Pakistan Crisis / ଅଟାଠୁ ତେଲ କିଛି ମିଳୁନି; ଯୁଦ୍ଧ ଭିତରେ ପାକିସ୍ତାନରେ ବଢୁଛି ସଙ୍କଟ

ଯୁଦ୍ଧ ଆମେରିକା ଓ ଇରାନ ମଧ୍ୟରେ ହେଉଛି, କିନ୍ତୁ ପାକିସ୍ତାନ ଉପରେ ପଡ଼ିଛି ବଡ଼ ପ୍ରଭାବ । ମଧ୍ୟପ୍ରାଚ୍ୟରେ ଯୁଦ୍ଧ ଯୋଗୁଁ ଗୁରୁତ୍ଵପୂର୍ଣ୍ଣ ସାମୁଦ୍ରିକ ପଥ ହର୍ମୁଜ୍ ଷ୍ଟ୍ରେଟ୍ ବନ୍ଦ ଅଛି । ଫଳରେ ପଡ଼ୋଶୀ ଦେଶ ପାକିସ୍ତାନରେ ସଙ୍କଟ ବଢି ବଢି ଚାଲିଛି । ଏଠାରେ କେବଳ ସଙ୍କଟ ପେଟ୍ରୋଲ କି ଡିଜେଲ ପର୍ଯ୍ୟନ୍ତ ନୁହେଁ, ବରଂ ଦେଶରେ ଅଟା, ଚାଉଳ ପରି ଜରୁରୀ ଖାଦ୍ୟ ପଦାର୍ଥର ଅଭାବ ହେଲାଣି । ଦେଶରେ ମହଙ୍ଗା ମାଡ଼ ପୁଣି ସାଧାରଣ ଜନଜୀବନକୁ ଅସ୍ତବ୍ୟସ୍ତ କରିଛି । ପାକିସ୍ତାନର ଅର୍ଥବ୍ୟବସ୍ଥା ଗଭୀର ଭାବେ ପ୍ରଭାବିତ ହେଉଛି ।

ପାକିସ୍ତାନର ସ୍ଥିତି ଏତେ ମାତ୍ରାରେ ପ୍ରଭାବିତ ହୋଇଛି ଯେ ସରକାର ଚିନ୍ତାରେ ପଡ଼ିଛନ୍ତି । ଦେଶରେ କରୋନା ମହାମାରୀ ପରି ଉପାୟ ଲାଗୁ କରିବାକୁ ପଡୁଛି । ସବୁଠୁ ତାଜା ଆଦେଶ ବିଷୟରେ କହିବାକୁ ଗଲେ, ଏବେ ପାକିସ୍ତାନର ରାତି ୮ଟା ପରେ ଅନ୍ଧାରରେ ବୁଡ଼ିବାକୁ ଯାଉଛି । ଶକ୍ତି ସଙ୍କଟକୁ ରକ୍ଷା କରିବା ଲାଗି ପାକ୍ ସରକାର ଏହି ନିଷ୍ପତ୍ତି ନେଇଛନ୍ତି । ତେବେ ଆସନ୍ତୁ ପାକିସ୍ତାନର ୫ଟି ସଙ୍କଟ ବିଷୟରେ ଜାଣିବା ।

• ପେଟ୍ରୋଲ-ଡିଜେଲ ସଙ୍କଟ

ଆମେରିକା ଓ ଇରାନ ମଧ୍ୟରେ ଯୁଦ୍ଧ ଜାରି ରହିଛି, ଏଥିଯୋଗୁଁ ସାରା ଦେଶରେ ତେଲ ସଙ୍କଟ ଦେଖିବାକୁ ମିଳିଛି । ବିଶେଷ କରି ଏହାର ଏକ ବଡ଼ ପ୍ରଭାବ ପାକିସ୍ତାନ ଉପରେ ପଡ଼ିଛି । ପାକିସ୍ତାନରେ କିପରି ପେଟ୍ରୋଲ ଦରକୁ ନିୟନ୍ତ୍ରଣରେ ରଖାଯିବ, ସେନେଇ ଚିନ୍ତାରେ ପଡ଼ିଛନ୍ତି ପ୍ରଧାନମନ୍ତ୍ରୀ ଶେହବାଜ ଶରିଫ । ଦେଶରେ ଦୁଇ ଥର ପେଟ୍ରୋଲ ଓ ଡିଜେଲର ଦର ବୃଦ୍ଧି ହୋଇଛି । କିଛି ଦିନ ତଳେ ପାକିସ୍ତାନରେ ପେଟ୍ରୋଲ ଲିଟର ପିଛା ୪୫୮.୪୧ ଟଙ୍କା ଥିବାବେଳେ ଡିଜେଲ ଦର ପିଛା ୫୨୦.୩୫ ଟଙ୍କା ରହିଥିଲା । ମାତ୍ର ଜନତାଙ୍କ ଅସନ୍ତୋଷ ପରେ ଏହି ଦାମ ସାମାନ୍ୟ ହ୍ରାସ ପାଇଛି । ଏବେ ପାକିସ୍ତାନରେ ପେଟ୍ରୋଲ ଲିଟର ପିଛା ୮୦ ଟଙ୍କା କମି ୩୭୮ ଟଙ୍କା ହୋଇଛି ।

