଓ ଅନ୍ୟ ମାଧ୍ୟମରେ ତୈଳ ଚୋରି କରି ନେବା ସେଠାକାର ନିତିଦିନିଆ ଘଟଣା ଅଟେ ।