ପଶ୍ଚିମ ଏସିଆରେ ଉତ୍ତେଜନା ମଧ୍ୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବଡ଼ ବୟାନ । ଆଉ କିଛି ସମୟ ମିଳିଲେ ଆମେରିକା ଗୁରୁତ୍ଵପୂର୍ଣ୍ଣ ସାମୁଦ୍ରିକ ପଥ ହର୍ମୁଜ ପ୍ରଣାଳୀ ଖୋଲିଦେବ ବୋଲି ଟ୍ରମ୍ପ ନିଜ ସୋସିଆଲ ମିଡିଆ ହ୍ୟାଣ୍ଡେଲ ଟ୍ରୁଥରେ କହିଛନ୍ତି । ଟ୍ରମ୍ପଙ୍କ ଏହି ପୋଷ୍ଟ ଏବେ ଯୁଦ୍ଧକୁ ଆହୁରି ଗମ୍ଭୀର କରିଛି । ବର୍ତ୍ତମାନ ଇରାନ ଯୁଦ୍ଧ ଯୋଗୁଁ ଏହି ପଥ ଉପରେ ନିଜର ନିୟନ୍ତ୍ରଣ ରଖିଛି । ଇରାନ ଏହି ରାସ୍ତା ଦେଇ ଆସୁଥିବା କେବଳ ନିଜର ବନ୍ଧୁ ରାଷ୍ଟ୍ରର ତୈଳ ଜାହାଜକୁ ଛାଡ଼ିବାକୁ ଅନୁମତି ଦେଉଛି ।

• ହର୍ମୁଜକୁ ନିୟନ୍ତ୍ରଣରେ ନେବେ କି ଟ୍ରମ୍ପ ?

ଟ୍ରମ୍ପଙ୍କ ଏହି ପୋଷ୍ଟରୁ ଅନୁମାନ ହେଉଛି ଯେ ଆମେରିକା ହୁଏତ ହର୍ମୁଜ ଉପରେ ସିଧାସଳଖ ନିୟନ୍ତ୍ରଣ ରଖିପାରେ । ଟ୍ରମ୍ପ କହିଛନ୍ତି ଯେ ଆମେରିକା ସେଠାରୁ ତେଲ ନେଇ ଲାଭ କରିପାରେ । ଏହି ବୟାନଟି କୂଟନୈତିକ ଅପେକ୍ଷା ଅଧିକ ଆକ୍ରମଣାତ୍ମକ ଲାଗୁଛି । ଟ୍ରମ୍ପଙ୍କ କଥାରୁ ଗୋଟିଏ କଥା ସ୍ପଷ୍ଟ ବାରି ହୋଇପଡୁଛି ଯେ ଆମେରିକା ଏବେ ଏହାକୁ କଥାବାର୍ତ୍ତା ମାଧ୍ୟମରେ ନୁହେଁ, ବରଂ ଶକ୍ତିର ଉପଯୋଗ କରି ନିୟନ୍ତ୍ରଣକୁ ନେଇପାରେ ।

• ହର୍ମୁଜ୍ ପଥକୁ ବନ୍ଦ କରିଛି ଇରାନ

ଆମେରିକା ଓ ଇସ୍ରାଏଲର ମିଳିତ ଆକ୍ରମଣ ପରେ ଇରାନ ହର୍ମୁଜ ମାର୍ଗକୁ ବନ୍ଦ କରିଦେଇଛି । ଏହା ଦୁନିଆର ସବୁଠୁ ଗୁରୁତ୍ଵପୂର୍ଣ୍ଣ ତୈଳ ପରିବହନ ମାର୍ଗ ମଧ୍ୟରୁ ଗୋଟିଏ । ଏହି ରାସ୍ତା ଦେଇ ବିଶ୍ଵର ପ୍ରାୟ ୪୦ ପ୍ରତିଶତ ତେଲର ଆମଦାନୀ ହୋଇଥାଏ । ଏହି ରାସ୍ତାଟି ବନ୍ଦ ହେବା ଯୋଗୁଁ ଏବେ ସାରା ଦେଶରେ ତୈଳ ସଙ୍କଟ ଦେଖାଦେଇଛି । ଏପରିକି ଅନେକ ଦେଶର ଅର୍ଥ ବ୍ୟବସ୍ଥା ଉପରେ ମଧ୍ୟ ଗଭୀର ପ୍ରଭାବ ପଡ଼ିଛି ।

ପଢନ୍ତୁ ଏହି ଖବର: ଆହୁରି ରକ୍ତମୁଖା ହେଲା ଇରାନ; ଟାର୍ଗେଟରେ ଉପସାଗରୀୟ ଦେଶର ୮ ଠିକଣା

• ଘନେଇବାରେ ଲାଗିଛି ଯୁଦ୍ଧ

ଏହି ସଂଘର୍ଷ ଏବେ କେବଳ ଇରାନ ପର୍ଯ୍ୟନ୍ତ ସୀମିତ ନାହିଁ । ଆମେରିକା ଓ ଇସ୍ରାଏଲ ଏବେ ଲେବାନନର ଅନେକ ସ୍ଥାନ ଉପରେ ଆକ୍ରମଣ କରିଛନ୍ତି । ଏହାର ଜବାବରେ ଇରାନ ମଧ୍ୟ ମିସାଇଲ ଓ ଡ୍ରୋନ ମାଡ଼ କରୁଛି । ଗୋଟିଏ ପରେ ପୂରା ବିଶ୍ଵରେ ଡୋନାଲ୍ଡ ଟ୍ରମ୍ପଙ୍କ ଲୋକପ୍ରିୟତା କମୁଥିବାରୁ, ଆମେରିକା ଏହି ଯୁଦ୍ଧକୁ ବନ୍ଦ କରିବାକୁ ଯୋଜନା କରୁଛି । ମାତ୍ର ଯୁଦ୍ଧ ବନ୍ଦ ହେବା ପୂର୍ବରୁ ଭୀଷଣ ରୂପ ନେବ ବୋଲି ଟ୍ରମ୍ପ କହିସାରିଛନ୍ତି । ବିଶେଷଜ୍ଞମାନେ କହିଛନ୍ତି ଯେ ଯଦି ଏହି ସାମୁଦ୍ରିକ ମାର୍ଗରେ କୌଣସି ବଡ଼ ଯୁଦ୍ଧ ହୁଏ, ତେବେ ବିଶ୍ଵ ତୈଳ ବଜାରରେ ଦର ଆକାଶଛୁଆଁ ହେବ ।