AI Missile / AI ଟେକ୍ନୋଲୋଜିରେ ନୂଆ ମିସାଇଲ୍ ପରୀକ୍ଷା କଲା ଉତ୍ତର କୋରିଆ, ବଢ଼ିଲା ଦକ୍ଷିଣ କୋରିଆ-ଜାପାନର ଚିନ୍ତା

ନୂଆଦିଲ୍ଲୀ: ପୁଣି ଏକ ନୂଆ ମିସାଇଲ୍ ପରୀକ୍ଷା କରିଛି ଉତ୍ତର କୋରିଆ । ଏଥର ମିସାଇଲ୍‌ରେ ଆର୍ଟିଫିସିଆଲ୍ ଇଣ୍ଟେଲିଜେନ୍ସ ବା AI ଟେକ୍ନୋଲୋଜି ବ୍ୟବହାର ହୋଇଥିବା ଦାବି କରାଯାଇଛି । ଉତ୍ତର କୋରିଆର ସରକାରୀ ମିଡିଆ KCNA ଅନୁସାରେ, ମିସାଇଲ୍‌ଟି ଉଡ଼ାଣ ସମୟରେ ନିଜର ଦିଗ ବଦଳାଇପାରିବ ।

ଶନିବାର ପୂର୍ବ ଉପକୂଳର ୱନସାନ୍ ଅଞ୍ଚଳରୁ ଏହି ମିସାଇଲ୍ ଛଡ଼ାଯାଇଥିଲା । ଦକ୍ଷିଣ କୋରିଆର ସେନା କହିଛି, ମିସାଇଲ୍‌ଟି ୭୦୦ କିଲୋମିଟରରୁ ଅଧିକ ଦୂର ଯାଇଥିଲା । ତେବେ ଉତ୍ତର କୋରିଆ ପକ୍ଷରୁ ଏହାର ଟାର୍ଗେଟ୍ ପ୍ରାୟ ୧,୦୦୦ କିଲୋମିଟର ଦୂରରେ ଥିବା କୁହାଯାଇଛି ।

ଏଥିସହ ପଢ଼ନ୍ତୁ: ବିମାନ ହାଇଜାକ୍ କିମ୍ବା କ୍ରାସ୍ କରିବାକୁ ଥିଲା ମାଷ୍ଟରପ୍ଲାନ୍; ସବୁ ସତ ମାନିଲା କୋ-ପାଇଲଟ୍ 

ଉତ୍ତର କୋରିଆ ନେତା କିମ୍ ଜୋଙ୍ଗ ଉନ୍ ନିଜେ ଏହି ପରୀକ୍ଷାକୁ ଦେଖିଥିଲେ । KCNA ଅନୁସାରେ, ଏହି ପରୀକ୍ଷା ହାଇପରସୋନିକ୍ ଷ୍ଟ୍ରାଟେଜିକ୍ ଅସ୍ତ୍ର ପ୍ରଣାଳୀ ଚଳାଉଥିବା ସୈନିକଙ୍କ ତାଲିମ ଓ ଅସ୍ତ୍ରର କାର୍ଯ୍ୟକ୍ଷମତା ପରୀକ୍ଷା ପାଇଁ କରାଯାଇଥିଲା ।

ଉତ୍ତର କୋରିଆର ଅଧିକାରୀ କିମ୍ ଜୋ ଜୋଙ୍ଗ କହିଛନ୍ତି ଯେ, "AI ଟେକ୍ନୋଲୋଜି ଥିବାରୁ ମିସାଇଲ୍‌ଟି କମ୍ ଉଚ୍ଚତାରେ ଉଡ଼ୁଥିବା ସମୟରେ ମଧ୍ୟ ନିଜର ଉଡ଼ାଣ ପଥ ବଦଳାଇପାରିବ ।" ଏଥିପାଇଁ ଏହାକୁ ଟ୍ରାକ୍ କରିବା ଓ ରୋକିବା କଷ୍ଟକର ହୋଇପାରେ ବୋଲି ସେ ଦାବି କରିଛନ୍ତି ।

ତେବେ ଉତ୍ତର କୋରିଆର ଏହି ଦାବିକୁ ଦକ୍ଷିଣ କୋରିଆ ଗ୍ରହଣ କରିନାହିଁ । ସିଓଲ୍ ପକ୍ଷରୁ କୁହାଯାଇଛି ଯେ, "ନୂଆ ମିସାଇଲ୍‌କୁ ଚିହ୍ନଟ କରିବା ଓ ଆବଶ୍ୟକ ହେଲେ ରୋକିବା ପାଇଁ ଦକ୍ଷିଣ କୋରିଆ ଓ ଆମେରିକାର ମିଳିତ ପ୍ରତିରକ୍ଷା ବ୍ୟବସ୍ଥା ରହିଛି ।"

ଏଥିସହ ପଢ଼ନ୍ତୁ: ଋଷିଆ ଆକ୍ରମଣରେ ଧ୍ୱଂସ ହୋଇଗଲା ୟୁକ୍ରେନ୍ ସ୍ଥିତ ଭାରତୀୟ ଫାର୍ମା କମ୍ପାନୀ 

ଏହି ପରୀକ୍ଷା ଏମିତି ସମୟରେ ହୋଇଛି, ଯେତେବେଳେ କୋରିଆ ଉପଦ୍ୱୀପରେ ଉତ୍ତେଜନା ବଢ଼ିଛି । ଚଳିତ ବର୍ଷ ଉତ୍ତର କୋରିଆ ୧୦ରୁ ଅଧିକ ଥର ମିସାଇଲ୍ ପରୀକ୍ଷା କରିଥିବା କୁହାଯାଉଛି ।"

ଏହି ନୂଆ ମିସାଇଲ୍ ପରୀକ୍ଷଣ ଉପରେ ଜାପାନ ମଧ୍ୟ ନଜର ରଖିଛି । ଉତ୍ତର କୋରିଆ ନିଜର ମିସାଇଲ୍ କ୍ଷମତାକୁ ଲଗାତାର ବଢ଼ାଉଥିବାରୁ ଦକ୍ଷିଣ କୋରିଆ, ଜାପାନ ଓ ଆମେରିକା ଏହି ବିକାଶ ଉପରେ ନଜର ରଖିଛନ୍ତି ।