US 100 Percent Tariff / ଟ୍ରମ୍ପଙ୍କ ୧୦୦% ଟାରିଫ ବିଲ୍‍; ଭାରତ ଉପରେ ହୋଇପାରେ ଲାଗୁ, ଆଲର୍ଟ କଲେ ବିଶେଷଜ୍ଞ

ଆମେରିକା ସିନେଟ୍‌ରେ ପାରିତ ହୋଇଯାଇଛି ୧୦୦% ପର୍ଯ୍ୟନ୍ତ ଶୁଳ୍କ ଲାଗୁ କରିବା ପାଇଁ ଏକ ବିଲ୍ । ଯାହାକି ଋଷରୁ ତେଲ କିଣୁଥିବା ୫ଟି ସର୍ବବୃହତ କ୍ରେତାଙ୍କୁ ଟାର୍ଗେଟ୍ କରାଯାଇଛି । ରିପବ୍ଲିକାନ୍ ଏବଂ ଡେମୋକ୍ରାଟିକ୍ ଉଭୟ ଦଳ ଦ୍ୱାରା ସମର୍ଥନରେ ୮୬-୧୧ ଭୋଟରେ ପାରିତ ହୋଇଛି । ଏହି ବିଲ୍ ଋଷର ତୈଳ ରାଜସ୍ୱ ହ୍ରାସ କରିବା ଏବଂ ଏହାର ଯୁଦ୍ଧ କ୍ଷମତାକୁ ଦୁର୍ବଳ କରିବା ପାଇଁ ଲକ୍ଷ୍ୟ ରଖିଛି । ଏହି ବିଲ୍‌କୁ ନେଇ ବିଶେଷଜ୍ଞମାନେ ସତର୍କ ଘଣ୍ଟି ଶୁଣାଇଛନ୍ତି ଏବଂ ଏହାକୁ ଆମେରିକାର ଭାରତ ବିରୋଧୀ କାର୍ଯ୍ୟକଳାପ ବୋଲି କହିଛନ୍ତି ।

ଏହି ବିଲ୍ ଭାରତ, ଚୀନ୍, ସ୍ଲୋଭାକିଆ, ହଙ୍ଗେରୀ ଏବଂ ଆଜରବୈଜାନ ଉପରେ ୧୦୦% ଶୁଳ୍କ ଲାଗୁ କରିପାରିବ । ଜୁଲାଇ ୨୩ ତାରିଖରେ ଋଷରୁ ତେଲ ଏବଂ ଗ୍ୟାସ କିଣୁଥିବା ଦେଶମାନଙ୍କ ଉପରେ ୧୦୦% ପର୍ଯ୍ୟନ୍ତ ଶୁଳ୍କ ଲଗାଇବା ପାଇଁ ଏକ ପ୍ରସ୍ତାବ ଦିଆଯାଇଥିଲା । ବିଲ୍‌ର ପ୍ରାରମ୍ଭିକ ଡ୍ରାଫ୍ଟରେ ୫୦୦% ଶୁଳ୍କ ପ୍ରସ୍ତାବ ଦିଆଯାଇଥିଲା, କିନ୍ତୁ ପରେ ଏହାକୁ ୧୦୦% କୁ ହ୍ରାସ କରାଯାଇଥିଲା । ତଥାପି ଏହି ଆଇନ ଏପର୍ଯ୍ୟନ୍ତ ପ୍ରଣୟନ ହୋଇନାହିଁ । ଏହାକୁ ଏବେ ଆମେରିକୀୟ ସଂସଦର ନିମ୍ନ ସଦନ, ପ୍ରତିନିଧି ସଭାକୁ ପଠାଯିବ । ଯଦି ସେଠାରେ ବିଲ୍ ପାସ୍ ହୁଏ, ତେବେ ଏହାକୁ ରାଷ୍ଟ୍ରପତି ଟ୍ରମ୍ପଙ୍କ ଅନୁମୋଦନ ପାଇଁ ପଠାଯିବ । ତାଙ୍କ ଅନୁମୋଦନ ପାଇବା ପରେ ହିଁ ଏହା ଆଇନରେ ପରିଣତ ହେବ ।

