ନୂଆଦିଲ୍ଲୀ: ପାକିସ୍ତାନ ଅଧିକୃତ କାଶ୍ମୀର (PoK) ଜଳୁଛି । କ୍ରମାଗତ ତୃତୀୟ ଦିନରେ ଚାଲିଛି ଆନ୍ଦୋଳନ । ପାକିସ୍ତାନ ସରକାରର ନୀତିକୁ ବିରୋଧ କରି ଲୋକେ ବିକ୍ଷୋଭ କରୁଛନ୍ତି । ଲୋକେ ମୌଳିକ ଅଧିକାର ମାଗୁଥିବା ବେଳେ ବିକ୍ଷୋଭ ଦମନ କରିବାକୁ ପାକିସ୍ତାନ ସେନା ଗୁଳିମାଡ଼ କରୁଛି ।

ତୃତୀୟ ଦିନରେ ପିଓକେରେ ଆନ୍ଦୋଳନ ଚାଲିଥିବା ବେଳେ ବାଘ ଜିଲ୍ଲାର ଧିରକୋଟରେ ୪ ଜଣ, ମୁଜାଫରବାଦ ଓ ମୀରପୁରରେ ୨ ଜଣ ଲେଖାଏଁଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ଏହା ପୂର୍ବରୁ ମଙ୍ଗଳବାର ମୁଜାଫରବାଦରେ ୨ ଜଣଙ୍କ ମୃତ୍ୟୁ ହୋଇଥିଲା । ଫଳରେ ପାକ୍ ସେନାର ଗୁଳିମାଡ଼ରେ ମୃତ୍ୟୁସଂଖ୍ୟା ୧୦କୁ ବୃଦ୍ଧି ପାଇଛି ।

ଯୁଗ୍ମ ଆୱାମୀ ଆକ୍ସନ୍ କମିଟି ପକ୍ଷରୁ ପିଓକେରେ ଏହି ବିକ୍ଷୋଭ କରାଯାଉଛି । ମୌଳିକ ଅଧିକାର ପ୍ରଦାନ ପାଇଁ ସରକାର ମନା କରୁଥିବାରୁ ଆୱାମୀ ଆକ୍ସନ କମିଟି ୭୨ ଘଣ୍ଟା ହେଲାଣି ବିରୋଧ କରୁଛି । ଦୋକାନ ବଜାର ସହ ବନ୍ଦ ରହିଛି ପରିବହନ ସେବା ।

ଏଥିସହ ପଢ଼ନ୍ତୁ: ନେପାଳ ପରେ ମଦଗସ୍କାର ସରକାରଙ୍କୁ ଗାଦିଚ୍ୟୁତ କଲେ GEN Z

ବୁଧବାର ସକାଳେ ପିଓକେରେ ଉତ୍ତେଜନା ଦେଖା ଦେଇଥିଲା । ବଡ଼ ବଡ଼ ସିପିଂ କଣ୍ଟେନର ଉପରକୁ ପଥର ଫିଙ୍ଗିଥିଲେ ପ୍ରଦର୍ଶନକାରୀ । ମୁଜାଫରବାଦରେ ଆନ୍ଦୋଳନକୁ ରୋକିବା ପାଇଁ ବଡ଼ ବଡ଼ କଣ୍ଟେନର ରକା ଯାଇଥିବା ବେଳେ ପଥର ଫିଙ୍ଗିଥିଲେ । ଏପରିକି ବଡ଼ ବଡ଼ ସିପିଂ କଣ୍ଟେନରକୁ ଆନ୍ଦୋଳନକାରୀ ନଦୀ ଗର୍ଭକୁ ଠେଲି ଦେଇଛନ୍ତି ।

ଗୁଳିମାଡ଼ରେ ୧୦ ଜଣଙ୍କ ମୃତ୍ୟୁ ପାଇଁ ପାକ୍ ରେଞ୍ଜର୍ସକୁ ଦାୟୀ କରିଛି ଯୁଗ୍ମ ଆୱାମୀ ଆକ୍ସନ୍ କମିଟି । କମିଟି କହିଛି, ମୁଜାଫରବାଦରେ ପାକ୍ ରେଞ୍ଜର୍ସ ଖୋଲାଖୋଲି ଗୁଳିମାଡ଼ କରିଥିବା ବେଳେ ପାକିସ୍ତାନ ସେନା ସାଧାରଣ ଲୋକଙ୍କ ଉପରେ ଗୁଳିଗୋଳା ମାଡ଼ କରିଛି ।

ତେବେ ସେନାର ଗୁଳିମାଡ଼ ସତ୍ତ୍ଵେ ମୌଳିକ ଅଧିକାର ସହ ୩୮ଟି ଦାବି ନେଇ ମୁଜାଫରବାଦରେ ଲୋକେ ଆନ୍ଦୋଳନରୁ ଓହରି ନାହାନ୍ତି । ଆଉ ଏହି ଦାବି ଭିତରେ ରହିଛି ପାକିସ୍ତାନରେ ରହୁଥିବା କାଶ୍ମୀରୀ ଶରଣାର୍ଥୀଙ୍କ ଲାଗି ପିଓକେ ବିଧାନସଭାରେ ସଂରକ୍ଷିତ ୧୨ଟି ଆସନକୁ ହଟାଇ ଦେବା ।

