Burqa Ban / ଫ୍ରାନ୍ସ ପରେ ଏଠି ବି ବ୍ୟାନ୍ ହେଲା ବୁର୍ଖା, କେହି ବି ମୁହଁ ଲୁଚେଇ ପାରିବେନି, ନଚେତ୍...

ୟୁରୋପୀୟ ଦେଶ ପର୍ତ୍ତୁଗାଲରେ 'ବୁର୍ଖା ଆଇନ' ଲାଗୁ ହୋଇସାରିଛି । ପର୍ତ୍ତୁଗାଲର ରାଷ୍ଟ୍ରପତି ଏହି ଆଇନ ଉପରେ ମୋହର ମାରିଛନ୍ତି । ଏହି ଆଇନ ମୁତାବକ ପର୍ତ୍ତୁଗାଲର ସାର୍ବଜନୀନ ସ୍ଥାନରେ ମୁହଁ ଲୁଚାଇବା ଉପରେ ରୋକ ଲଗାଯାଇଛି । ବିଶେଷ କରି ବୁର୍ଖା ଦ୍ଵାରା ପୂରା ମୁହଁ ଲୁଚାଉଥିବା ମୁସଲିମ ଧର୍ମାବଲମ୍ବୀର ମହିଳାଙ୍କୁ ରୋକାଯିବ । ରାଷ୍ଟ୍ରପତି ଅନ୍ତୋନିୟୋ ସେଗୁରୋ ଏହି ଆଇନ ଲାଗୁ କରିବା ସମୟରେ କହିଛନ୍ତି ଜଣେ ବ୍ୟକ୍ତିର ମୁହଁକୁ ତାର ପରିଚୟ ଓ ଭାବ ବିନିମୟର ମୁଖ୍ୟ ଅଂଶ ଭାବେ ବିବେଚନା କରାଯାଏ ।

• କଣ ବୁର୍ଖା ଆଇନ ?

ସାଧାରଣତଃ ମୁସଲିମ ସମ୍ପ୍ରଦାୟର କିଛି ମହିଳା ନିଜ ଶରୀର ଓ ମୁହଁକୁ ଲୁଚାଇବା ଲାଗି ବୁର୍ଖା ପିନ୍ଧିଥାନ୍ତି । ଏଥିଲାଗି ଲାଗୁ ହୋଇଥିବା ଆଇନର ନାମ ବୁର୍ଖା ଆଇନ ରଖାଯାଇଛି । ଏହି ଆଇନକୁ ଜୁଲାଇରେ ମଞ୍ଜୁରୀ ମିଳିଛି । ଆଇନ ଅନୁସାରେ ସାର୍ବଜନୀନ ସ୍ଥାନଗୁଡ଼ିକରେ ବୁର୍ଖା ପିନ୍ଧିପାରିବେ ନାହିଁ ମୁସଲିମ ମହିଳା । କାରଣ ବୁର୍ଖା ପିନ୍ଧିବା ଦ୍ଵାରା ଜଣେ ବ୍ୟକ୍ତିଙ୍କ ପରିଚୟକୁ ଖୁବ ସହଜରେ ଗୋପନୀୟ ରଖାଯାଇହେବ । ଏହାବ୍ୟତୀତ କୌଣସି ବ୍ୟକ୍ତିଙ୍କୁ ତାଙ୍କର ଲିଙ୍ଗ, ଧର୍ମ, ବୟସ କାରଣରୁ ମୁହଁ ଲୁଚାଇବାକୁ ବାଧ୍ୟ କରାଯାଇପାରିବ ନାହିଁ ।

• ନିୟମ ନ ମାନିଲେ କଣ ହେବ ?

ରାଷ୍ଟ୍ରପତି ସେଗୁରୋ କହିଛନ୍ତି ଯେ ଏହି ପ୍ରସଙ୍ଗଟି ସାମାଜିକ ଓ ସାଂସ୍କୃତିକ ରୂପରେ ବେଶ ସମ୍ବେଦନଶୀଳ । ପର୍ତ୍ତୁଗାଲରେ ଏହି ନିୟମର ଉଲ୍ଲଙ୍ଘନକାରୀଙ୍କ ବିରୁଦ୍ଧରେ ୧୫୦ରୁ ୩୦୦୦ ୟୁରୋ ପର୍ଯ୍ୟନ୍ତ ଜୋରିମାନା ଆଦାୟ କରାଯିବ । ଯଦି ଆମେ ଭାରତୀୟ ମୁଦ୍ରାରେ କହିବା ତେବେ ଏହି ରାଶି ୧୭ ହଜାରରୁ ଆରମ୍ଭ କରି ୩.୩୫ ଲକ୍ଷ ପର୍ଯ୍ୟନ୍ତ ରହିଛି । ତଥାପି ଆଇନରେ କିଛି ଜିନିଷ ଉପରେ ଏହି ଆଇନକୁ କୋହଳ କରାଯାଇଛି । ଯେପରିକି ସ୍ଵାସ୍ଥ୍ୟ, କାମ, କଳା ଓ ପାଣିପାଗ ସହିତ ଜଡ଼ିତ ସ୍ଥିତିରେ ମୁହଁ ଲୁଚାଯାଇହେବ । ଏପରିକି ଧାର୍ମିକ ସ୍ଥାନ ଓ ବିମାନ ବନ୍ଦରରେ ଏହି ଆଇନକୁ କୋହଳ କରାଯାଇଛି ।

ପଢନ୍ତୁ ଏହି ଖବର: ବିଗୁଡିଛି ପାକିସ୍ତାନ ପୂର୍ବତନ ପ୍ରଧାନମନ୍ତ୍ରୀ ଇମ୍ରାନଙ୍କ ଶରୀର; ସ୍ତ୍ରୀକୁ ଭେଟିବାକୁ କଲେ ଦାବି

ଏଠାରେ କହିରଖୁଛୁ କି, ଭାରତରେ ବୁର୍ଖା ପିନ୍ଧିବା ଉପରେ କୌଣସି ପ୍ରତିବନ୍ଧକ ଲଗାଯାଇନାହିଁ । ଧାର୍ମିକ ଓ ବ୍ଯକ୍ତିଗତ ସ୍ଵତନ୍ତ୍ରତା ଦୃଷ୍ଟିରୁ ଲୋକେ ଏହାକୁ ପିନ୍ଧିପାରିବେ । ମାତ୍ର ଫ୍ରାନ୍ସ, ବେଲଜିୟମ, ପର୍ତ୍ତୁଗାଲ ଓ ସ୍ଵିଜରଲ୍ୟାଣ୍ଡ ପରି କିଛି ୟୁରୋପୀୟ ଦେଶଗୁଡ଼ିକରେ ସାର୍ବଜନୀନ ସ୍ଥାନରେ ବୁର୍ଖା ପିନ୍ଧିବା ବା ଚେହେରାକୁ ସମ୍ପୂର୍ଣ୍ଣ ଭାବେ ଲୁଚାଇବା ବେଆଇନ । ଏହାଦ୍ଵାରା ନିୟମ ଉଲ୍ଲଙ୍ଘନକାରୀଙ୍କୁ ମୋଟା ଅଙ୍କର ଜୋରିମାନା ଦେବାକୁ ପଡ଼ିଥାଏ ।