• ବିଶେଷଜ୍ଞ ଉଠାଇଲେ ବଡ଼ ପ୍ରଶ୍ନ

ଭାରତୀୟ ଇକ୍ୱିଟି ରଣନୀତିଜ୍ଞ ହର୍ଷ ଗୁପ୍ତା ମଧୁସୂଦନ ଏହି ବିଲ୍ ପାରିତ ହେବା ପରେ ଏକ ସ୍ଵତନ୍ତ୍ର ପୋଷ୍ଟ କରିଛନ୍ତି । ସେଥିରେ ସେ ଚେତାବନୀ ଦେଇଛନ୍ତି ଯେ ଋଷରୁ ତୈଳ ଆମଦାନୀ କରୁଥିବା ଦେଶଗୁଡ଼ିକୁ ଟାର୍ଗେଟ କରି ଆମେରିକା ସିନେଟର ପାରିତ ବିଲ୍‌ଟି ବାସ୍ତବରେ ଭାରତ ବିରୋଧୀ । ଏହାଦ୍ଵାରା ଋଷରୁ ତୈଳ ଆମଦାନୀ କରୁଥିବା ଦେଶଗୁଡ଼ିକ ଟ୍ରମ୍ପଙ୍କ ୧୦୦% ଶୁଳ୍କ ଲାଗୁ ହେବାର ବିପଦରେ ରହିବେ ।

ପଢନ୍ତୁ ଏହି ଖବର: ପିଲାଙ୍କ ପାଇଁ ନିଶା ପାଲଟିଲାଣି ସୋସିଆଲ ମିଡିଆ; ବ୍ୟାନ୍ ପାଇଁ ବଢିଲା ଡିମାଣ୍ଡ

ବିଶେଷଜ୍ଞ ଏକ ଗମ୍ଭୀର ପ୍ରଶ୍ନ ଉଠାଇ କହିଛନ୍ତି ଯେ ଋଷରୁ ତେଲ ଏବଂ ଗ୍ୟାସ ଆମଦାନୀ କରୁଥିବା ଅନ୍ୟ ଦେଶଗୁଡ଼ିକୁ ଉପରେ କାହିଁକି ସମାନ ଭାବରେ ଟାର୍ଗେଟ କରାଯାଇ ନାହିଁ ? ଯଦି ଭାରତ ଋଷରୁ ତେଲ ଏବଂ ଗ୍ୟାସ ଆମଦାନୀ ହ୍ରାସ କରେ, ତେବେ ଏହା ବିଶ୍ୱ ତୈଳ ମୂଲ୍ୟକୁ ଆହୁରି ବୃଦ୍ଧି କରିବ ଏବଂ ଚୀନ ଋଷରୁ ଅଧିକ ତେଲ ଓ ଗ୍ୟାସ୍ ଆମଦାନୀ କରିବା ଆରମ୍ଭ କରିବ।

• କାହିଁକି ଋଷରୁ ତେଲ କିଣୁଛି ଭାରତ ?

୨୦୨୨ରେ ୟୁକ୍ରେନ ଯୁଦ୍ଧ ପରେ ଆମେରିକା ଓ ଅନ୍ୟ ୟୁରୋପୀୟ ଦେଶ ଋଷ ଉପରେ ପ୍ରତିବନ୍ଧକ ଲଗାଇଛନ୍ତି । ଏହାପରେ ଋଷ ଭାରତ ଓ ଚୀନ ଭଳି ଦେଶଗୁଡ଼ିକୁ ବହୁ ରିହାତିରେ ତେଲ ବିକ୍ରି କରିବା ଆରମ୍ଭ କରିଛି । ଏଥିଲାଗି ଭାରତ ଋଷରୁ ଅଧିକ ତେଲ କିଣୁଛି । ଭାରତ ନିଜ ଆବଶ୍ଯକକୁ ପୂରଣ କରିବା ଲାଗି ପ୍ରାୟ ୮୫%ରୁ ଅଧିକ କଞ୍ଚା ତେଲ ଆମଦାନୀ କରେ । ଏଥିଲାଗି ଯେଉଁଠୁ କମ ମୂଲ୍ୟରେ ତେଲ ମିଳେ, ଭାରତ ସେଠାରୁ ଅଧିକ ଆମଦାନୀ କରେ । ଏହାଦ୍ଵାରା ରିଲାଏନ୍ସ, ଇଣ୍ଡିଆନ ଅଏଲ୍ ଓ ନାୟରା ପରି ରିଫାଇନାରୀକୁ ଶସ୍ତା କଞ୍ଚା ତେଲ ମିଳିଯାଏ, ଯାହାଦ୍ଵାରା ଉତ୍ପାଦନର ଖର୍ଚ୍ଚ କମେ ଓ ଅଧିକ ଲାଭ ମିଳେ । ଭାରତ ଶସ୍ତା ଦରରେ ଋଷରୁ କଞ୍ଚା ତେଲ କିଣେ । ପରେ ଏହାକୁ ରିଫାଇନ ଉତ୍ପାଦରେ ପରିବର୍ତ୍ତନ କରି ଅଧିକ ଦରରେ ଅଲଗା ଦେଶକୁ ବିକ୍ରି କରେ ।