Trump Rejects Chinese Gifts / ଜାସୁସୀ ଆଶଙ୍କା, ଚୀନର ଉପହାରକୁ ଡଷ୍ଟବିନରେ ଫିଙ୍ଗିଦେଲେ ଟ୍ରମ୍ପ !

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଚୀନ୍ ଗସ୍ତ ଶେଷ ହୋଇଛି । କିନ୍ତୁ ଟ୍ରମ୍ପ ଚୀନ୍ ଛାଡ଼ିବା ପୂର୍ବରୁ ସେଠାରେ ତାଙ୍କୁ ମିଳିଥିବା ଉପହାର, ବ୍ୟାଜ୍ ଓ ବୈଦ୍ୟୁତିକ ସାମଗ୍ରୀ ଗୁଡିକୁ ଏୟାରଫୋର୍ସ ଓ୍ବାନ୍ ବିମାନରେ ଚଢିବା ପୂର୍ବରୁ ଡଷ୍ଟବିନରେ ଫୋପାଡି ନଷ୍ଟ କରିଛନ୍ତି ।

ସୁରକ୍ଷା ଏବଂ ଜାସୁସୀ ଆଶଙ୍କା କରି ତାଙ୍କ ପ୍ରତିନିଧି ଦଳ ଚୀନ୍ ପକ୍ଷରୁ ମିଳିଥିବା ସମସ୍ତ ଉପହାରକୁ ନଷ୍ଟ କରିଥିବା କୁହାଯାଉଛି । ଆମେରିକୀୟ ଗଣମାଧ୍ୟମ ଅନୁଯାୟୀ, ଚୀନ୍ ଗସ୍ତ ସମୟରେ ଟ୍ରମ୍ପ ଓ ତାଙ୍କ ଟିମକୁ ମିଳିଥିବା ମୋବାଇଲ୍ ଫୋନ୍, ପ୍ରତିନିଧି ମଣ୍ଡଳୀ ପିନ୍, ବ୍ୟାଜ୍ ଏବଂ ଅନ୍ୟାନ୍ୟ ସାମଗ୍ରୀକୁ ବିମାନରେ ପ୍ରବେଶ କରିବାକୁ ଅନୁମତି ଦିଆଯାଇ ନଥିଲା । ଚୀନ୍ ସରକାରଙ୍କ ଦ୍ଵାରା ଦିଆଯାଇଥିବା ବୈଦ୍ୟୁତିକ ଉପକରଣ ମାଧ୍ୟମରେ ଡାଟା ଚୋରି ବା ଜାସୁସୀ ହେବାର ଆଶଙ୍କା ଥିବାରୁ ଏହାକୁ ଆମେରିକାର ହାଇ-ଲେଭଲ୍ ସିକ୍ୟୁରିଟି ପ୍ରୋଟୋକଲ୍ ଅଧୀନରେ ନଷ୍ଟ କରାଯାଇଛି ।

ଅଧିକ ପଢ଼ନ୍ତୁ: ଚୀନରେ ପହଞ୍ଚିଲେ ଟ୍ରମ୍ପ, ସ୍ବାଗତ କରିବାକୁ ଆସିଲେନି ସି ଜିନପିଙ୍ଗ

ଏୟାର ଫୋର୍ସ ୱାନ୍‌ର ପାହାଚ ନିକଟରେ ହିଁ ସମସ୍ତ ଗିଫ୍ଟ ଓ ବର୍ନର୍ ଫୋନ୍‌ଗୁଡ଼ିକୁ ଡଷ୍ଟବିନରେ ପକାଇ ଦିଆଯାଇଥିବା ଦେଖିବାକୁ ମିଳିଥିଲା । ଚୀନ୍ ରାଷ୍ଟ୍ରପତି ସି ଜିନପିଙ୍ଗ ଓ ଡୋନାଲ୍ଡ ଟ୍ରମ୍ପଙ୍କ ମଧ୍ୟରେ ଅନେକ ଗୁରୁତ୍ଵପୂର୍ଣ୍ଣ ପ୍ରସଙ୍ଗରେ ବୈଠକ ସଫଳ ହୋଇଥିଲେ ମଧ୍ୟ ସୁରକ୍ଷା ଦୃଷ୍ଟିରୁ ଏହି କଡ଼ା ପଦକ୍ଷେପ ନିଆଯାଇଛି ।

ଆମେରିକା ଅଧିକାରୀ ଏବଂ ହ୍ୱାଇଟ୍ ହାଉସ୍ ରିପୋର୍ଟରମାନେ ଗସ୍ତ ସମୟରେ ପାଇଥିବା ଅନେକ ଜିନିଷପତ୍ରକୁ ଫିଙ୍ଗି ଦେଇଥିଲେ, ଯେଉଁଥିରେ ଷ୍ଟାଫ୍ ବର୍ନର ଫୋନ୍, କାର୍ଯ୍ୟକ୍ରମ କଭରେଜ୍ କରିବା ସମୟରେ ଦିଆଯାଇଥିବା ପରିଚୟପତ୍ର ଏବଂ ଚୀନ୍ ଦ୍ୱାରା ଜାରି କରାଯାଇଥିବା ଲାପେଲ୍ ପିନ୍ ଅନ୍ତର୍ଭୁକ୍ତ । ହ୍ୱାଇଟ୍ ହାଉସ୍ ପୁଲ୍ ରିପୋର୍ଟରଙ୍କ ଅନୁଯାୟୀ, ବେଜିଂ କ୍ୟାପିଟାଲ ବିମାନବନ୍ଦରରୁ ପ୍ରସ୍ଥାନ କରିବା ପୂର୍ବରୁ ଏହି ଜିନିଷଗୁଡ଼ିକୁ ବିମାନର ସିଡ଼ି ନିକଟରେ ଏକ ଡଷ୍ଟବିନ୍‌ରେ ଫିଙ୍ଗି ଦିଆଯାଇଥିଲା ।

ନ୍ୟୁୟର୍କ ପୋଷ୍ଟ ହ୍ୱାଇଟ୍ ହାଉସ୍ ସମ୍ବାଦଦାତା ଏମିଲି ଗୁଡିନ୍ X ରେ ଏକ ପୋଷ୍ଟରେ ଲେଖିଛନ୍ତି, "ବେଜିଂ ଛାଡିବା ପାଇଁ ଏୟାର ଫୋର୍ସ ୱାନରେ ଚଢିବା ପୂର୍ବରୁ, ସମଗ୍ର ଆମେରିକୀୟ ପ୍ରତିନିଧି ଦଳ ସେମାନଙ୍କ ଚୀନ୍ ଆତିଥ୍ୟଙ୍କ ଦ୍ୱାରା ଦିଆଯାଇଥିବା ସମସ୍ତ ଜିନିଷକୁ ଫିଙ୍ଗି ଦେଇଥିଲେ । ଉପହାର, ବ୍ୟାଜ୍, ପିନ୍ ଏବଂ ସ୍ମାରକୀ ସବୁକୁ ବିମାନରେ ଏକ ଡଷ୍ଟବିନ୍‌ରେ ଫିଙ୍ଗି ଦିଆଯାଇଥିଲା। ଏହା ନିର୍ଦ୍ଦେଶ ଦିଆଯାଇଥିଲା । ବିମାନରେ ଚୀନରେ ତିଆରି କୌଣସି ଜିନିଷକୁ ଅନୁମତି ଦିଆଗଲା ନାହିଁ ।