ଉତ୍ତର କୋରିଆର ଏକଛତ୍ରବାଦ ଶାସକ କିମ୍ ଜୋଙ୍ଗ ଉନ ନିଜର କଠୋର ନିୟମ ଓ ଦେଶବାସୀଙ୍କୁ ନିୟନ୍ତ୍ରଣରେ ରଖିବା ନେଇ ବେଶ ଚର୍ଚ୍ଚାରେ ରୁହନ୍ତି । ଏବେ ଠିକ୍ ଏହି କଥାକୁ ପ୍ରମାଣିତ କଲା ପରି ଏକ ଦୃଶ୍ୟ ସମସ୍ତଙ୍କୁ ବିସ୍ମିତ କରିଛି । କିମଙ୍କୁ ଦେଖି ଉତ୍ତର କୋରିଆର ମହିଳା ଫୁଟବଲ ଖେଳାଳି ଯେଉଁଭଳି ଭାବରେ ପ୍ରତିକ୍ରିୟା ଦେଇଛନ୍ତି, ତାହା ଅଜବ ପରି ମନେ ହେଉଛି । କିମ ଖେଳାଳିଙ୍କୁ ଭେଟିବା ସମୟରେ ସମସ୍ତ ଖେଳାଳି ଏକାସାଙ୍ଗରେ କାନ୍ଦିବା ଓ ଡେଉଁଥିବା ନଜର ଆସିଛନ୍ତି ।

• ଏକାବେଳେ ସମସ୍ତେ କାନ୍ଦିଲେ-ଡେଇଁଲେ

ସୋସିଆଲ ମିଡିଆରେ ଏହି ଭିଡିଓଟି ବେଶ ଭାଇରାଲ ହେଉଛି । କିମ୍ ଜୋଙ୍ଗ ଉନ୍ ଜଣକ ପରେ ଜଣେ ମହିଳା ଫୁଟବଲ ଖେଳାଳିଙ୍କୁ ଭେଟୁଛନ୍ତି ଓ ସମସ୍ତ ଖେଳାଳି ଏକା ସାଙ୍ଗରେ କାନ୍ଦୁଛନ୍ତି ଏବଂ ଖୁସିରେ ଡେଉଁଥିବା ନଜର ଆସିଛି । ଉତ୍ତର କୋରିଆର ନାଏଗୋହ୍ୟୋଙ୍ଗ ମହିଳା ଏଫସି ଟିମ AFC ମହିଳା ଚାମ୍ପିଆନ୍ ଲିଗର ଟାଇଟଲ୍ ଜିତି ଇତିହାସ ସୃଷ୍ଟି କରିଛନ୍ତି ।
ଟିମର ଏହି ଐତିହାସିକ ସଫଳତା ପରେ କିମ ଜୋଙ୍ଗ ଉନ୍ ନିଜେ ଖେଳାଳିଙ୍କୁ ହ୍ୟାଣ୍ଡସେକ୍ କରି ଶୁଭେଚ୍ଛା ଜଣାଇବାକୁ ପଡ଼ିଆକୁ ଓହ୍ଲାଇଥିଲେ ।

ଯେତେବେଳେ ସେ ଖେଳାଳିଙ୍କୁ ଭେଟିବା ଆରମ୍ଭ କରିଥିଲେ, ଏହି ସମୟରେ ସମସ୍ତ ଖେଳାଳି ଏକାସାଙ୍ଗରେ କାନ୍ଦିବା ସହିତ ଡେଇଁବାକୁ ଲାଗିଥିଲେ । ସତେ ଯେପରି ଏହା କୌଣସି ନିୟମ ପରି ଲାଗୁଥିଲା । ଭିଡିଓରେ କିମ୍ ଜୋଙ୍ଗ ହସି ହସି ଖେଳାଳିଙ୍କୁ ଭେଟୁଥିବା ନଜର ଆସିଛି । ଏହାପରେ କିମ୍ ପୂରା ଟିମ ସହିତ ଫଟୋ ଉଠାଇଥିଲେ ଓ ଷ୍ଟାଡିୟମରେ ବସି ଖେଳାଳିଙ୍କୁ ସମ୍ମାନିତ କରିଥିଲେ ।

