ଆମେରିକାର ଏକ ପ୍ରମୁଖ ବହୁରାଷ୍ଟ୍ରୀୟ ଟେକ୍ନୋଲୋଜି କମ୍ପାନି ଏନଭିଡିଆ ମୁଖ୍ୟ ଜେନ୍ସନ୍ ହୁଆଙ୍ଗଙ୍କ ଚୀନ୍ ଗୁପ୍ତଚର ସହିତ ସମ୍ପର୍କ ମାମଲା । ଘଟଣା ସାମ୍ନାକୁ ଆସିବା ପରେ ଏବେ ହୁଆଙ୍ଗଙ୍କ ଛାଡ଼ପତ୍ରକୁ ନେଇ ବି ଚର୍ଚ୍ଚା ହେଉଛି । ଯଦି ପତ୍ନୀ ଲୋରି ମିଲ୍ସ ହୁଆଙ୍ଗଙ୍କୁ ଛାଡ଼ପତ୍ର ଦିଅନ୍ତି, ତେବେ ଏହା ଦୁନିଆର ସବୁଠୁ ମହଙ୍ଗା ଛାଡ଼ପତ୍ର ହେବ । ପତ୍ନୀ ଲୋରି ମିଲ୍ସଙ୍କୁ ମିଳିପାରେ ପ୍ରାୟ ୬୦ ବିଲିୟନ୍ ଡଲାର, ଅର୍ଥାତ୍ ୫.୬ ଲକ୍ଷ କୋଟି ଟଙ୍କାରୁ ଅଧିକ ସମ୍ପତ୍ତି । ଏଭଳି ଏକ ସମ୍ଭାବ୍ୟ ଆକଳନକୁ ନେଇ ଏବେ ବିଶ୍ୱର କର୍ପୋରେଟ୍ ଜଗତରେ ଚର୍ଚ୍ଚା ଜୋର ଧରିଛି । ତେବେ ଉଭୟଙ୍କ ପକ୍ଷରୁ ଛାଡ଼ପତ୍ର ନେଇ କୌଣସି ଆନୁଷ୍ଠାନିକ ଘୋଷଣା ହୋଇନାହିଁ ।
- କଲେଜରୁ ଆରମ୍ଭ ହୋଇଥିଲା ପ୍ରେମ
ଜେନସନ୍ ଓ ଲୋରିଙ୍କ ପ୍ରେମ କାହାଣୀ ଆରମ୍ଭ ହୋଇଥିଲା ଆମେରିକାର ଓରେଗନ୍ ଷ୍ଟେଟ୍ ୟୁନିଭର୍ସିଟିରେ । ଉଭୟେ ଇଲେକ୍ଟ୍ରିକାଲ୍ ଇଞ୍ଜିନିୟରିଂ ପଢ଼ୁଥିବା ସମୟରେ ପରସ୍ପରଙ୍କୁ ଭେଟିଥିଲେ । ପରେ ବିବାହ କରିଥିଲେ । ୧୯୯୩ରେ ଜେନସନ୍ ଏନଭିଡିଆ ପ୍ରତିଷ୍ଠା କରିଥିଲେ । ଉଭୟଙ୍କର ଦୁଇଟି ସନ୍ତାନ ମଧ୍ୟ ଅଛନ୍ତି।
- କେମିତି ମିଳିପାରେ ୬୦ ବିଲିୟନ୍ ଡଲାର ?
ଏହା ପଛରେ ରହିଛି ଆମେରିକାର କାଲିଫର୍ଣ୍ଣିଆ ରାଜ୍ୟର କମ୍ୟୁନିଟି ପ୍ରପର୍ଟି ଆଇନ । ଏହି ଆଇନ ଅନୁସାରେ ବିବାହ ପରେ ଅର୍ଜିତ ସମ୍ପତ୍ତି ସାଧାରଣତଃ ଉଭୟଙ୍କ ମଧ୍ୟରେ ସମାନ ଭାବେ ବଣ୍ଟନ ହୋଇଥାଏ । ଏନଭିଡିଆର SEC ଫାଇଲିଂ ଅନୁସାରେ, ଜେନସନ୍ ଓ ଲୋରିଙ୍କ ଲିଭିଂ ଟ୍ରଷ୍ଟରେ ୪୬.୭ କୋଟିରୁ ଅଧିକ ସେୟାର ରହିଛି । ଏହାର ମୂଲ୍ୟ ପ୍ରାୟ ୮୪ ବିଲିୟନ୍ ଡଲାର (ପ୍ରାୟ ୭ ଲକ୍ଷ କୋଟି ଟଙ୍କା) । ଅନ୍ୟ ଟ୍ରଷ୍ଟ ଓ ବ୍ୟକ୍ତିଗତ ସେୟାରକୁ ମିଶାଇ ମୋଟ ସମ୍ପତ୍ତିର ଏକ ଆକଳନ ୧୦୭.୪ ବିଲିୟନ୍ ଡଲାର ପାଖାପାଖି । ଯଦି କୋର୍ଟ ଏହା ପୂରା ସମ୍ପତ୍ତିକୁ 'କମ୍ୟୁନିଟି ପ୍ରପର୍ଟି' ମାନନ୍ତି, ତେବେ ଲୋରିଙ୍କୁ ଏହାର ଅଧା ଅର୍ଥାତ୍ ୫୩.୭ ଆରବ ଡଲାର ବା ପାଖାପାଖି ୬୦ ଆରବ ଡଲାର (୫.୬ ଲକ୍ଷ କୋଟି ଟଙ୍କା) ମିଳିବ ।
- ବେଜୋସ ଓ ବିଲ୍ ଗେଟ୍ସଙ୍କ ରେକର୍ଡ ଭାଙ୍ଗିବ କି ?
