Middle East War / ଚାପରେ ମୁଣ୍ଡ ନୁଆଁଇଲାନି ଶ୍ରୀଲଙ୍କା, ଆମେରିକା ଯୁଦ୍ଧ ବିମାନକୁ ଅବତରଣ ପାଇଁ ଦେଲାନି ଅନୁମତି

ଜଳୁଛି ମଧ୍ୟପ୍ରାଚ୍ୟ । ଇସ୍ରାଏଲର ଘନଘନ ମିସାଇଲ ମାଡ଼ରେ ଥରୁଛି ଇରାନ । ସେପଟେ ଇରାନ ମଧ୍ୟ ଇସ୍ରାଏଲ ଉପରେ ପ୍ରତିଆକ୍ରମଣ ଜାରି ରଖିଛି । ତେବେ ଯୁଦ୍ଧ ମଧ୍ୟରେ ବଡ଼ ବୟାନ ଦେଇଛନ୍ତି ଶ୍ରୀଲଙ୍କା ରାଷ୍ଟ୍ରପତି ଅନୁରା କୁମାରା ଦିସାନାୟକେ । ସେ କହିଛନ୍ତି, ଆମେରିକା ଦକ୍ଷିଣ-ପୂର୍ବ ଶ୍ରୀଲଙ୍କାର ମାଟାଲା ଅନ୍ତର୍ଜାତୀୟ ବିମାନବନ୍ଦରରେ ତା'ର ଦୁଇଟି ଯୁଦ୍ଧବିମାନ ଅବତରଣ କରିବାକୁ ଚାହୁଁଥିଲା । କିନ୍ତୁ ସେ ଶ୍ରୀଲଙ୍କା ମାଟିରେ ଆମେରିକା ଯୁଦ୍ଧ ଜାହାଜ ଅବତରଣ କରିବାକୁ ଅନୁମତି ଦେବାକୁ ମନା କରିଦେଇଥିଲେ ।

ଶ୍ରୀଲଙ୍କା ରାଷ୍ଟ୍ରପତି ଶୁକ୍ରବାର ସଂସଦରେ ଏହି ବୟାନ ଦେଇଛନ୍ତି । ସଂସଦରେ ଏହି ନିଷ୍ପତ୍ତି ଘୋଷଣା କରି ରାଷ୍ଟ୍ରପତି ଅନୁରା କୁମାର ଦିସାନାୟକେ କହିଛନ୍ତି ଯେ ଦୁଇଟି ଆମେରିକୀୟ ଯୁଦ୍ଧବିମାନ ୪ ଏବଂ ୮ ମାର୍ଚ୍ଚରେ ଜିବୋଟିରୁ ଶ୍ରୀଲଙ୍କାରେ ଅବତରଣ କରିବାକୁ ଅନୁମତି ମାଗିଥିଲେ, କିନ୍ତୁ ଉଭୟ ଅନୁରୋଧକୁ ପ୍ରତ୍ୟାଖ୍ୟାନ କରାଯାଇଥିଲା ।

ରାଷ୍ଟ୍ରପତି କହିଛନ୍ତି, "ଅନେକ ଚାପ ସତ୍ତ୍ୱେ, ଆମେ ଆମର ନିରପେକ୍ଷତା ବଜାୟ ରଖିବାକୁ ଚାହୁଁଛୁ। ଆମେ ହାର ମାନିବୁ ନାହିଁ। ମଧ୍ୟପ୍ରାଚ୍ୟରେ ଯୁଦ୍ଧ ଚ୍ୟାଲେଞ୍ଜ ସୃଷ୍ଟି କରେ, କିନ୍ତୁ ଆମେ ନିରପେକ୍ଷ ରହିବାକୁ ଯଥାସମ୍ଭବ ଚେଷ୍ଟା କରିବୁ । ସେମାନେ ଜିବୋଟିର ଏକ ଘାଟିରୁ ଆଠଟି ଆଣ୍ଟି-ସିପ୍‌ କ୍ଷେପଣାସ୍ତ୍ର ସହିତ ସଜ୍ଜିତ ଦୁଇଟି ଯୁଦ୍ଧବିମାନ ମାଟାଲା ଅନ୍ତର୍ଜାତୀୟ ବିମାନବନ୍ଦରକୁ ଆଣିବାକୁ ଚାହୁଁଥିଲେ କିନ୍ତୁ ଆମେ ଅବତରଣ ପାଇଁ ଅନୁମତି ଦେବାକୁ ସିଧାସଳଖ ମନା କରିଦେଇଥିଲୁ"।

