US Iran Peace Deal / ୧୦୭ ଦିନ ପରେ ଆମେରିକା-ଇରାନ ଯୁଦ୍ଧର ଅନ୍ତ; ଶାନ୍ତି ଚୁକ୍ତି ସ୍ଵାକ୍ଷର

ଆମେରିକା ଓ ଇରାନ ମଧ୍ୟରେ ଯୁଦ୍ଧର ଅନ୍ତ । ଦୀର୍ଘ ୧୦୭ ଦିନର ଯୁଦ୍ଧରେ ଶେଷରେ ଲାଗିଛି ବିରାମ । ଦୁଇ ଦେଶ ମଧ୍ୟରେ ଶାନ୍ତି ଚୁକ୍ତି ଘୋଷଣା ହୋଇଛି ବୋଲି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୋସିଆଲ ମିଡିଆରେ ଘୋଷଣା କରିଛନ୍ତି । ସେପଟେ ଶାନ୍ତି ଚୁକ୍ତିକୁ ନେଇ ଇରାନ ଉପ ବୈଦେଶିକ ମନ୍ତ୍ରୀ ମଧ୍ୟ ସୂଚନା ଦେଇଛନ୍ତି । ଦୁଇ ଦେଶ ମଧ୍ୟରେ ଯୁଦ୍ଧ ଶେଷ ହୋଇଥିବାରୁ ଖୁବଶୀଘ୍ର ଗୁରୁତ୍ଵପୂର୍ଣ୍ଣ ସାମୁଦ୍ରିକ ପଥ ହର୍ମୁଜ ପ୍ରଣାଳୀ ଖୋଲିବ ବୋଲି ଆଶା କରାଯାଉଛି, ଯାହାଦ୍ଵାରା ଆଗକୁ ତେଲ ଦର ମଧ୍ୟ ହ୍ରାସ ପାଇପାରେ ।

ଟ୍ରମ୍ପ ଶାନ୍ତି ଚୁକ୍ତି ନେଇ ନିଜ ସୋସିଆଲ ମିଡିଆରେ ଲେଖିଛନ୍ତି, "ଇରାନ ସହିତ ଚୁକ୍ତି ସମ୍ପୂର୍ଣ୍ଣ ହୋଇଛି । ସମସ୍ତଙ୍କୁ ଅଭିନନ୍ଦନ । ହର୍ମୁଜ୍ ପ୍ରଣାଳୀ ଏବେ ଖୋଲିବ । ସେଠାରେ ଆମେରିକାର ନୌସେନାଙ୍କୁ ମଧ୍ୟ ହଟାଯିବ ।" ତେବେ ଶୁକ୍ରବାର ସ୍ୱିଜରଲ୍ୟାଣ୍ଡରେ ଏହି ଚୁକ୍ତି ଉପରେ ମୋହର ଲାଗିବ ଏବଂ ଇରାନ ମଧ୍ୟ ଏହା ଘୋଷଣା କରିଛି । ଏହି ଚୁକ୍ତି ଉପରେ ମୋହର ଲାଗିବା ପରେ, ଦୁଇ ଦେଶ ମଧ୍ୟରେ ୬୦ ଦିନିଆ ଯୁଦ୍ଧବିରତି ଆରମ୍ଭ ହେବ ଏବଂ ପରମାଣୁ ଚୁକ୍ତି ପାଇଁ ଆଲୋଚନା ମଧ୍ୟ ହେବ।

