Flydubai CoPilot Truth / ବିମାନ ହାଇଜାକ୍ କିମ୍ବା କ୍ରାସ୍ କରିବାକୁ ଥିଲା ମାଷ୍ଟରପ୍ଲାନ୍; ସବୁ ସତ ମାନିଲା କୋ-ପାଇଲଟ୍

ନିଜ ମୁହଁରେ ନିଜେ ସତ ମାନିଲା ସହ-ପାଇଲଟ୍ ହମାମ ଅଲ୍-ହମ୍ମାମି । ସାଉଦି ଆରବରେ ତଦନ୍ତକାରୀ ସଂସ୍ଥାର ଜେରା ସମୟରେ ନିଜ ପ୍ଲାନ ଡିକୋଡ୍ କରିଛି । ସେ ମୃତ୍ୟୁକୁ ଡରେନାହିଁ ଏବଂ ଜାଣିଶୁଣି ବିମାନକୁ ଦୁର୍ଘଟଣାଗ୍ରସ୍ତ କରିବାକୁ ଚାହୁଁଥିଲା ବୋଲି ତଦନ୍ତକାରୀ ସଂସ୍ଥା ଆଗରେ ସ୍ୱୀକାର କରିଛି ଅଭିଯୁକ୍ତ କୋ-ପାଇଲଟ୍‌ । ଆତଙ୍କୀଙ୍କ ଉଦ୍ୟମ ସଫଳ ହୋଇନଥିବାରୁ ମଝି ଆକାଶରେ ଟଳିଯାଇଛି ବଡ଼ ଧରଣର ବିମାନ ଦୁର୍ଘଟଣା ।

• କଣ୍ଟ୍ରୋଲ ପ୍ୟାନେଲ ଭାଙ୍ଗି ବିମାନକୁ କ୍ରାସ୍ କରିବାକୁ ଷଡ଼ଯନ୍ତ୍ର

ଓମାନ ନାଗରିକ କୋ-ପାଇଲଟ୍‌ ହମାମ୍‌ ଅଲ୍-ହମ୍ମାମି ବିମାନର କ୍ୟାପଟେନ୍‌ ସ୍ମିଥ୍ ମଚ୍ଛାରଙ୍କୁ ଜରୁରୀକାଳୀନ ପରିସ୍ଥିତି ପାଇଁ ରଖାଯାଇଥିବା ଅସ୍ତ୍ରରେ ଆକ୍ରମଣ କରି ଗୁରୁତର କରିଥିଲା । ଏହାପରେ ସେ କଣ୍ଟ୍ରୋଲ ପ୍ୟାନେଲକୁ ଭାଙ୍ଗି ବିମାନକୁ ସିଧା କ୍ରାସ୍‌ କରିବାକୁ ଚେଷ୍ଟା କରିଥିଲା । ୟୁଏଇର ପ୍ରୋସେକ୍ୟୁଟର ଜେନେରାଲ୍ ଏହାକୁ ଏକ 'ସନ୍ଦିଗ୍ଧ ଆତଙ୍କବାଦୀ ଆକ୍ରମଣ'ର ପ୍ରଚେଷ୍ଟା ବୋଲି କହିଛନ୍ତି । ହମ୍ମାମ‌ଙ୍କ ଅତୀତରେ ସିରିଆ ସହ ରହିଛି ସନ୍ଦେହଜନକ ଯୋଗସୂତ୍ର, ଯାହାକୁ ନେଇ ଏବେ ଗୁଇନ୍ଦା ଓ ସୁରକ୍ଷା ସଂସ୍ଥାଗୁଡ଼ିକ ତଦନ୍ତ ଜାରି ରଖିଛନ୍ତି ।

