ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦାବି କରିଛନ୍ତି ଯେ ଇରାନ ଆକ୍ରମଣରେ ଧ୍ଵଂସ ହୋଇଥିବା ଆମେରିକୀୟ ଶକ୍ତିଶାଳୀ ଯୁଦ୍ଧ ବିମାନର ଦୁଇ ପାଇଲଟଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି । ପୂର୍ବରୁ ଜଣେ ପାଇଲଟଙ୍କୁ ଉଦ୍ଧାର କରାଯାଇଥିବାବେଳେ ଏବେ ଅନ୍ୟ ଜଣେ ନିଖୋଜ ପାଇଲଟଙ୍କୁ ସୁରକ୍ଷିତ ଭାବେ ଆମେରିକାକୁ ଅଣାଯାଇଛି । ଶତ୍ରୁ ପକ୍ଷର ପାଇଲଟଙ୍କୁ ଚିହ୍ନଟ କଲେ ପୁରସ୍କାର ମିଳିବ ବୋଲି ଇରାନ ଘୋଷଣା କରିଥିଲା । କିନ୍ତୁ ଏହା ପୂର୍ବରୁ ନିଜ ପାଇଲଟଙ୍କୁ ସୁରକ୍ଷିତର ସହ ସ୍ଵଦେଶ ଫେରାଇ ଆଣିଛି ଆମେରିକା ।

ଆମେରିକୀୟ ଯୁଦ୍ଧ ବିମାନର ଏହି ପାଇଲଟ ଶୁକ୍ରବାରଠାରୁ ନିଖୋଜ ଥିଲେ, ଯେତେବେଳେ ଇରାନ ଆମେରିକାର F-15E ଷ୍ଟ୍ରାଇକ୍ ଇଗଲ୍ ବିମାନ ଉପରେ ଆକ୍ରମଣ କରିଥିଲା । ଆକାଶରେ ଆମେରିକୀୟ ବିମାନକୁ ଖସାଇ ଟ୍ରମ୍ପଙ୍କ ଦମ୍ଭ ଭାଙ୍ଗିଥିଲା ଇରାନ । ଏହାପରେ ନିଖୋଜ ଆମେରିକୀୟ ପାଇଲଟଙ୍କୁ ଖୋଜିବା ଅଭିଯାନ ଆରମ୍ଭ ହୋଇଥିଲା । ଗୋଟିଏ ପଟେ ଆମେରିକା ନିଜ ପାଇଲଟଙ୍କୁ ସୁରକ୍ଷିତ ଭାବେ ଉଦ୍ଧାର କରିବାକୁ ଚାହୁଁଥିବାବେଳେ ସେପଟେ ଇରାନ ଶତ୍ରୁ ପାଇଲଟକୁ ଧରିବାକୁ ବ୍ୟାକୁଳ ହୋଇପଡ଼ିଥିଲା । ବିପଦରେ ଥିବା ଆମେରିକାର ବରିଷ୍ଠ ପାଇଲଟଙ୍କୁ ଶେଷରେ ଏକ ସ୍ଵତନ୍ତ୍ର ଅଭିଯାନ ମାଧ୍ୟମରେ ଇରାନରେ ପଶି ଉଦ୍ଧାର କରିଛି ଆମେରିକା ।

• ଇରାନରେ ଆମେରିକାର ଗୁପ୍ତ ମିଶନ

ଆମେରିକାର ପ୍ରଶାସନର ଜଣେ ଅଧିକାରୀ କହିଛନ୍ତି ଯେ ୟୁଏସର ଏହି ନିଖୋଜ ଆର୍ମି କର୍ଣ୍ଣେଲ ଇରାନ ସେନାଠାରୁ ବଞ୍ଚିବା ଲାଗି ବହୁ ଭିତରେ ଲୁଚି ରହିଥିଲେ । କର୍ଣ୍ଣେଲଙ୍କୁ ଉଦ୍ଧାର କରିବା ଲାଗି ଅସ୍ତ୍ରଶସ୍ତ୍ରରେ ଭରା ବିମାନଗୁଡ଼ିକ ଇରାନରେ ପ୍ରବେଶ କରିଥିଲା । ଏହି ଅଭିଯାନ ବହୁ ଜଟିଳ ଥିଲା ବୋଲି ଅଧିକାରୀ ଜଣକ କହିଛନ୍ତି । ଇରାନ ସେନା ପକ୍ଷରୁ ଲଗାତାର ଗୁଳିମାଡ଼ ହେଉଥିଲା । ଏହାରି ମଧ୍ୟରେ ଆମେରିକୀୟ କର୍ଣ୍ଣେଲଙ୍କୁ ଉଦ୍ଧାର କରାଯାଇଛି । ଟ୍ରମ୍ପ କହିଛନ୍ତି ଯେ କର୍ଣ୍ଣେଲ ଜଣକ ଆହତ ଅଛନ୍ତି, କିନ୍ତୁ ସେ ଏବେ ସୁରକ୍ଷିତ ।

ପଢନ୍ତୁ ଏହି ଖବର: ଆମେରିକାର ଯୁଦ୍ଧ ବିମାନ ଖସାଇଲା ଇରାନ; ଦୁଇ ହେଲିକପ୍ଟର ବି ଧ୍ଵସ୍ତ

• ନିଖୋଜ ଆମେରିକୀୟ ପାଇଲଟଙ୍କୁ ଖୋଜୁଥିଲା ଇରାନ

ଗତ ୪୮ ଘଣ୍ଟା ମଧ୍ୟରେ ଆମେରିକା ଓ ଇରାନ ମଧ୍ୟରେ ଘମାଘୋଟ ଯୁଦ୍ଧ ହୋଇଥିଲା । ଶନିବାର ଇରାନ ଦାବି କରିଥିଲା ଯେ ଶୁକ୍ରବାର ଆମେରିକାର ଦୁଇଟି ବ୍ଲାକ୍ ହକ୍ ହେଲିକପ୍ଟରକୁ ଟାର୍ଗେଟ କରିଥିଲା । ଆମେରିକାର ଶକ୍ତିଶାଳୀ ବିମାନକୁ ଆକାଶରୁ ଖସାଇଦେଇଥିଲା ଇରାନ । ଏଥିରେ ଥିବା ପାଇଲଟ ନିଖୋଜ ହେବା ପରେ ତାଙ୍କୁ ଖୋଜୁଥିଲ ଇରାନ । ଯଦି କେହି ଶତ୍ରୁ ପାଇଲଟକୁ ଖୋଜେ, ତେବେ ତାକୁ ପୁରସ୍କାର ଦିଆଯିବ ବୋଲି ଘୋଷଣା ହୋଇଥିଲା । ଏପରିକି ସାଧାରଣ ଜନତାଙ୍କୁ ମଧ୍ୟ ଶତ୍ରୁ ପକ୍ଷ ପାଇଲଟକୁ ଖୋଜିବାକୁ ଇରାନ ଅପିଲ୍ କରିଥିଲା ।