WATCH: Kim Jong-un welcomed Naegohyang Women’s FC after the team became the first from North Korea to win the AFC Women’s Champions League. pic.twitter.com/jlDBPbbN6u

— Clash Report (@clashreport) June 3, 2026

• ଇତିହାସ ରଚିଲା ନାଏଗୋହ୍ୟୋଙ୍ଗ ମହିଳା ଦଳ

ନାଏଗୋହ୍ୟୋଙ୍ଗ ମହିଳା ଦଳ ଗତ ମାସରେ ସିୟୋଲରେ ଖେଳାଯାଇଥିବା ଫାଇନାଲ ମୁକାବିଲାରେ ଜାପାନର ଟୋକୟୋ ବର୍ଡି ବେଲେଜାକୁ ୧-୦ରେ ହରାଇଥିଲା । ଏହାସହିତ ଦଳ AFC ୱିମେନ୍ସ ଚାମ୍ପିଆନ୍ ଲିଗ୍ ଜିତିଥିବା ପ୍ରଥମ ଉତ୍ତର କୋରିଆ କ୍ଲବ ଟିମ ହୋଇଛି । ଏହି ଟୁର୍ଣ୍ଣାମେଣ୍ଟ ୨୦୨୪ରେ ଆରମ୍ଭ ହୋଇଥିଲା ଓ ଏହାକୁ ଏସିଆ ମହିଳା କ୍ଲବ୍ ଫୁଟବଲର ସବୁଠୁ ବଡ଼ ପ୍ରତିଯୋଗିତା ଭାବେ ବିବେଚନା କରାଯାଏ । ଏହି ବିଜୟ ପରେ ନାଏଗୋହ୍ୟୋଙ୍ଗ କ୍ଲବକୁ ୧୦ ଲକ୍ଷ ଡଲାରରୁ ଅଧିକ ପୁରସ୍କାର ରାଶି ପ୍ରଦାନ କରାଯାଇଛି । ଏହାସହିତ ଟିମକୁ ଆସନ୍ତା ବର୍ଷ ହେବାକୁ ଥିବା ଫିଫା ୱିମେନ୍ସ ଚାମ୍ପିଆନ୍ କପ୍ ଓ ୨୦୨୮ରେ ଆୟୋଜିତ ହେବାକୁ ଥିବା ପ୍ରଥମ ମହିଳା କ୍ଲବ ବିଶ୍ଲକପ୍ ଲାଗି ନିଜର ସ୍ଥାନ ପକ୍କା କରିଛନ୍ତି ।

ପଢନ୍ତୁ ଏହି ଖବର: ଉତ୍ତର କୋରିଆର ନୂଆ ସମ୍ଵିଧାନ; ସେନା କରିବ ଅଟୋମେଟିକ୍ ପରମାଣୁ ଆକ୍ରମଣ, ଯଦି...

ଏହି ସଫଳତା ରାଜନୈତିକ ଦୃଷ୍ଟିକୋଣରୁ ମଧ୍ୟ ବେଶ ଗୁରୁତ୍ଵପୂର୍ଣ୍ଣ । ନାଏଗୋହ୍ୟୋଙ୍ଗ ଗତ ୮ ବର୍ଷ ଧରି ଦକ୍ଷିଣ କୋରିଆ ଗସ୍ତ କରିଥିବା ପ୍ରଥମ ଉତ୍ତର କୋରିଆନ୍ କ୍ଲବ୍ ଟିମ୍ ପାଲଟିଛି । ଉଭୟ ଦେଶ ମଧ୍ୟରେ ଦୀର୍ଘ ସମୟ ଧରି ଉତ୍ତେଜନାପୂର୍ଣ୍ଣ ସମ୍ପର୍କ ଥିବାବେଳେ ଦକ୍ଷିଣ କୋରିଆର ରାଷ୍ଟ୍ରପତି ଲି ଜେ-ମ୍ୟୁଙ୍ଗ ଦଳର ଏହି ଐତିହାସିକ ବିଜୟ ପାଇଁ ସାର୍ବଜନୀନ ରୂପରେ ଶୁଭେଚ୍ଛା ଜଣାଇଛନ୍ତି ।