ପଢନ୍ତୁ ଏହି ଖବର: ଯୁଦ୍ଧ ଭିତରେ ଇରାନର ସର୍ବୋଚ୍ଚ ନେତା ଚେତାଶୂନ୍ୟ; ଆଶ୍ଚର୍ଯ୍ୟ ପୂରା ବିଶ୍ଵ

• ପାକିସ୍ତାନ ଉପରେ ବଢୁଛି ଋଣ ବୋଝ

ପାକିସ୍ତାନ ଉପରେ ଦ୍ଵିତୀୟ ସଙ୍କଟ ବିଷୟରେ କହିବାକୁ ଗଲେ, ଦେଶରେ ଋଣ ବୋଝ ବଢିବାରେ ଲାଗିଛି । ଶେହବାଜ ଶରିଫ ସରକାର ଏବେ IMF ସମେତ ଅନେକ ଦେଶରୁ ଋଣ ନେଇଛନ୍ତି, କିନ୍ତୁ ପାକିସ୍ତାନର ଆର୍ଥିକ ସଙ୍କଟ କମିବାର ନାଁ ନେଉନାହିଁ । ପାକିସ୍ତାନକୁ ଯେଉଁମାନେ ଋଣ ଦେଇଛନ୍ତି, ସେମାନେ ଏହାକୁ ଶୁଝିବାକୁ ଚାପ ପକାଇଲେଣି । ଅନ୍ୟପଟେ ଆଉ କେହି ଋଣ ଦେବାକୁ ରାଜି ହେଉନାହାନ୍ତି । ସେପଟେ ମଧ୍ୟପ୍ରାଚ୍ୟ ଯୁଦ୍ଧ ଯୋଗୁଁ UAE ପାକିସ୍ତାନକୁ ୩.୫ ଆରବ ଡଲାର ବା ୩୨,୫୩୭ କୋଟି ଟଙ୍କା ଫେରସ୍ତ କରିବାକୁ ଦାବି କରିଛି । ପାକିସ୍ତାନର ମିଡିଆ ରିପୋର୍ଟ ଅନୁସାରେ, ପାକିସ୍ତାନ ଉପରେ ଜାନୁଆରୀ ୨୦୨୬ରୁ ମୋଟ ଋଣ ୭୯,୩୨୨ କୋଟି ପାକିସ୍ତାନୀ ଟଙ୍କାରେ ପହଞ୍ଚିଛି ।

• ମିଳୁନି ଅଟା, ଚାଉଳଠୁ ଖାଇବା ତେଲ

ପଡ଼ୋଶୀ ଦେଶ ପାକିସ୍ତାନ ଲାଗି ତୃତୀୟ ସଙ୍କଟ ହେଉଛି ମହଙ୍ଗା ମାଡ଼ । ମଧ୍ୟପ୍ରାଚ୍ୟ ଯୁଦ୍ଧ ଯୋଗୁଁ ଦେଶରେ ଅଶୌଧିତ ତେଲର ମୂଲ୍ୟ ବୃଦ୍ଧି ପାଇଛି । ପେଟ୍ରୋଲ, ଡିଜେଲ ଦର ସହିତ ଦେଶରେ ଖାଦ୍ୟ ପଦାର୍ଥର ଦର ମଧ୍ୟ ବୃଦ୍ଧି ପାଇଛି । ଏପରିକି ପାଉଁରୁଟି, କ୍ଷୀରଠୁ ଆରମ୍ଭ କରି ଅଟା, ଡାଲି, ଚାଉଳ, ଖାଇବା ତେଲର ଦର ବଢିଛି । ଧୀରେ ଧୀରେ ଏହି ଦର ସାଧାରଣ ଜନତାଙ୍କୁ ଅଣନିଶ୍ଵାସୀ କଲାଣି । ପାକିସ୍ତାନରେ ଦରଦାମ ବୃଦ୍ଧି ବର୍ଷ ପରେ ବର୍ଷ ବୃଦ୍ଧି ପାଇ ଏବେ ୭.୩%ରେ ପହଞ୍ଚିଛି । ଏଥିଯୋଗୁଁ ଦୈନନ୍ଦିନ ଜୀବନ ଲାଗି ଆବଶ୍ୟକୀୟ ସାମଗ୍ରୀର ଦର ଆକାଶଛୁଆଁ ହୋଇଛି ।

