ଆମେରିକାରେ ରହୁଥିବା ଭାରତୀୟଙ୍କୁ ଆଶ୍ଵସ୍ତି । ଶେଷରେ ସ୍ଵର ବଦଳାଇଲା ଆମେରିକା । ଅସ୍ଥାୟୀ ଭିସାରେ ଆମେରିକାରେ ରହୁଥିଲେ ଗ୍ରୀନ କାର୍ଡ ପାଇଁ ଛାଡ଼ିବାକୁ ପଡ଼ିବନି ୟୁଏସ । ପୂର୍ବରୁ ଗ୍ରୀନ କାର୍ଡ ନ ମିଳିବା ପର୍ଯ୍ୟନ୍ତ ନିଜ ଗୃହ ଦେଶକୁ ଫେରିଯିବାକୁ କୁହାଯାଇଥିଲା, କିନ୍ତୁ ଶେଷରେ ଆମେରିକା ନିଜ ପୂର୍ବ ନିଷ୍ପତ୍ତିରୁ ୟୁଟର୍ଣ୍ଣ ମାରିଛି । ପ୍ରାୟ ୧ ସପ୍ତାହ ପରେ ଆମେରିକାର ହୋମଲ୍ୟାଣ୍ଡ ସିକ୍ୟୁରିଟି ବିଭାଗ (DHS) ପକ୍ଷରୁ ଏ ନେଇ ସୂଚନା ଦିଆଯାଇଛି । ଏହି ଅପଡେଟ୍ ଆସିବା ପରେ ଆମେରିକାରେ ଦୀର୍ଘ ବର୍ଷ ଧରି ଅସ୍ଥାୟୀ ଭିସାରେ ରହୁଥିବା ଅନେକ ପ୍ରବାସୀ ଦୀର୍ଘ ନିଶ୍ଵାସ ଛାଡ଼ିଛନ୍ତି ।

ଏହି ନୂଆ ନିୟମର ଠିକ୍ ଗୋଟିଏ ସପ୍ତାହ ପୂର୍ବରୁ ଆମେରିକାର ନାଗରିକତା ଏବଂ ପ୍ରବାସନ ସେବାର ମୁଖପାତ୍ର ଜାଚ୍ କାହଲର୍ ଏକ ବିବୃତ୍ତିରେ କହିଥିଲେ, "ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରବାସନ ଉପରେ କଟକଣା ଅନୁଯାୟୀ, ଜଣେ ବିଦେଶୀ ଯିଏ ଅସ୍ଥାୟୀ ଭାବରେ ଆମେରିକାରେ ଅଛନ୍ତି ଏବଂ ଗ୍ରୀନ କାର୍ଡ ଚାହାଁନ୍ତି, ତାଙ୍କୁ ଆବେଦନ କରିବା ପାଇଁ ନିଜ ଦେଶକୁ ଫେରିବାକୁ ପଡ଼ିବ । ଏହି ନୀତି ଆମେରିକାର ପ୍ରବାସନ ବ୍ୟବସ୍ଥାକୁ ବେଆଇନ ପରିବର୍ତ୍ତେ ଆଇନ ଅନୁଯାୟୀ କାର୍ଯ୍ୟ କରିବାକୁ ଅନୁମତି ଦିଏ ।"

• ଶେଷରେ ୟୁ-ଟର୍ଣ୍ଣ ମାରିଲା ଆମେରିକା

ମାତ୍ର ଏବେ ଆସିଥିବା ନିୟମ, ପ୍ରବାସୀମାନଙ୍କୁ ସେମାନଙ୍କର ଗ୍ରୀନ୍ କାର୍ଡ ଆସିବା ପର୍ଯ୍ୟନ୍ତ ଆମେରିକାରେ ଅପେକ୍ଷା କରିବାକୁ ଅନୁମତି ଦିଏ । ଏଠାରେ କହିରଖୁଛୁ କି, କେବଳ ୨୦୨୪ ମସିହାରେ ଆମେରିକା ପ୍ରାୟ ୧.୪ ମିଲିୟନ ପ୍ରବାସୀଙ୍କୁ ଗ୍ରୀନ୍ କାର୍ଡ ପ୍ରଦାନ କରିଥିଲା । ଏମାନଙ୍କ ମଧ୍ୟରୁ ଅନେକ ପ୍ରବାସୀଙ୍କୁ "ସ୍ଥିତିର ସମାୟୋଜନ" ମାଧ୍ୟମରେ ଗ୍ରୀନ କାର୍ଡ ପ୍ରଦାନ କରାଯାଇଥିଲା ଅର୍ଥାତ ଏହା ଏପରି ଏକ ପ୍ରକ୍ରିୟା ଯାହା ଯୋଗ୍ୟ ପ୍ରବାସୀମାନଙ୍କୁ ଆମେରିକାରେ ରହି ସ୍ଥାୟୀ ବାସସ୍ଥାନ ପାଇଁ ଆବେଦନ କରିବାକୁ ଅନୁମତି ଦିଏ ।

