Argus News - ଯେଉଁ ଦେଶକୁ କବ୍‌ଜା କରିବାକୁ ଚାହୁଁଛି ଆମେରିକା, ତା'କୁ ସାହାଯ୍ୟ କଲା ଋଷ

ନୂଆଦିଲ୍ଲୀ: ତୈଳ ଓ ବିଦ୍ୟୁତ୍ ଭଳି ଅନ୍ୟ ଶକ୍ତିକୁ ନେଇ ସଂକଟରେ ଫସିଥିବା କ୍ୟୁବାକୁ ଆଶ୍ଵସ୍ତି ମିଳିଛି । ପ୍ରାୟ ୩ ମାସ ପରେ କ୍ୟୁବାରେ ପହଞ୍ଚିଛି ତୈଳବାହୀ ଜାହାଜ । ଋଷର ତୈଳ ଟ୍ୟାଙ୍କର 'ଅନାତୋଲି କୋଲୋଡକିନ' ଏକ ଲକ୍ଷ ମେଟ୍ରିକ୍ ଟନ୍ ଅଶୋଧିତ ତୈଳ ନେଇ ପହଞ୍ଚିଛି । ଏନେଇ ଋଷର ପରିବହନ ମନ୍ତ୍ରଣାଳୟ ସ୍ପଷ୍ଟ କରିଛି ।

ସୂଚନା ଅନୁସାରେ, ବିଗତ ୩ ମାସ ହେଲା କ୍ୟୁବାରେ କୌଣସି ତୈଳବାହୀ ଜାହାଜ ପହଞ୍ଚି ନଥିଲା । ଏହା ପଛରେ ବାଧକ ସାଜିଥିଲେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । କ୍ୟୁବା ଉପରେ ଆମେରିକା ଏକ ପ୍ରକାର ପ୍ରତିବନ୍ଧକ ଲଗାଇ ଦେଶକୁ ଅନ୍ଧାର ଭିତରକୁ ଠେଲି ଦେଇଥିଲା ।

ଏଥିସହ ପଢ଼ନ୍ତୁ: ଅନ୍ଧାରରେ ବୁଡ଼ିଲା କ୍ୟୁବା; କାହିଁକି ଅଚାନକ ହୋଇଗଲା ବ୍ଲାକଆଉଟ୍?

ଧମକ, ଟାରିଫ୍ ଓ ପ୍ରତିବନ୍ଧକ

ଜାନୁଆରୀରେ ଭେନେଜୁଏଲା ରାଷ୍ଟ୍ରପତି ନିକୋଲସ ମାଦୁରୋଙ୍କୁ ଆମେରିକା ଅପହରଣ କରିଥିଲା । ଏହାପରେ ଭେନେଜୁଏଲାରୁ କ୍ୟୁବାକୁ ତୈଳ ରପ୍ତାନୀ ବନ୍ଦ କରି ଦେଇଥିଲା । ଏହାପରେ ଟ୍ରମ୍ପ ଧମକ ଦେଇଥିଲେ ଯେ, ଯିଏ କ୍ୟୁବାକୁ ତୈଳ ପଠାଇବ ତା'ଉପରେ ଅଧିକ ଟାରିଫ୍ ଲାଗିବ । ଏହି ଡରରେ କ୍ୟୁବାକୁ ସର୍ବାଧିକ ତୈଳ ରପ୍ତାନୀ କରୁଥିବା ମେକ୍ସିକୋ ରପ୍ତାନୀ ବନ୍ଦ କରି ଦେଇଥିଲା ।

ବିଦ୍ୟୁତ୍ ସଂକଟ

ଫଳରେ ୧୦ କୋଟି ଜନସଂଖ୍ୟା ବିଶିଷ୍ଟ ଏହି ଛୋଟ ଦେଶରେ ବିଦ୍ୟୁତ୍ ସଂକଟ ଗମ୍ଭୀର ରୂପ ନେଇଥିଲା । କ୍ୟୁବା ଘଣ୍ଟା ଘଣ୍ଟା ଧରି ଅନ୍ଧାରରେ ରହିବାକୁ ବାଧ୍ୟ ହୋଇଥିଲା । ପେଟ୍ରୋଲ୍ ବିକ୍ରିରେ କଡ଼ା ନିୟମ ଆପଣା ଯାଇଥିଲ । ଆଉ ଏଥିରେ ସର୍ବାଧିକ ପ୍ରଭାବିତ ହୋଇଥିଲେ ମେଡିକାଲ୍‌ରେ ଚିକିତ୍ସିତ ରୋଗୀ ।

ଏଥିସହ ପଢ଼ନ୍ତୁ: ଭେନୁଜଏଲା-ଇରାନ ପରେ ଆମେରିକା ନଜରରେ କ୍ୟୁବା; ସାମ୍ଭାବ୍ୟ ଯୁଦ୍ଧ ପାଇଁ ଚାଲିଛି ପ୍ରସ୍ତୁତି

ହଠାତ୍ ବଦଳିଲା ଟ୍ରମ୍ପଙ୍କ ସ୍ଵର

କ୍ୟୁବା ଶକ୍ତି ସଂକଟ ସହ ଜୁଝୁଥିବା ବେଳେ ରବିବାର ହଠାତ୍ ଟ୍ରମ୍ପ ମନ ବଦଳାଇ ଦେଇଥିଲେ । କହିଥିଲେ, "କୌଣସି ଦେଶ କ୍ୟୁବାକୁ ତୈଳ ପଠାଇଲେ ଆମେରିକାର ଆପତ୍ତି ନାହିଁ ।" ଟ୍ରମ୍ପଙ୍କ ବୟାନ ପରେ ତତ୍‌କ୍ଷଣାତ ଋଷର ତୈଳବାହୀ ଜାହାଜ କ୍ୟୁବା ଉପକୂଳ ଆଡ଼କୁ ଯାଇଛି ।

କ୍ଯୁବା ରାଷ୍ଟ୍ରପତି ମିଗେଲ ଡିୟାଜ ଖାନେଲ ପୂର୍ବରୁ କହିଥିଲେ ଯେ, ୩ ମାସ ହେଲା କୌଣସି ତୈଳ ଜାହାଜ ଆସି ନଥିବାରୁ ଦେଶରେ ଗମ୍ଭୀର ସଂକଟ ଦେଖା ଦେଇଛି । ଏବେ ଋଷ ତୈଳ ପହଞ୍ଚିବା ପରେ କ୍ୟୁବାକୁ ବିଦ୍ୟୁତ୍‌ ସଂକଟରୁ କିଛିଟା ଆଶ୍ଵସ୍ତି ମିଳିବା ଆଶା କରାଯାଉଛି ।