ନୂଆଦିଲ୍ଲୀ: ଇରାନ୍ ଉପରେ ଆମେରିକା-ଇସ୍ରାଏଲ୍ ଯୁଦ୍ଧ ଆରମ୍ଭକୁ ମାସେ ପୁରିଛି । ଏବେ ଲଢ଼େଇର ମାସକ ପରେ ଯୁଦ୍ଧ ଆହୁରି ବ୍ୟାପିବା ନଜର ଆସୁଛି । ଏହାରି ଭିତରେ ୟୁଏସ୍ ସେଣ୍ଟ୍ରାଲ୍ କମାଣ୍ଡ ଦେଇଥିବା ସୂଚନା ଅନୁସାରେ, ଯୁଏସଏସ୍ ତ୍ରିପୋଲିରେ ୩୫୦୦ ମରିନ ଓ ନୌସେନା ଯବାନ ମଧ୍ୟପ୍ରାଚ୍ୟରେ ପହଞ୍ଚିଛନ୍ତି ।

ଯାହାକି ବିଗତ ୨୦ ବର୍ଷରେ ମଧ୍ୟପ୍ରାଚ୍ୟରେ ଆମେରିକାର ସବୁଠୁ ବଡ଼ ସୈନ୍ୟ ମୁତୟନ । ସୋସିଆଲ୍ ମିଡିଆ Xରେ ପୋଷ୍ଟ ଅନୁଯାୟୀ, ୟୁଏସଏସ୍ ତ୍ରିପୋଲି (LHA 7)ରେ ଯବାନ ମାର୍ଚ୍ଚ ୨୭ରେ ମଧ୍ୟପ୍ରାଚ୍ୟ ପହଞ୍ଚି ସାରିଛନ୍ତି । ପୋଷ୍ଟରେ ସୈନିକ କମ୍ବାଟ ୟୁନିଫର୍ମ ପିନ୍ଧିଥିବା ଦେଖା ଯାଉଛି ।

ଏଥିସହ ପଢ଼ନ୍ତୁ: ମଧ୍ୟପ୍ରାଚ୍ୟ ସଂକଟ ଭିତରେ ଝଟ୍‌କା ଦେଲା ଋଷ; ଆହୁରି ବଢ଼ିଯିବ ତୈଳଦର

ପୂର୍ବରୁ ମଧ୍ୟପ୍ରାଚ୍ୟରେ ଆମେରିକାର ପ୍ରାୟ ୫୦ ହଜାର ସୈନ୍ୟ ମୁତୟନ ଅଛନ୍ତି । ଇରାନ ସହ ଯୁଦ୍ଧ ଭିତରେ ଆମେରିକା ଆହୁରି ଯବାନଙ୍କୁ ମୁତୟନ କରିଛି । ୟୁଏସଏସ ତ୍ରିପୋଲିରେ ଟ୍ରାନ୍ସପୋର୍ଟ ଓ ଷ୍ଟ୍ରାଇକର୍ ଯୁଦ୍ଧ ବିମାନ ସହ ଅସ୍ତ୍ରଶସ୍ତ୍ର ରହିଛି ।

U.S. Sailors and Marines aboard USS Tripoli (LHA 7) arrived in the U.S. Central Command area of responsibility, March 27. The America-class amphibious assault ship serves as the flagship for the Tripoli Amphibious Ready Group / 31st Marine Expeditionary Unit composed of about… pic.twitter.com/JFWiPBbkd2

— U.S. Central Command (@CENTCOM) March 28, 2026

ଏହି ଆସଲ୍ଟ ସିପ୍‌ରେ ଥିବା ସୈନିକ ଜାପାନରେ ମୁତୟନ ଥିଲେ । ତାଇୱାନ ନିକଟବର୍ତ୍ତୀ ଅଞ୍ଚଳରେ ଅଭ୍ୟାସ କରୁଥିଲେ । ଦୁଇ ସପ୍ତାହ ତଳେ ସେମାନଙ୍କୁ ମଧ୍ୟପ୍ରାଚ୍ୟରେ ମୁତୟନ ପାଇଁ ନିର୍ଦ୍ଦେଶ ଦିଆଯାଇଥିଲା । ତ୍ରିପୋଲି ସହ ୟୁଏସଏସ ବକ୍ସର ଏବଂ ଦୁଟି ଅନ୍ୟ ଜାହାଜ ମଧ୍ୟ ଏକ ମରିନ ୟୁନିଟ୍ ସହ ସ୍ୟାନ ଡିଏଗୋରୁ ମଧ୍ୟପ୍ରାଚ୍ୟ ଯିବାକୁ ଆମେରିକା ନିର୍ଦ୍ଦେଶ ଦେଇଛି ।

ଆରମ୍ଭ ହେବ କି ଗ୍ରାଉଣ୍ଡ ଅପରେସନ୍ ?