• ଟ୍ରମ୍ପ Truthରେ କଲେ ଚୁକ୍ତି ଘୋଷଣା

ସୋସିଆଲ ମିଡିଆ ପ୍ଲାଟଫର୍ମ Truthରେ ଟ୍ରମ୍ପ କହିଛନ୍ତି, "ମୁଁ ଏହି ଚୁକ୍ତିରେ ସାମିଲ ସମସ୍ତ ପକ୍ଷଙ୍କୁ ଧନ୍ୟବାଦ ଜଣାଉଛି ।" ଟ୍ରମ୍ପଙ୍କ ଘୋଷଣାର କିଛି ସମୟ ପରେ, ଦୁଇ ଦେଶ ମଧ୍ୟରେ ମଧ୍ୟସ୍ଥତା କରୁଥିବା ପାକିସ୍ତାନ ମଧ୍ୟ କହିଛି ଯେ ଚୁକ୍ତି ସଫଳତାର ସହ ଶେଷ ହୋଇଛି । ଟ୍ରମ୍ପ କହିଛନ୍ତି, "ମୁଁ ହର୍ମୁଜ୍ ପ୍ରଣାଳୀକୁ ଟୋଲ୍ ଫ୍ରି ଓପନିଂ ମଧ୍ୟ ଘୋଷଣା କରୁଛି । ଏହା ସହିତ ମୁଁ ହର୍ମୁଜରୁ ଆମେରିକୀୟ ନୌସେନାକୁ ପ୍ରତ୍ୟାହାର କରୁଛି । ବିଶ୍ୱର ଜାହାଜଗୁଡ଼ିକ ଏବେ ସେମାନଙ୍କର ଇଞ୍ଜିନ ଆରମ୍ଭ କରିବା ଉଚିତ । ତେଲ ବାଣିଜ୍ୟ ଆରମ୍ଭ ହେଉ ।" ଅନ୍ୟ ଏକ ପୋଷ୍ଟରେ ଟ୍ରମ୍ପ କହିଛନ୍ତି ଯେ ଚୁକ୍ତିନାମା ଆନୁଷ୍ଠାନିକ ଭାବରେ ଅନୁମୋଦନ ହେବା ପରେ ହର୍ମୁଜ୍ ପ୍ରଣାଳୀ ଶୁକ୍ରବାର ଦିନ ଖୋଲିବ ।

• ଇରାନ କଣ କହିଲା ?

ଇରାନର ଉପ ବୈଦେଶିକ ମନ୍ତ୍ରୀ କହିଛନ୍ତି ଯେ ଶୁକ୍ରବାର ସ୍ୱାକ୍ଷରିତ ହେବାକୁ ଥିବା ବୁଝାମଣାପତ୍ର (MoU) ପରେ ତେହେରାନ ଏବଂ ୱାଶିଂଟନ ମଧ୍ୟରେ ୬୦ ଦିନିଆ ଯୁଦ୍ଧ ବିରତି ଆମେରିକାର ୩ଟି ପ୍ରତିଶ୍ରୁତି ପୂରଣ କରିବା ଉପରେ ନିର୍ଭର କରିବ । ଇରାନର ସରକାରୀ ଗଣମାଧ୍ୟମ ରିପୋର୍ଟ ଅନୁଯାୟୀ, ଏହି ପ୍ରତିଶ୍ରୁତିଗୁଡ଼ିକରେ ନୌସେନା ଅବରୋଧ ହଟାଇବା, ଯୁଦ୍ଧ ଏବଂ ସାମରିକ ଅଭିଯାନର ସମାପ୍ତି ଏବଂ ଇରାନରୁ କୋଟି କୋଟି ଡଲାରର ଫ୍ରିଜ୍ ହୋଇଥିବା ପାଣ୍ଠି ମୁକ୍ତ କରିବାକୁ ହେବ ।

ପଢନ୍ତୁ ଏହି ଖବର: 'ଯେପର୍ଯ୍ୟନ୍ତ ମୁଁ ପ୍ରଧାନମନ୍ତ୍ରୀ ଅଛି ସେପର୍ଯ୍ୟନ୍ତ ଇରାନ ହେବ ନାହିଁ ପରମାଣୁ ଶକ୍ତି ସମ୍ପନ୍ନ'

• ପାକିସ୍ତାନ କଣ କହିଲା ?

ଆମେରିକା ଓ ଇରାନ ମଧ୍ୟରେ ଯୁଦ୍ଧ ବନ୍ଦ କରିବା ଲାଗି ପାକିସ୍ତାନ ମଧ୍ୟସ୍ଥତା କରୁଥିଲା । ଚୁକ୍ତି ହେବା ପରେ ପାକିସ୍ତାନର ପ୍ରଧାନମନ୍ତ୍ରୀ ଶାହବାଜ ସରିଫ ଟ୍ୱିଟରରେ ଲେଖିଛନ୍ତି, "ବିସ୍ତୃତ ଆଲୋଚନା ପରେ ଆମେ ଘୋଷଣା କରି ଖୁସି ଯେ ଆମେରିକା ଏବଂ ଇରାନ ମଧ୍ୟରେ ଏକ ଶାନ୍ତି ଚୁକ୍ତି ହୋଇଛି। ଉଭୟ ପକ୍ଷ ଲେବାନନ ସମେତ ସମସ୍ତ ମୋର୍ଚ୍ଚାରେ ତୁରନ୍ତ ଏବଂ ସ୍ଥାୟୀ ଶତ୍ରୁତା ବନ୍ଦ କରିବାକୁ ରାଜି ହୋଇଛନ୍ତି ।"