• ଭାରତୀୟ ପାଇଲଟଙ୍କ ସବୁଠି ପ୍ରଶଂସା

ରକ୍ତାକ୍ତ ଅବସ୍ଥାରେ କ୍ୟାପଟେନ୍‌ କକପିଟ୍‌ ଦ୍ୱାର ଖୋଲିବାରେ ସଫଳ ହୋଇଥିଲେ । ୪ ଜଣ ଯାତ୍ରୀ କକପିଟ୍‌କୁ ପଶି ଅଭିଯୁକ୍ତ କୋ-ପାଇଲଟ୍‌କୁ କାବୁ କରିବା ସହ ଇୟରଫୋନ୍‌ ତାରରେ ବାନ୍ଧି ପକାଇଥିଲେ। ବିମାନ ଦୁର୍ଘଟଣା ସମ୍ବନ୍ଧୀୟ ଟିଭି ଶୋ’ ଦେଖିଥିବା ଜଣେ ଯାତ୍ରୀ ପ୍ରଥମେ ବିମାନକୁ ନିୟନ୍ତ୍ରଣକୁ ଆଣିଥିଲେ। ବିମାନରେ ଯାତ୍ରା କରୁଥିବା ଅନ୍ୟ ଦୁଇଜଣ ଅଫ୍-ଡ୍ୟୁଟି ପାଇଲଟ୍‌ ଶେଷରେ ବିମାନକୁ ସାଉଦି ଆରବର ତବୁକ୍‌ଠାରେ ସୁରକ୍ଷିତ ଲ୍ୟାଣ୍ଡିଂ କରାଇଥିଲେ। ଭାରତୀୟ କ୍ୟାପଟେନ୍ ସ୍ମିତ୍ ମଚ୍ଛାର ଏହି ବିପଦପୂର୍ଣ୍ଣ ପରିସ୍ଥିତିରେ ଅତ୍ୟନ୍ତ ସାହସିକତାର ସହ ପରିସ୍ଥିତିକୁ ନିୟନ୍ତ୍ରଣ କରିବାରେ ସଫଳ ହୋଇଥିଲେ।

• ଓମାନରେ ବ୍ୟାନ୍ ଥିଲା ହମାମ୍

ଏପରି ଘଟଣା ପରେ ଏୟାରଲାଇନ୍ସର ସୁରକ୍ଷା ବ୍ୟବସ୍ଥା ଉପରେ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି। ହମାମ୍‌ ଅଲ୍-ହମ୍ମାମୀ ପୂର୍ବରୁ 'ଓମାନ ଏୟାର'ରେ କାର୍ଯ୍ୟରତ ଥିବାବେଳେ ଉଗ୍ରବାଦୀ ୱେବସାଇଟ୍‌ ସହ ଜଡ଼ିତ ଥିବା ଜଣାପଡ଼ିଥିଲା । ଏହି କାରଣରୁ ଓମାନ ଏୟାର ତାକୁ ଉଡ଼ାଣରୁ ବ୍ୟାନ କରି ଡେସ୍କ ଜବ୍‌କୁ ପଠାଇ ଦେଇଥିଲା। ଏତେ ବଡ଼ ବିପଜ୍ଜନକ ପୃଷ୍ଠଭୂମି ଥାଇ ମଧ୍ୟ ଫ୍ଲାଇ-ଦୁବାଇ କିପରି ତାକୁ ପାଇଲଟ୍‌ ଭାବେ ନିଯୁକ୍ତି ଦେଲା, ସେ ନେଇ ତଦନ୍ତ ଚାଲିଛି। ତା'ର ସୋସିଆଲ ମିଡିଆ ଆକାଉଣ୍ଟରୁ ମଧ୍ୟ ମହିଳାବିରୋଧୀ ଓ କଟ୍ଟରପନ୍ଥୀ ଚିନ୍ତାଧାରାର ପୋଷ୍ଟ ମିଳିଛି।

ପଢନ୍ତୁ ଏହି ଖବର: ଓମାନରେ ଥିଲା ବ୍ୟାନ୍; ଭାରତୀୟ ପାଇଲଟଙ୍କୁ ମଝି ଆକାଶରେ ଛୁରୀ ମାରିଥିବା କୋ-ପାଇଲଟର ସତ ଜଣାପଡ଼ିଲା...

ଘଟଣା ସମୟରେ ବିମାନରେ ଅଧିକାଂଶ ଇସ୍ରାଏଲୀ ଯାତ୍ରୀ ଥିଲେ । ସାଉଦି ଆରବ ଓ ୟୁଏଇର ସୁରକ୍ଷା ଏଜେନ୍ସିଗୁଡ଼ିକ ମିଳିତ ଭାବେ ଏହାର ତଦନ୍ତ କରୁଛନ୍ତି। ପାଇଲଟଙ୍କ ମାନସିକ ସ୍ଥିତି ଓ ବ୍ୟାକଗ୍ରାଉଣ୍ଡ ଚେକ୍‌କୁ ନେଇ ଏବେ ସାରା ବିଶ୍ୱର ଏଭିଏସନ୍‌ ସେକ୍ଟରରେ ପୁଣିଥରେ କଠୋର ନିୟମାବଳୀ ଲାଗୁ କରିବାକୁ ଦାବି ଉଠିଛି।