ମଧ୍ୟପ୍ରାଚ୍ୟରେ ଆମେରିକା ଯେଉଁଭଳି ସୈନ୍ୟ ଶକ୍ତି ବୃଦ୍ଧି କରୁଛି, ତାକୁ ଦେଖିଲେ ଲାଗୁଛି ଆମେରିକା ଖୁବଶୀଘ୍ର ଇରାନ୍‌ରେ ଗ୍ରାଉଣ୍ଡ ଅପରେସନ୍ କରିବାକୁ ପ୍ରସ୍ତୁତି ଚଳାଇଛି । ଗୋଟିଏ ପଟେ ଡୋନାଲ୍ଡ ଟ୍ରମ୍ପ ଇରାନ ସହ ଶାନ୍ତି ଆଲୋଚନା କଥା କହି ଆସୁଥିବା ବେଳେ ସୈନ୍ୟ ମୁତୟନ ଜାରି ରଖି ସଂଘର୍ଷ ଶେଷ କରିବାକୁ ଚାପ ପକାଇ ଆସୁଛନ୍ତି ।

ୱାଲ୍ ଷ୍ଟ୍ରିଟ୍ ଜର୍ଣ୍ଣାଲ ଅନୁସାରେ, ଅତିରିକ୍ତ ସୈନ୍ୟଙ୍କୁ ମୁତୟନର ଅର୍ଥ ଟ୍ରମ୍ପ ମଧ୍ୟପ୍ରାଚ୍ୟରେ ଅନ୍ୟ ସମସ୍ତ ବିକଳ୍ପ ଖୋଲା ରଖିବାକୁ ଚାହୁଁଛି । ଦ ୱାଶିଂଟନ ପୋଷ୍ଟ ଆମେରିକୀୟ ଅଧିକାରୀଙ୍କ ସୂତ୍ରରୁ କହିଛି "ଇରାନରେ ଗ୍ରାଉଣ୍ଡ ଅପରେସନ୍ ଲାଗି ଆମେରିକା ପ୍ରସ୍ତୁତି କରୁଛି ।"

ଏଥିସହ ପଢ଼ନ୍ତୁ: ଯୁଦ୍ଧକୁ ମାସେ, ବ୍ୟାକଫୁଟ୍‌ରେ ଟ୍ରମ୍ପ; ମୁଣ୍ଡବିନ୍ଧା ବଢ଼ାଉଛି ଇରାନର ପାଲଟା ଆକ୍ରମଣ

ମଧ୍ୟପ୍ରାଚ୍ୟରେ ଆମେରିକା ମୁତୟନ କରିଥିବା ସୈନ୍ୟଙ୍କ ମଧ୍ୟରେ ସ୍ପେଶାଲ ଫୋର୍ସ ରହିଛି । ତେବେ ପେଣ୍ଟାଗନର ଏହି ଯୋଜନାକୁ ଟ୍ରମ୍ପ ଅନୁମୋଦନ ଦେଇଛନ୍ତି କି ନାହିଁ ତାହା ଏବେ ସୁଦ୍ଧା ସ୍ପଷ୍ଟ ହୋଇନାହିଁ । ଯଦିଓ ପୂର୍ବରୁ ଟ୍ରମ୍ପ ବାରମ୍ବାର କହି ଆସୁଛନ୍ତି ଇରାନରେ ଗ୍ରାଉଣ୍ଡ ଅପରେସନ୍‌ର କୌଣସି ଉଦ୍ଦେଶ୍ୟ ନାହିଁ ।

ତଥାପି ମଧ୍ୟପ୍ରାଚ୍ୟରେ ଆମେରିକା ସୈନ୍ୟ ଶକ୍ତି ବଢ଼ାଇ ଚାଲିଛି । ଯାହାକି ଇରାନ ପ୍ରତି ବିପଦ ବଢ଼ାଇ ଚାଲିଛି । ଚର୍ଚ୍ଚା ହେଉଛି ଅତିରିକ୍ତ ସୈନ୍ୟ ବଳଙ୍କୁ ଏଭଳି ସ୍ଥାନରେ ମୁତୟନ କରାଯିବ । ଯେଭଳି ଖାର୍ଗ ଦ୍ଵୀପ ଉପରେ ଆକ୍ରମଣ କରାଯାଇ ପାରିବ ।