Argus News - ଖାମେନେଇଙ୍କ ଡାହାଣ ହାତର ରହସ୍ୟ; ୪୫ ବର୍ଷରୁ ପୁରା ଦୁନିଆଠୁ ଲୁଚାଉଥିଲେ...

ଗତ ଶନିବାର ଇସ୍ରାଏଲ ଓ ଆମେରିକା ମିଳିତ ଭାବେ ଇରାନ ଉପରେ ଆକ୍ରମଣ କରିଥିଲେ । ମଧ୍ୟପ୍ରାଚ୍ୟରେ ଏହି ଯୁଦ୍ଧ ଜାରି ଥିବାବେଳେ ଏହାରି ମଧ୍ୟରେ ଇରାନର ସର୍ବୋଚ୍ଚ ନେତା ଅୟାତୁଲ୍ଲାହ ଅଲ୍ଲୀ ଖାମେନେଇଙ୍କ ମୃତ୍ୟୁ ଘଟିସାରିଛି । ଏପରିକି ଇରାନର ସୁପ୍ରିମ ଲିଡର ହେବାର ୮ ବର୍ଷ ପୂର୍ବରୁ ଖାମେନେଇଙ୍କୁ ହତ୍ୟା ଉଦ୍ୟମ ହୋଇଥିଲା । ଏବେ ତାଙ୍କୁ ନେଇ ଏକ ରୋଚକ ତଥ୍ୟ ସାମ୍ନାକୁ ଆସୁଛି । ପ୍ରାୟ ୪୫ ବର୍ଷରୁ ସେ ନିଜ ଡାହାଣ ହାତକୁ ସର୍ବଦା ଲୁଚାଇ ରଖୁଥିଲେ । ତେବେ ଏହା ପଛର ରହସ୍ୟ କଣ ତାହା ଜାଣିବା ଲାଗି ଏବେ ସଭିଙ୍କ ମନରେ ଉତ୍କଣ୍ଠା ଦେଖାଦେଇଛି ।

୮୮ ବର୍ଷୀୟ ଖାମେନେଇ ଗତ ୩୫ ବର୍ଷ ଧରି ଇରାନର ନେତୃତ୍ଵ ନେଇଆସୁଥିଲେ । ଏହାଦ୍ଵାରା ସେ ସାରା ବିଶ୍ଵରେ ସବୁଠୁ ଲମ୍ବା ସମୟ ଧରି ଶାସନ ଗାଦିରେ ବସିଥିବା ଶାସକଙ୍କ ମଧ୍ୟରୁ ଜଣେ ହୋଇପାରିଥିଲେ । ତାଙ୍କ ମୃତ୍ୟୁ ଇରାନ ପାଇଁ ଏକ ଶକ୍ତ ଝଟକାଠୁ କମ ନୁହେଁ । ଆମେରିକାର ଆକ୍ରମଣରେ ଖାମେନେଇଙ୍କ ମୃତ୍ୟୁ ତାଙ୍କ କାର୍ଯ୍ୟାଳୟରେ ହୋଇଛି ।

ପଢନ୍ତୁ ଏହି ଖବର: 'ଯଦି ଜାହାଜ ବାହାରିବ ନିଆଁ ଲଗାଇଦେବୁ'; ଷ୍ଟ୍ରେଟ୍ ହୋର୍ମୁଜ ପଥ ବନ୍ଦ କଲା ଇରାନ

• କାହିଁକି ଡାହାଣ ହାତ ଲୁଚାନ୍ତି ଖାମେନେଇ ?

୧୯୮୧ ମସିହା ଜୁନ ୨୭ ତାରିଖ । ସେଦିନ ଇରାନ-ଇରାକ ଯୁଦ୍ଧ ମୋର୍ଚ୍ଚାରୁ ଫେରିବା ପରେ ଖାମେନେଇ ଏକ ମସଜିଦକୁ ନମାଜ ପଢିବାକୁ ଯାଇଥିଲେ । ନମାଜ ପରେ ସେ କିଛି ଅନୁଗାମୀଙ୍କ ସହିତ କଥା ହୋଇଥିଲେ ଓ ତାଙ୍କ ପ୍ରଶ୍ନର ଉତ୍ତର ଦେଇଥିଲେ । ଠିକ୍ ସେତିକି ବେଳେ ଜଣେ ବ୍ୟକ୍ତି ଖାମେନେଇଙ୍କ ଆଗକୁ ଆସିଥିଲେ ଓ ସଙ୍ଗେ ସଙ୍ଗେ ଏକ ଟେପ୍ ରେକର୍ଡର ରଖି ଏକ ବଟନ୍ ଚିପି ପଳାଇଥିଲେ । ଏହାର ଠିକ୍ ୧ ମିନିଟ୍ ପରେ ରେକର୍ଡରରୁ ହ୍ଵିସିଲ ବାଜି ଖୁବ ଜୋର ଶବ୍ଦ ସହିତ ବିସ୍ଫୋରଣ ହୋଇଥିଲା ।

• 'ଫୁରକାନ ଗୋଷ୍ଠୀର ଉପହାର'

ବିସ୍ଫୋରଣ କିଛି ସେକେଣ୍ଡ ପୂର୍ବରୁ ଟେପ୍ ରେକର୍ଡରରୁ ଏକ ବାର୍ତ୍ତା ଶୁଣିବାକୁ ମିଳିଥିଲା, ଯେଉଁଥିରେ କୁହାଯାଇଥିଲା ଯେ 'ଇସଲାମିକ ଗଣରାଜ୍ୟ ଫୁରକାନ ଗୋଷ୍ଠୀର ଉପହାର' । ଏଠାରେ କହିରଖୁଛୁ କି, ଫୁରକାନ ଗୋଷ୍ଠୀ ଏକ ଆତଙ୍କୀ ସଂଗଠନ, ଯିଏକି ଶାସକ ଧର୍ମଗୁରୁ ବ୍ୟବସ୍ଥାର ବିରୋଧ କରନ୍ତି ।

ଏହି ବିସ୍ଫୋରଣରେ ଖାମେନେଇଙ୍କ ଡାହାଣ ହାତ ସହିତ ଭୋକାଲ୍ କର୍ଡ ଓ ଫୁସଫୁସରେ ଆଘାତ ଲାଗିଥିଲା । ଖାମେନେଇଙ୍କୁ ସୁସ୍ଥ ହେବା ଲାଗି ଅନେକ ସମୟ ଲାଗିଥିଲା । ତାଙ୍କର ଅନେକ ଘା' ଭଲ ହୋଇଥିଲା ସତ, ହେଲେ ଡାହାଣ ହାତ ସବୁଦିନ ଲାଗି ଅଚଳ ହୋଇଯାଇଥିଲା । ଏହାପରେ ଖାମେନେଇ ବାମ ହାତରେ ଲେଖିବାଠୁ ସବୁ କାମ କରିବା ଶିଖିଥିଲେ । ସେ ଥରେ କହିଥିଲେ, "ମୋର ହାତର ଆବଶ୍ୟକତା ନାହିଁ । ମୋର କେବଳ ମୁଣ୍ଡ ଓ ଜିଭ କାମ କରୁଥିବା ଦରକାର ।"

ଅଧିକ ଖବର ପଢନ୍ତୁ...