Kim Jong Un Missing / କୁଆଡ଼େ ଗଲେ ଡିକ୍ଟେକ୍ଟର କିମ୍ ଜୋଙ୍ଗ ଉନ୍ ? ଆସୁନାହାନ୍ତି ନଜର, କେବେ ଏମିତି ହୋଇନି

ଉତ୍ତର କୋରିଆର ଏକଛତ୍ରବାଦୀ ଶାସକ କିମ୍ ଜୋଙ୍ଗ ଉନ୍ ଅନେକ ଦିନ ଧରି ନଜର ଆସିନାହାନ୍ତି । ପ୍ରାୟ ୨ ମାସ ହେଲାଣି କିମଙ୍କୁ କୌଣସି ସରକାରୀ କାର୍ଯ୍ଯକ୍ରମ କିମ୍ବା ସାର୍ବଜନୀନ ସ୍ଥାନରେ ଦେଖିବାକୁ ମିଳିନାହିଁ । କିମ୍ ହେଉଛନ୍ତି ସେହି ବ୍ୟକ୍ତି, ଯିଏକି କେବେ ହେଲେ ନିଜର ଉପସ୍ଥିତି ଜାହିର କରିବାର ସୁଯୋଗକୁ ହାତଛଡ଼ା କରନ୍ତି ନାହିଁ । ତାଙ୍କୁ ଉତ୍ତର କୋରିଆର ପ୍ରତ୍ୟେକ ଛୋଟବଡ଼ କାର୍ଯ୍ୟକ୍ରମରେ ଦେଖିବାକୁ ମିଳେ । ଏବେ ସେ ଅନେକ ଦିନ ଧରି ଦେଖିବାକୁ ନ ମିଳିବା ପରେ ତାଙ୍କ ଗାଏବ ହେବାକୁ ନେଇ ଚର୍ଚ୍ଚା ଜୋର ଧରିଛି ।

ନା କୌଣସି ଉଦଘାଟନ, ନା କୌଣସି ବଡ଼ ସର୍ବସାଧାରଣ ପ୍ରୋଗ୍ରାମ ବା କୌଣସି ସଦ୍ୟ ଫଟୋ..କେଉଁଠି ବି ତାଙ୍କୁ ଦେଖିବାକୁ ମିଳିନାହିଁ । ଏପରିକି କୋରିଆ ଯୁଦ୍ଧ ଶେଷ ହେବାର ୭୩ତମ ବାର୍ଷିକୀରେ ମଧ୍ୟ ତାଙ୍କ ଦେଖା ମିଳିନଥିଲା । ଏଥିଲାଗି ଏବେ ପ୍ରଶ୍ନ ଉଠୁଛି ଯେ ଉତ୍ତର କୋରିଆର ସବୁଠୁ ଶକ୍ତିଶାଳୀ ନେତା ଏବେ କେଉଁଠି ?

• ଶେଷ ଥର କେଉଁଠି ଦିଶିଥିଲେ ?

କିମ୍ ଜୋଙ୍ଗ ଉନ୍‌ଙ୍କୁ ଶେଷ ଥର ଲାଗି ଜୁନ ୯ ତାରିଖରେ ଦେଖିବାକୁ ମିଳିଥିଲା । ଏହି ସମୟରେ ସେ ଚୀନରୁ ଆସୁଥିବା କିଛି ପ୍ରତିନିଧିଙ୍କ ସହିତ ସାକ୍ଷାତକାର କରିଥିଲେ । ଏହାପରଠାରୁ ତାଙ୍କର ସାର୍ବଜନିକ ଗତିବିଧି ଉପରେ କୌଣସି ସୂଚନା ମିଳିନାହିଁ । ସାରା ଦେଶରେ ତାଙ୍କର ଅନୁପସ୍ଥିତି ଏଥିପାଇଁ ମଧ୍ୟ ଚର୍ଚ୍ଚାରେ ବିଷୟ ପାଲଟିଛି ଯେ ସେ ଆଜି ଯାଏଁ କେବେ ହେଲେ କୌଣସି ସରକାରୀ କାର୍ଯ୍ୟକ୍ରମରେ ଅନୁପସ୍ଥିତ ରହିନାହାନ୍ତି । ବିଶେଷ କରି ନୂଆ ଅଟ୍ଟାଳିକା, ଫ୍ୟାକ୍ଟ୍ରିର ଉଦଘାଟନ ସମୟରେ କିମ୍‌ଙ୍କୁ ଦେଖିବାକୁ ମିଳେ । ମାତ୍ର ବିଗତ ୨ ମାସ ମଧ୍ୟରେ ସେ ଏପରି କାର୍ଯ୍ୟକ୍ରମେ ମଧ୍ୟ ନଜର ଆସିନାହାନ୍ତି ।

