School Students Death / ହଠାତ୍ ଭୁଶୁଡ଼ିଲା ସ୍କୁଲ ଛାତ; ୨୮ଜଣ ଛାତ୍ରଛାତ୍ରୀଙ୍କ ସହ ଜଣେ ଶିକ୍ଷୟିତ୍ରୀ ମୃତ, ବଢିପାରେ ମୃତ୍ୟୁ ସଂଖ୍ୟା

ଇସଲାମବାଦ: ପାକିସ୍ତାନର ପେଶାୱାରରେ ଭୁଶୁଡ଼ିଲା ଏକ ବେସରକାରୀ ସ୍କୁଲର ଛାତ । ଫଳରେ ୨୮ ଜଣ ଛାତ୍ରଛାତ୍ରୀ ଏବଂ ଜଣେ ମହିଳା ଶିକ୍ଷୟିତ୍ରୀଙ୍କ ସମେତ ଏଯାବତ ମୋଟ ୨୯ ଜଣଙ୍କର ମୃତ୍ୟୁ ହୋଇଛି । ଏହି ଭୟାବହ ଦୁର୍ଘଟଣାରେ ଏକାଧିକ ଜଣ ଗୁରୁତର ଭାବେ ଆହତ ହୋଇଛନ୍ତି । ପେଶାୱାରର ଆଫ୍ରିଦି ଆବାଦ୍ ଅଞ୍ଚଳରେ ଥିବା 'ଅଲ୍ ଖୈର ସ୍କୁଲ'ରେ ପିଲାମାନେ କ୍ଲାସରୁମ୍‌ରେ ପଢ଼ୁଥିବା ସମୟରେ ସ୍କୁଲର ଛାତଟି ସମ୍ପୂର୍ଣ୍ଣ ଭୁଶୁଡ଼ି ପଡ଼ିଥିଲା ।

ହଠାତ୍ ଏହି ଦୁର୍ଘଟଣା ଘଟିବା ପରେ ଶତାଧିକ ପିଲା ଧ୍ୱଂସାବଶେଷ ତଳେ ଚାପି ହୋଇ ରହିଯାଇଥିଲେ । ପ୍ରଶାସନ ପକ୍ଷରୁ ତୁରନ୍ତ ସେଠାରେ ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଛି । ପ୍ରଥମେ ଖବର ଆସିଥିଲା ୨୦ ଜଣଙ୍କ ମୃତ୍ୟୁ ଘଟିଛି, ତେବେ ସେହି ୨୦ ମୃତକଙ୍କ ମଧ୍ୟରେ ୧୮ ଜଣରୁ ଅଧିକ ବାଳକ ଏବଂ ୨ ଜଣ ବାଳିକା ରହିଛନ୍ତି, ଯେଉଁମାନଙ୍କ ବୟସ ମାତ୍ର ୭ରୁ ୧୨ ବର୍ଷ ମଧ୍ୟରେ ରହିଛି । ବର୍ତ୍ତମାନ ମୃତ୍ୟୁ ସଂଖ୍ୟା ବଢି ୨୯ରେ ପହଞ୍ଚିଛି । ଏମାନଙ୍କ ମଧ୍ୟରୁ ୨୮ ଜଣ ଛାତ୍ରଛାତ୍ରୀ ଓ ଜଣେ ଶିକ୍ଷୟିତ୍ରୀ ଅଛନ୍ତି । 

• ସମସ୍ତ ଛାତ୍ରଙ୍କ ବୟସ ୧୩ବର୍ଷରୁ କମ୍

ଲେଡି ରିଡିଙ୍ଗ ହସ୍ପିଟାଲର ମୁଖପାତ୍ର ମହମ୍ମଦ ଆସିମ କହିଛନ୍ତି ଯେ ଦୁର୍ଘଟଣାରେ ପ୍ରାଣ ହରାଇଥିବା ସମସ୍ତ ଛାତ୍ରଛାତ୍ରୀଙ୍କର ବୟସ ୧୩ ବର୍ଷରୁ କମ୍ । ଏହା ପୂର୍ବରୁ ରେସ୍କ୍ୟୁ ୧୧୨୨ର ମୁଖପାତ୍ର ବିଲାଲ ଅହମ୍ମଦ କହିଥିଲେ ଯେ ଛାତ୍ର ଭୁଶୁଡ଼ିବା ଯୋଗୁଁ ଏଯାବତ୍ ଛାତ୍ର ଓ ଶିକ୍ଷୟିତ୍ରୀଙ୍କୁ ମିଶାଇ ୨୦ ଜଣଙ୍କର ମୃତ୍ୟୁ ଘଟିଛି । ଭଗ୍ନାବଶେଷ ତଳେ ଅନେକ ଛାତ୍ରଛାତ୍ରୀ ଦବି ହୋଇ ରହିଛନ୍ତି ।

• କେତେବେଳେ ଘଟିଲା ଅଘଟଣ ?