ଆନ୍ଦୋଳନକାରୀ କହିଛନ୍ତି, "ବିଗତ ୭୦ ବର୍ଷ ହେଲା ଆମକୁ ଆମ ମୌଳିକ ଅଧିକାର ମିଳୁ ନାହିଁ । ଆମକୁ ଆମ ଅଧିକାର ଦିଅ ନହେଲେ ଲୋକଙ୍କ ରୋଷର ଶିକାର ହୁଅ ।" ଏପରିକି ଲୋକେ ସିଧା ସିଧା ପ୍ରଧାନମନ୍ତ୍ରୀ ଶେହବାଜ ସରିଫଙ୍କୁ ମଧ୍ୟ ଏଥିପାଇଁ ଚେତାବନୀ ଦେଇଛନ୍ତି ।

ଏଥିସହ ପଢ଼ନ୍ତୁ: ପୁଣି ପାକିସ୍ତାନରେ ବିସ୍ଫୋରଣ, ସେନା ଘାଟି ଉପରେ ହୋଇଛି ଆକ୍ରମଣ !

ଆନ୍ଦୋଳନ ହେଉଛି ପ୍ଲାନ୍- "ଏ" ଯାହା ଲୋକଙ୍କ ଧୈର୍ଯ୍ୟ ଭଙ୍ଗର, ଏବେ କର୍ତ୍ତୃପକ୍ଷ ଲୋକଙ୍କ ନୋଟିସ୍‌ରେ । ଆଉ କମିଟି ପାଖରେ ପ୍ଲାନ୍- "ଡି" ବି ଥିବା ଆନ୍ଦୋଳନକାରୀ କହିଛନ୍ତି । ମୁଜାଫରବାଦ ଗୁଳିମାଡ଼କୁ ନେଇ କମିଟି କହିଛି, "ଏହା ପଛରେ ମୁସଲିମ୍ କନଫରେନ୍ସ ସହ ISI ରହିଛି ।"

ଗୁଳିମାଡ଼ରେ ମୃତକଙ୍କ ପରିବାରକୁ କ୍ଷତିପୂରଣ ସହ ସରକାରୀ ଚାକିରି ଯୋଗାଇ ଦେବାକୁ ଆୱାମୀ କମିଟି ଦାବି କରିଛି । ଏପରିକି ଆନ୍ଦୋଳନ ବେଳେ ନିହତ ୨ ପୋଲିସ କର୍ମୀଙ୍କୁ ସମାନ କ୍ଷତିପୂରଣ ଦେବାକୁ ଦାବି ହୋଇଛି । ଗିରଫ ଆନ୍ଦୋଳନକାରୀଙ୍କୁ ମୁକ୍ତ କରିବାକୁ ଦାବି କରିଛନ୍ତି ।

ଗୁରୁବାର ପାକିସ୍ତାନ ସ୍ଥିତ ଲଣ୍ଡନ ଦୂତାବାସ ସମ୍ମୁଖରେ ପ୍ରତିବାଦ ପାଇଁ ଯୁଗ୍ମ ଆୱାମୀ ଆକ୍ସନ କମିଟି ନିଷ୍ପତ୍ତି ନେଇଛି । ସେପଟେ ପିଓକେ ସହ ପଞ୍ଜାବ ପ୍ରଦେଶରେ ସେନା ପକ୍ଷରୁ ଫ୍ଲାଗ୍ ମାର୍ଚ୍ଚ ଆରମ୍ଭ ହୋଇଛି । ଇସଲାମାବାଦରୁ ସେନାକୁ ଅନ୍ୟତ୍ର ସ୍ତାନାନ୍ତର କରାଯାଉଛି ।

ନିକଟରେ ଖୈବର ପଖତୁନଖ୍ଵାର ଦୁର୍ଗମ ଅଞ୍ଚଳରେ ଚୀନ ନିର୍ମିତ ଜେ-୧୭ ଯୁଦ୍ଧ ବିମାନରୁ ଏଲଏସ୍-୬ ଲେଜର୍ ଗାଇଡେଡ୍ ବମ୍ ପଡ଼ିଥିଲା । ଯେଉଁଥିରେ ୩୦ ଜଣଙ୍କ ମୃତ୍ୟୁ ପରେ ଲୋକେ ତାତିଥିଲେ । ଏହାଛଡ଼ା ଖୈବର ପଖତୁନଖ୍ଵାରେ ବଢ଼ୁଥିବା ଆତଙ୍କବାଦୀ ଗତିବିଧକୁ ନେଇ ଲୋକଙ୍କ ଧୈର୍ଯ୍ୟ ତୁଟିଲାଣି । କାରଣ ଭାରତର ଅପରେସନ୍ ସିନ୍ଦୂର ପରେ ପିଓକେ ଛାଡ଼ି ଏବେ ଜୈଶ ସହ ପ୍ରାୟ ଆତଙ୍କବାଦୀ ଗୋଷ୍ଠୀ ଖୈବର ପଖତୁନଖ୍ଵା ମୁହାଁ ହୋଇଛନ୍ତି ।