• ଅଣ୍ଟା ଭାଙ୍ଗିଲାଣି ଅର୍ଥବ୍ୟବସ୍ଥା

ମଧ୍ୟପ୍ରାଚ୍ୟ ଯୁଦ୍ଧ ପାକିସ୍ତାନର ଦରମରା ଅର୍ଥନୀତିକୁ ଆହୁରି ପ୍ରଭାବିତ କରିପାରେ । ପୂର୍ବତନ ପାକିସ୍ତାନୀ ଅର୍ଥମନ୍ତ୍ରୀ ହାଫିଜ୍ ପାଶା ଚେତାବନୀ ଦେଇଥିଲେ ଯେ ଯଦି ଏହି ଯୁଦ୍ଧ ଜାରି ରହେ ଏବଂ ଅଶୋଧିତ ତୈଳ ମୂଲ୍ୟ ୧୦୦ ଡଲାର ଉପରେ ରହେ, ତେବେ ପାକିସ୍ତାନର ଜିଡିପି ଉପରେ ୧-୧.୫% ପ୍ରଭାବ ପଡ଼ିପାରେ । ପେଟ୍ରୋଲିୟମ୍ ଆମଦାନୀ ବୃଦ୍ଧି ଯୋଗୁଁ ପାକିସ୍ତାନକୁ ଆସନ୍ତା ବର୍ଷ ୧୨ରୁ ୧୪ ବିଲିୟନ ଡଲାର (୧ ଲକ୍ଷ ୩୦ ହଜାର କୋଟି ଟଙ୍କା) କ୍ଷତି ସହିବାକୁ ପଡ଼ିପାରେ ।

ପଢନ୍ତୁ ଏହି ଖବର: ଶେହବାଜ ସରିଫଙ୍କ ବଡ଼ ଘୋଷଣା, ପାକିସ୍ତାନରେ ରାତି ୮ଟା ପରେ ଲାଗୁ ହେବ ଲକ୍‌ଡାଉନ୍‌ !

• ଅନ୍ଧାରରେ ବୁଡ଼ିବାକୁ ଯାଉଛି ପାକିସ୍ତାନ

ଦେଶରେ ତେଲ, ଗ୍ୟାସ ସଙ୍କଟ ଏତେ ମାତ୍ରାରେ ବୃଦ୍ଧି ପାଇଛି ଯେ ପାକିସ୍ତାନର ଶେହବାଜ ଶରିଫ ସରକାରଙ୍କୁ କରୋନା ମହାମାରୀ ପରି ଶକ୍ତି ସଞ୍ଚୟ ନିୟମ ଲାଗୁ ହୋଇଛି । ସରକାର ପୂର୍ବରୁ ସାଂସଦ ଓ ମନ୍ତ୍ରୀଙ୍କ ଦରମା କାଟୁଥିବାବେଳେ ସରକାରୀ ବିଭାଗର ଖର୍ଚ୍ଚକୁ ମଧ୍ୟ ୨୦ ପ୍ରତିଶତ ହ୍ରାସ କରିଛନ୍ତି । ଏହାସହିତ ବିଜୁଳି ବଞ୍ଚାଇବା ଲାଗି ବୈଠକକୁ ଭର୍ଚ୍ଚୁଆଲ ଓ ଅନଲାଇନ ପାଠପଢା ଲାଗି ଆଦେଶ ଦେଇଛନ୍ତି । ମାତ୍ର ଏବେ ସ୍ଥିତି ଆହୁରି ଗମ୍ଭୀର ହେବାରେ ଲାଗିଛି । ସରକାର ଏକ ବଡ଼ ପଦକ୍ଷେପ ଗ୍ରହଣ ସ୍ଵରୂପ ଦେଶରେ ବଜାର ଓ ସପିଂ ମଲ୍ ଗୁଡ଼ିକୁ ରାତି ୮ଟା ପରେ ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି ଅର୍ଥାତ ଏବେ ରାତି ୮ଟା ବାଜିଲା ମାତ୍ରେ ଅନ୍ଧାର ହୋଇଯିବ ପାକିସ୍ତାନର ରାସ୍ତାଘାଟ ।

ଦେଖନ୍ତୁ ଏହି ଖବର: ମିଡିଆ ଆଗରେ କାନ୍ଦିଲେ ପାକିସ୍ତାନ ପ୍ରଧାନମନ୍ତ୍ରୀ !!! | Pakistan Crisis | Economic Crisis