ରିପୋର୍ଟ ଅନୁସାରେ, ଛାତ ଭୁଶୁଡ଼ିବା ସମୟରେ ପିଲାମାନେ କ୍ଲାସ୍ ଭିତରେ ପାଠ ପଢୁଥିଲେ । ଖୈବର ଫଖତୁନଖୱାର ଗଭର୍ଣ୍ଣର ଫୈଜଲ କରିମ୍ ଘଟଣାକୁ ନେଇ ଦୁଃଖ ପ୍ରକାଶ କରିଛନ୍ତି । ସେ କହିଛନ୍ତି ଯେ ଏହି ଘଟଣାରେ ବିସ୍ତୃତ ରିପୋର୍ଟ ମଗାଯାଇଛି । ଏହାସହିତ ଏହା କେଉଁ ପରିସ୍ଥିତିରେ ଘଟିଲା ସେ ସମ୍ପର୍କରେ ବିସ୍ତୃତ ସୂଚନା ପାଇଁ ନିର୍ଦ୍ଦେଶ ଦିଆଯାଇଛି । ଏହାସହିତ ଆହତ ଛାତ୍ରଛାତ୍ରୀଙ୍କ ଶୀଘ୍ର ସୁସ୍ଥତା ପାଇଁ ସେ କାମନା କରିଛନ୍ତି ଏବଂ ଚିକିତ୍ସା ସମ୍ବନ୍ଧୀୟ ସମସ୍ତ ସୁବିଧା ଯୋଗାଇଦେବା ଲାଗି ନିର୍ଦ୍ଦେଶ ଦେଇଛନ୍ତି ।

ପଢନ୍ତୁ ଏହି ଖବର: ନୃଶଂସ ପାଲଟିଲା ପ୍ରେମିକ; ପ୍ରେମିକାକୁ ୧୦୦୦ ଫୁଟ୍ ଗଭୀର ଖାତକୁ ଠେଲି ଦେଲା

• କଣ କହିଲେ ପ୍ରତ୍ୟକ୍ଷଦର୍ଶୀ ?

ଗଣମାଧ୍ୟମ ପ୍ରତିନିଧି ସହ କଥାବାର୍ତ୍ତା ସମୟରେ ଜଣେ ପ୍ରତ୍ୟକ୍ଷଦର୍ଶୀ ସମିଉଲ୍ଲାହ କହିଛନ୍ତି, "ଏ ସମ୍ପର୍କରେ ଖବର ପାଇବା ପରେ ସ୍ଥାନୀୟ ଲୋକଙ୍କ ସହ ଏଠାରେ ପହଞ୍ଚିଥିଲୁ । ମୁଁ ୮ ବର୍ଷର ତିନି ଜଣ ପିଲାଙ୍କୁ ଉଦ୍ଧାର କରିଛି । ସକାଳ ପ୍ରାୟ ୮.୫୦ଟାରେ ଏହି ଅଘଟଣ ଘଟିଥିଲା । ମୋତେ ଫୋନ ଆସିଥିଲା ଓ ମୋତେ ପହଞ୍ଚିବା ଲାଗି ୧୦ ମିନିଟ୍ ସମୟ ଲାଗିଥିଲା । ମୁଁ ସକାଳ ପ୍ରାୟ ୯ଟା ସୁଦ୍ଧା ସ୍କୁଲରେ ପହଞ୍ଚିଥିଲି । ଆମର ୬ଜଣ ପିଲା ଏହି ସ୍କୁଲରେ ପଢନ୍ତି । ଯେତେବେଳେ ମୁଁ ବିଲ୍ଡିଂ ଦେଖିଲି, ସେତେବେଳେ ମୋତେ ଲାଗିଲା ଗ୍ରାଉଣ୍ଡ ଫ୍ଲୋରରେ ପଢୁଥିବା ପୁଅର ମୃତ୍ୟୁ ଘଟିଛି । କିନ୍ତୁ ସେତେବେଳେ ସେ ପାଣି ପିଇବା ପାଇଁ କ୍ଲାସରୁ ବାହାରେ ଥିଲା ।"