• ନୂଆ ନିୟମରେ ବି ଟ୍ଵିଷ୍ଟ

ତେବେ ନୂଆ ନିୟମରେ ମଧ୍ୟ କୁହାଯାଇଛି ଯେ କେବଳ କିଛି ପ୍ରବାସୀଙ୍କୁ ଆମେରିକା ଛାଡ଼ିବାକୁ ପଡ଼ିବ । ଏନେଇ ଆମେରିକାର DHS ମୁଖପାତ୍ର କାହଲର୍ କହିଛନ୍ତି ଯେ ଗ୍ରୀନ କାର୍ଡ ଆବେଦନ ବେଳେ କେଉଁ ପ୍ରବାସୀ ଆମେରିକାରେ ରହିବେ ଓ କେଉଁ ପ୍ରବାସୀଙ୍କୁ ନିଜ ଦେଶକୁ ଫେରିବାକୁ ପଡ଼ିବ ତାହା ଇମିଗ୍ରେସନ ଅଧିକାରୀଙ୍କ ଉପରେ ନିର୍ଭର କରିବ । ତେବେ ଏହି ବ୍ୟବସ୍ଥା ପୂର୍ବରୁ ବି ପ୍ରଚଳିତ ଥିଲା ।

ପଢନ୍ତୁ ଏହି ଖବର: ଟ୍ରମ୍ପଙ୍କ 'ଗ୍ରୀନ୍' ଝଟ୍‌କା; Green Card ପାଇବାକୁ ହେଲେ ଛାଡ଼ିବାକୁ ପଡ଼ିବ ଆମେରିକା

ସୂଚନା ଥାଉ କି, ମେ ୨୧ ତାରିଖରେ ଟ୍ରମ୍ପ ପ୍ରବାସୀଙ୍କୁ ଗ୍ରୀନ ଝଟକା ଦେଇଥିଲେ । ଗ୍ରୀନ କାର୍ଡ ନ ମିଳିବା ପର୍ଯ୍ୟନ୍ତ ସମସ୍ତ ପ୍ରବାସୀଙ୍କୁ ନିଜ ଦେଶକୁ ଫେରିବାକୁ ପଡ଼ିବ ବୋଲି କୁହାଯାଇଥିଲା । ଏହାପରେ ବିଶେଷକରି F-1 ଛାତ୍ର (ଏମାନେ ହେଉଛନ୍ତି ଅନ୍ତର୍ଜାତୀୟ ଛାତ୍ରଛାତ୍ରୀ, ଯେଉଁମାନେ ଆମେରିକାରେ ପାଠ ପଢିବା ପାଇଁ F-1 ଭିସା ନେଇ ପ୍ରବେଶ କରନ୍ତି ଓ ସେଠାରେ ନିଜ ପାଠ୍ୟକ୍ରମ ସରିବା ପର୍ଯ୍ୟନ୍ତ ରୁହନ୍ତି) ଏବଂ ପର୍ଯ୍ୟଟକ ଭିସାରେ ଆମେରିକାରେ ରହୁଥିବା ଅନେକ ବେଶ ଚିନ୍ତିତ ହୋଇପଡ଼ିଥିଲେ । ଏହି ନିର୍ଦ୍ଦେଶ ପରେ H-1B ଭିସା ଧାରକ , ଯେଉଁମାନଙ୍କ ମଧ୍ୟରୁ ପ୍ରାୟ ୭୦% ଭାରତୀୟ, ସେମାନେ ମଧ୍ୟ ଚିନ୍ତିତ ହୋଇପଡ଼ିଥିଲେ । ରିପୋର୍ଟଗୁଡ଼ିକ ସୂଚାଇଛି ଯେ ଗ୍ରୀନ କାର୍ଡ ଅପେକ୍ଷା H-1B (ଏହି ଭିସା ମାଧ୍ୟମରେ ଆମେରିକୀୟ କମ୍ପାନୀଗୁଡ଼ିକ ବିଦେଶୀଙ୍କୁ ନିଯୁକ୍ତି ପ୍ରଦାନ କରନ୍ତି ଅର୍ଥାତ ଏହି ଭିସା ସହାୟତାରେ ଅନେକ ବିଦେଶୀ ରୋଜଗାର ଉଦ୍ଦେଶ୍ୟରେ ଆମେରିକାରେ ଅସ୍ଥାୟୀ ଭାବେ ରୁହନ୍ତି) ଧାରକମାନେ ସଂଶୋଧିତ ଢାଞ୍ଚା ଅନୁଯାୟୀ ଅପେକ୍ଷାକୃତ ଅଧିକ ସୁବିଧା ପାଇବାର ସମ୍ଭାବନା ଅଛି । H-1Bର 'ଦ୍ୱୈତ ଉଦ୍ଦେଶ୍ୟ' ନୀତି ଭିସା ଧାରକମାନଙ୍କୁ ଆମେରିକାରେ ରହି ଅସ୍ଥାୟୀ ଭାବରେ କାମ କରିବାକୁ ଅନୁମତି ଦିଏ ।