ଯଦି ଏନଭିଡିଆ ମୁଖ୍ୟ ହୁଆଙ୍ଗଙ୍କ ଏହି ଛାଡ଼ପତ୍ର ହେଉଛି, ତେବେ ତାହା ପୂର୍ବ ସମସ୍ତ ରେକର୍ଡ ଭାଙ୍ଗିଦେବ । ୨୦୧୯ରେ ଆମାଜନ ପ୍ରତିଷ୍ଠାତା ଜେଫ୍ ବେଜୋସଙ୍କ ଛାଡ଼ପତ୍ର ପରେ ମ୍ୟାକେଞ୍ଜି ସ୍କଟ୍ ୩୮.୩ ବିଲିୟନ୍ ଡଲାର ମୂଲ୍ୟର ସେୟାର ପାଇଥିଲେ । ୨୦୨୧ରେ ବିଲ୍ ଗେଟ୍ସ ଛାଡ଼ପତ୍ର ଦେବାପରେ ମେଲିଣ୍ଡା ଫ୍ରେଞ୍ଚ ଗେଟ୍ସ ୧.୭ ଆରବ ଡଲାର ମିଳିଥିଲା । ଜେନସନ୍ ଓ ଲୋରିଙ୍କ କ୍ଷେତ୍ରରେ ଏଭଳି ବଣ୍ଟନ ହେଲେ ଏହି ରେକର୍ଡ ଭାଙ୍ଗିପାରେ । ତେବେ ପ୍ରକୃତ ସମ୍ପତ୍ତି ବଣ୍ଟନ ପ୍ରିନପ୍ସିଆଲ୍ ଚୁକ୍ତି, ଟ୍ରଷ୍ଟ ଦଲିଲ ଓ ଅଦାଲତଙ୍କ ନିଷ୍ପତ୍ତି ଉପରେ ନିର୍ଭର କରିବ । ଆକଳନ ଅନୁସାରେ, ଲୋରିଙ୍କୁ ୬୦ ବିଲିୟନ୍ ଡଲାର ଛାଡ଼ପତ୍ର ବାବଦକୁ ମିଳିପାରେ ।
ପଢନ୍ତୁ ଏହି ଖବର: କିଏ ସେହି ଚୀନ୍ ମହିଳା ଗୁପ୍ତଚର, ଯାହାଙ୍କ ଜାଲରେ ଫସିଥିଲେ Nvidia CEO ଜେନସେନ୍ ହୁଆଙ୍ଗ?
- ଚୀନ ସୁନ୍ଦରୀଙ୍କ ହନିଟ୍ରାପରେ ହୁଆଙ୍ଗ
ବିଶ୍ୱର ସବୁଠୁ ବଡ଼ AI ଚିପ୍ ନିର୍ମାତା କମ୍ପାନୀ NVIDIAର CEO ଜେନସେନ୍ ହୁଆଙ୍ଗ ଚୀନର ସୁନ୍ଦରୀ ଗୁପ୍ତଚରଙ୍କ ହନିଟ୍ରାପରେ ପଡ଼ିଥିଲେ । ଆଲିସ ହୁଆଙ୍ଗଙ୍କ ସହ ତାଙ୍କର ଅବୈଧ ସମ୍ପର୍କ ଥିବା କଥା ସ୍ୱୀକାର କରିଛନ୍ତି ନିଜେ ଜେନସେନ୍ ହୁଆଙ୍ଗ । ଏଥିପାଇଁ ସେ ନିଜର ଦୋଷ ସ୍ବୀକାର କରିବା ସହ ସ୍ତ୍ରୀ ଓ ପରିବାର ନିକଟରେ କ୍ଷମା ପ୍ରାର୍ଥନା କରିଛନ୍ତି । ଭାବପୂର୍ଣ୍ଣ ଚିଠି ମାଧ୍ୟମରେ ସେ ନିଜର ଦୋଷ ସ୍ବୀକାର କରିବା ସହ ସମସ୍ତ କର୍ମଚାରୀଙ୍କୁ ମଧ୍ୟ କ୍ଷମା ମାଗିଛନ୍ତି । ଆମେରିକୀୟ ଗୁଇନ୍ଦା ଏଜେନ୍ସି ଏବଂ ଅଧିକାରୀମାନେ ଆଲିସ୍ ହୁଆଙ୍ଗଙ୍କୁ ଚୀନ୍ ସରକାରଙ୍କ ପାଇଁ ଗୁଇନ୍ଦାଗିରି କରୁଥିବା ସନ୍ଦେହ କରିଛନ୍ତି । ଆମେରିକା କଂଗ୍ରେସ ଜେନସେନ୍ଙ୍କୁ ସମନ କରିଥିବେବେଳେ ଚୀନ ଏଭଳି ଅଭିଯୋଗକୁ କିନ୍ତୁ ଖଣ୍ଡନ କରିଛି । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ଜେନସନଙ୍କୁ କ୍ଲିନଚିଟ୍ ଦେଇଛନ୍ତି । ତେବେ ହୁଆଙ୍ଗ ଆଲିସଙ୍କ ସମ୍ପର୍କରେ କିଛି ଜାଣିନଥିଲେ ବୋଲି ଟ୍ରମ୍ପ କହିଛନ୍ତି ।