• ଅଫିସର ଆସିଲେ, କିନ୍ତୁ କିମ୍ ନଥିଲେ

ଚଳିତ ସପ୍ତାହରେ ଉତ୍ତର କୋରିଆରେ ଅନେକ ମହତ୍ତ୍ଵପୂର୍ଣ୍ଣ କାର୍ଯ୍ଯକ୍ରମ ହୋଇଥିଲା । ଅଧିକାରୀମାନେ ପ୍ଯୋଙ୍ଗୟାଙ୍ଗ ସ୍ଥିତ କିମ୍ ଜୋଙ୍ଗ ଥାଇ ଇଲେକ୍ଟ୍ରିକ୍ ଲୋକୋମୋଟିଭ କମ୍ପ୍ଲେକ୍ସର ତଦାରଖ କରିଥିଲେ । ଏହାବ୍ୟତୀତ ନାମ୍ଫୋଠାରେ କୁନିପିଲାଙ୍କ ପାଇଁ ନିର୍ମିତ 'ସ୍କୁଲଚିଲ୍ଡ୍ରେନ୍ ପ୍ୟାଲେସ'ର ଉଦଘାଟନ ମଧ୍ୟ ହୋଇଥିଲ । ଏହି ସମୟରେ କିମଙ୍କ ସ୍ଥାନରେ ଜଣେ ବରିଷ୍ଠ ଅଧିକାରୀ ଆସିଥିଲେ । ଏହି ସମୟରେ କିମଙ୍କ ଅନୁପସ୍ଥିତି ସବୁଠୁ ବଡ଼ ଚର୍ଚ୍ଚାର ବିଷୟ ପାଲଟିଥିଲା ।

• କୁଆଡ଼େ ଗଲେ କିମ୍ ଜୋଙ୍ଗ ?

କିମ୍ ଜୋଙ୍ଗ ଉନ୍‌ଙ୍କ ଅନୁପସ୍ଥିତିକୁ ନେଇ ଅନେକ ପ୍ରକାରର ଆଲୋଚନା ହେଉଛି । ମାତ୍ର ଏଥିମଧ୍ୟରୁ କେଉଁଟା ସତ ତାହା ଜଣାପଡ଼ିନାହିଁ । ଗୋଟିଏ କାରଣ ପାଣିପାଗ ମଧ୍ୟ କୁହାଯାଉଛି । ଉତ୍ତର କୋରିଆରେ ଏବେ ତାପମାତ୍ରା ୩୭ ଡିଗ୍ରୀ ସେଲସିୟସ ଯାଏଁ ପହଞ୍ଚିଛି । ଏଥିଲାଗି ସ୍ଵାସ୍ଥ୍ୟ ଓ ଆରାମ ଦୃଷ୍ଟିରୁ ସେ ବାହାରକୁ ବାହାରୁନଥିବା କୁହାଯାଉଛି । ମାତ୍ର କେବଳ ଗରମ ପାଇଁ ଦୀର୍ଘ ୨ ମାସ ସାର୍ବଜନୀନ ସ୍ଥାନରୁ ଅନୁପସ୍ଥିତ ରହିବା ମଧ୍ୟ ସହଜରେ ଗ୍ରହଣ କରାଯାଉନାହିଁ । କାରଣ ଏହା ପୂର୍ବରୁ ମଧ୍ୟ ଗରମ ଦିନରେ ସେ ସାର୍ବଜନୀନ କାର୍ଯ୍ୟକ୍ରମରେ ନଜର ଆସିସାରିଛନ୍ତି ।

ପଢନ୍ତୁ ଏହି ଖବର: ଉତ୍ତର କୋରିଆର ନୂଆ ସମ୍ଵିଧାନ; ସେନା କରିବ ଅଟୋମେଟିକ୍ ପରମାଣୁ ଆକ୍ରମଣ, ଯଦି...

• ମୃତ୍ୟୁ ହୋଇଥାଇପାରେ କି କାରଣ ?

ସୋସିଆଲ ମିଡିଆରେ ଏହା ମଧ୍ୟ ଚର୍ଚ୍ଚା ହେଉଛି ଯେ କିମ୍ ଜୋଙ୍ଗ ଉନ୍‌ଙ୍କ ମୃତ୍ୟୁ ଘଟିଥାଇପାରେ । ତେବେ ଏହାକୁ ଆଖିବୁଜି ବିଶ୍ଵାସ କରିବା ମଧ୍ୟ ଭୁଲ୍ । କାରଣ ଉତ୍ତର କୋରିଆର ମିଡିଆ ପକ୍ଷରୁ ସେପରି କୌଣସି ସୂଚନା ଦିଆଯାଇନାହିଁ । ଉତ୍ତର କୋରିଆର ମିଡିଆ ମଧ୍ୟ ଏହା ଉପରେ ସ୍ପଷ୍ଟ ସୂଚନା ଦେଉନାହିଁ । ଏଠାରେ ଧ୍ୟାନ ଦେବା କଥା ହେଉଛି ବିଶ୍ଵର ପ୍ରମୁଖ ନେତାଙ୍କ ଅନୁପସ୍ଥିତିରେ ଏପରି ଗୁଜବ ସୃଷ୍ଟି ହୋଇଥାଏ । ସରକାରୀ ତଥ୍ଯ ନ ମିଳିବା ପର୍ଯ୍ୟନ୍ତ କୌଣସି ଖବର ଉପରେ ବିଶ୍ଵାସ କରିବା ଅନୁଚିତ ।