ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରବିବାର ଦିଲ୍ଲୀର ଏକ ଲାଇଭ ଇଭେଣ୍ଟରେ କଲ୍ କରି ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପ୍ରଶଂସା କରିଛନ୍ତି । ଆମେରିକା ସ୍ଵାଧୀନତା ଘୋଷଣାର ୨୫୦ ବର୍ଷ ପୂର୍ତ୍ତି ଅବସରରେ ଏହି କାର୍ଯ୍ୟକ୍ରମର ଆୟୋଜନ କରାଯାଇଥିଲା, ଯେଉଁଥିରେ ବିଦେଶ ସଚିବ ମାର୍କୋ ରୁବିଓ ଏବଂ ରାଷ୍ଟ୍ରଦୂତ ସେର୍ଗିଓ ଗର୍ ଯୋଗ ଦେଇଥିଲେ । ଏହି ଲାଇଭ୍ ଇଭେଣ୍ଟରେ ଟ୍ରମ୍ପ କଲ୍ କରି ପ୍ରଧାନମନ୍ତ୍ରୀ ମୋଦିଙ୍କୁ ପ୍ରଶଂସା କରିବା ସହ ତାଙ୍କର ଅତି ପ୍ରିୟ ବନ୍ଧୁ ବୋଲି କହିଛନ୍ତି ।

ଏହାସହିତ ସେ ମୋଦିଙ୍କୁ କେବେ କେବେ ହ୍ଵାଇଟ୍ ହାଉସକୁ ଆସିବାକୁ ନିମନ୍ତ୍ରଣ କରିଥିଲେ । ଟ୍ରମ୍ପ ଆହୁରି କହିଥିଲେ ଯେ ଭାରତ ତାଙ୍କ ଉପରେ ଓ ଆମେରିକା ଉପରେ ଶତ ପ୍ରତିଶତ ଭରସା କରିପାରିବ । ଏହାସହିତ ଜଣେ ସର୍ବୋତ୍କୃଷ୍ଟ ବିଦେଶ ସଚିବ ଭାବେ ମାର୍କୋ ରୁବିଓଙ୍କୁ ପ୍ରଶଂସା କରିଥିଲେ । ମାର୍କୋଙ୍କ ପରି ଜଣେ ବିଦେଶ ସଚିବ ପାଇଥିବାରୁ ଭାରତକୁ ବହୁତ କିଛି ପ୍ରତିବଦଳରେ ମିଳିପାରିବ ବୋଲି କହିଛନ୍ତି ଟ୍ରମ୍ପ । ଭାରତ ଯାହା ଚାହିଁବ, ତାକୁ ସେୟା ମିଳିବ ବୋଲି ଟ୍ରମ୍ପ ଲାଇଭ୍ ଇଭେଣ୍ଟର ଫୋନକଲରେ କହିଛନ୍ତି ।

• ଦ୍ଵିପାକ୍ଷିକ ବାଣିଜ୍ୟ ଚୁକ୍ତିର ଚୂଡ଼ାନ୍ତ ପର୍ଯ୍ୟାୟରେ ଉଭୟ ଦେଶ

ଆମେରିକାରେ ପ୍ରମୁଖ ପ୍ରବାସ ନୀତି ନିୟମ ପରିବର୍ତ୍ତନ ମଧ୍ୟରେ ରୁବିଓ ଭାରତ ଗସ୍ତ କରିଛନ୍ତି, ଯେଉଁଠି ପୂର୍ବରୁ ଆମେରିକାରେ ଆଇନଗତ ଭାବରେ ରହୁଥିବା ପ୍ରବାସୀମାନଙ୍କୁ ବିଦେଶରୁ ସ୍ଥାୟୀ ବାସସ୍ଥାନ ପାଇଁ ଆବେଦନ କରିବାକୁ କୁହାଯାଇଛି । ସେ କହିଛନ୍ତି ଯେ ଦୁଇ ଦେଶ ଏକ ଦ୍ୱିପାକ୍ଷିକ ବାଣିଜ୍ୟ ଚୁକ୍ତିନାମା ଚୂଡ଼ାନ୍ତ କରିବାକୁ ନିକଟତର ହୋଇଛନ୍ତି ଯାହା ଉଭୟ ଦେଶ ପାଇଁ ଉପକାରୀ ଏବଂ ସ୍ଥାୟୀ ସମାଧାନ ହେବ। ବାଣିଜ୍ୟ, ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥ, ଶକ୍ତି ସୁରକ୍ଷା ଏବଂ ପ୍ରତିରକ୍ଷା ସହଯୋଗ ବୃଦ୍ଧି ଉପରେ ରୁବିଓ ଭାରତୀୟ ବୈଦେଶିକ ମନ୍ତ୍ରୀ ଏସ ଜୟଶଙ୍କରଙ୍କ ସହିତ ଆଲୋଚନା କରିବା ପରେ ଏହି ଘୋଷଣା କରାଯାଇଛି ।

ପଢନ୍ତୁ ଏହି ଖବର: ଇଦ ପୂର୍ବରୁ ବଜାରରେ ବଢୁଛି ଟ୍ରମ୍ପ-ନେତାନ୍ୟାହୁ ମଇଁଷିର ଚାହିଦା; ସେଲ୍ଫି ପାଇଁ ପ୍ରବଳ ଭିଡ଼

• ରୁବିଓଙ୍କ ଗସ୍ତର ଉଦ୍ଦେଶ୍ୟ

ଭାରତ ଓ ଆମେରିକା ମଧ୍ୟରେ କିଛି ଦିନ ଧରି ଶୁଳ୍କ ଏବଂ ବାଣିଜ୍ୟ ନୀତିକୁ ବିବାଦ ଦେଖାଯାଇଥିଲା । ଏବେ ଦୁଇ ଦେଶ ମଧ୍ୟରେ ଆର୍ଥିକ ସମ୍ପର୍କକୁ ସୁଦୃଢ଼ ​​କରିବାର ଏକ ପ୍ରୟାସ ଭାବରେ ରୁବିଓଙ୍କ ଗସ୍ତକୁ ଦେଖାଯାଉଛି । ନିଜ ଭାରତ ଗସ୍ତ ସମୟରେ ରୁବିଓ କହିଥିଲେ, "ଭାରତ ଏକ ବିଶାଳ ଅର୍ଥନୀତି ଏବଂ ଆମର ପ୍ରମୁଖ ବାଣିଜ୍ୟ ଅଂଶୀଦାରମାନଙ୍କ ମଧ୍ୟରୁ ଗୋଟିଏ । ଏତେ ବଡ଼ ଅର୍ଥନୀତି ସହିତ ବାଣିଜ୍ୟକୁ ପୁନଃସନ୍ତୁଳନ କରିବା ସ୍ୱାଭାବିକ ଭାବରେ ଭିନ୍ନ ।"