ଦକ୍ଷିଣ ଏବଂ ମଧ୍ୟ ଏସିଆ ପାଇଁ ଆମେରିକାର ସ୍ୱତନ୍ତ୍ର ଦୂତ ସର୍ଗିଓ ଗୋରଙ୍କ ସହ ସାକ୍ଷାତ କରିବାର ଗୋଟିଏ ଦିନ ପରେ ଦିସାନାୟକେଙ୍କ ବିବୃତ୍ତି ସାମ୍ନାକୁ ଆସିଛି ।
ଏହି ଘଟଣା ମଧ୍ୟରେ ମାର୍ଚ୍ଚ ୪ ତାରିଖରେ ଆମେରିକା ଦକ୍ଷିଣ ଶ୍ରୀଲଙ୍କାର ଉପକୂଳବର୍ତ୍ତୀ ସହର ଗାଲେରେ ଇରାନୀ ଜାହାଜ IRIS ଡେନାକୁ ଟାର୍ଗେଟ କରିଥିଲା । ଏହି ଆକ୍ରମଣରେ ୮୪ ଜଣ ନାବିକଙ୍କ ମୃତ୍ୟୁ ହୋଇଥିଲା, ଯେତେବେଳେ ୩୨ ଜଣଙ୍କୁ ଉଦ୍ଧାର କରାଯାଇଥିଲା । ଏହି ଜାହାଜଟି ଭାରତର ବିଶାଖାପାଟଣାରେ ଅନୁଷ୍ଠିତ ଏକ ନୌସେନା ନୌବାହିନୀ ସମୀକ୍ଷାରେ ଅଂଶଗ୍ରହଣ କରି ଇରାନ ଫେରୁଥିଲା ।

ଏହାର କିଛି ଦିନ ପରେ ୨୧୯ ଜଣ ନାବିକଙ୍କୁ ନେଇ ଅନ୍ୟ ଏକ ଇରାନୀ ଜାହାଜ IRIS ବୁଶେହର କଲମ୍ବୋ ବନ୍ଦରରେ ପ୍ରବେଶ କରିବାକୁ ଅନୁମତି ଦେବାକୁ ଅନୁରୋଧ କରିଥିଲା । କିନ୍ତୁ ଶ୍ରୀଲଙ୍କା ଏହାକୁ କଲମ୍ବୋ ଉପକୂଳରେ ଲଙ୍ଗର ପକାଇ ତ୍ରିଙ୍କୋମାଲିର ପୂର୍ବ ବନ୍ଦରକୁ ଯିବାକୁ ନିର୍ଦ୍ଦେଶ ଦେଇଥିଲା । ବର୍ତ୍ତମାନ ଜାହାଜର ୨୦୪ ଜଣ ନାବିକଙ୍କୁ କଲମ୍ବୋ ନିକଟସ୍ଥ ଏକ ନୌସେନା ପ୍ରତିଷ୍ଠାନରେ ରଖାଯାଇଛି ।

ଏଥିସହ ପଢ଼ନ୍ତୁ: ବଡ଼ ଯୁଦ୍ଧ ପାଇଁ ଉତ୍ତର କୋରିଆର ପ୍ରସ୍ତୁତି ! ଝିଅ ଚଳାଉଛି ଟ୍ୟାଙ୍କ, ହସୁଛନ୍ତି କିମ୍