ଆଇପିଏଲ ୨୦୨୬ର ୩୪ତମ ମ୍ୟାଚ ବାଙ୍ଗାଲୋରର ଚିନ୍ନାସ୍ଵାମୀ ଷ୍ଟାଡିୟମରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଓ ଗୁଜରାଟ ଟାଇଟାନ୍ସ ମଧ୍ୟ ଖେଳାଯାଇଥିଲା । ତେବେ ଆରସିବି ୫ ୱିକେଟରେ ଗୁଜରାଟକୁ ପରାସ୍ତ କରିଛି । ପ୍ରଥମେ ବ୍ୟାଟିଂ କରି ଗୁଜରାଟ ଟାଇଟାନ୍ସ ୨୦୫ ରନ କରିଥିଲା, କିନ୍ତୁ ବିରାଟ କୋହଲି ଏବଂ ଦେବଦତ୍ତ ପାଡିକଲଙ୍କ ଚମତ୍କାର ଅର୍ଦ୍ଧଶତକ ଯୋଗୁଁ RCB ଏହି ଲକ୍ଷ୍ୟ ହାସଲ କରିଥିଲା । ଫଳରେ ଗିଲଙ୍କ ଦଳ ପରାଜୟ ବରଣ କରିଛି ।

• ପଏଣ୍ଟ ଟେବୁଲର ଦ୍ଵିତୀୟ ସ୍ଥାନରେ RCB

ବାଙ୍ଗାଲୋର ପାଇଁ ବିରାଟ କୋହଲି ସର୍ବାଧିକ ୮୧ ରନ କରିଥିଲେ । ସେ ୪୪ ବଲ ଖେଳି ୪ଟି ଛକା ଏବଂ ୮ଟି ଚୌକା ମାରିଥିଲେ । ତାଙ୍କ ସହିତ ଦେବଦତ୍ତ ପାଡିକଲ ୨୭ ବଲରେ ୫୫ ରନ କରିଥିଲେ । ଏହି ବାମହାତୀ ବ୍ୟାଟସମ୍ୟାନ ତାଙ୍କ ଇନିଂସରେ ୬ଟି ଛକା ଏବଂ ୨ଟି ଚୌକା ମାରିଥିଲେ । ଏହି ବିଜୟ ସହିତ, RCB ପଏଣ୍ଟ ଟେବୁଲରେ ୧୦ ପଏଣ୍ଟ ସହିତ ରାଜସ୍ଥାନ ରୟାଲ୍ସକୁ ପଛରେ ପକାଇ ଦ୍ୱିତୀୟ ସ୍ଥାନରେ ପହଞ୍ଚିଛି ।

• କମାଲ୍ କଲା ବିରାଟ-ପାଡିକଲଙ୍କ ଯୋଡ଼ି

୨୦୬ ରନର ଟାର୍ଗେଟ ପିଛା କରି ବାଙ୍ଗାଲୋରର ଆରମ୍ଭ ଖରାପ ହୋଇଥିଲା । ସିଜିନର ପ୍ରଥମ ମ୍ୟାଚ୍ ଖେଳୁଥିବା ଜାକବ ବେଥେଲ ୧୪ ରନ କରି ସିରାଜଙ୍କ ଦ୍ୱାରା ଆଉଟ ହୋଇଥିଲେ । ବଡ଼ କଥା ହେଉଛି ବିରାଟ କୋହଲି ପ୍ରଥମ ବଲରେ ଏକ ବଡ଼ ସଟ୍ ଖେଳିବାକୁ ଯାଉଥିବାବେଳେ କ୍ୟାଚ୍ ଆଉଟ୍ ହୋଇଥାନ୍ତେ, ହେଲେ ଉକ୍ତ କ୍ୟାଚଟି ଡ୍ରପ୍ ହୋଇଥିଲା । ସିରାଜଙ୍କ ବଲରେ ସୁନ୍ଦର ଏକ ସରଳ କ୍ୟାଚ୍ ଛାଡିଥିଲେ । ବିରାଟଙ୍କୁ ଜୀବନଦାନ ଦେବା ମାତ୍ରେ ଗୁଜରାଟ ସମସ୍ୟାରେ ପଡ଼ିଥିଲା। ପାଡିକଲଙ୍କ ସହ ମିଶି ବିରାଟ କୋହଲି ଗୁଜରାଟ ଉପରେ ଆକ୍ରମଣ କରିଥିଲେ ।

ପଢନ୍ତୁ ଏହି ଖବର: ମା'ଙ୍କୁ ମୁଖାଗ୍ନି ଦେବାପରେ ପୁଣି ପଡ଼ିଆକୁ ଓହ୍ଲାଇଲେ ଏହି କ୍ରିକେଟର…ଦେଶ ପ୍ରତି କର୍ତ୍ତବ୍ୟ କଲେ

• ସେଞ୍ଚୁରୀରୁ ବଞ୍ଚିତ ହେଲେ ବିରାଟ

ଦୁହେଁ ମାତ୍ର ୨୬ ବଲରେ ଅର୍ଦ୍ଧଶତକୀୟ ଭାଗୀଦାରି କରିଥିଲେ, ଯାହା RCBକୁ ୯ ଓଭରରେ ୧୦୦ ଅତିକ୍ରମ କରାଇଥିଲା । ପାଡିକଲ୍ ୨୦ ବଲ୍‌ରେ ୬ଟି ଛକା ମାରି ଅର୍ଦ୍ଧଶତକ ପୂରଣ କରିଥିଲେ, ଯେତେବେଳେ ବିରାଟ କୋହଲି ୩୦ ବଲ୍‌ରେ ଅର୍ଦ୍ଧଶତକ ପୂରଣ କରିଥିଲେ । ଏହି ଦୁଇ ବ୍ୟାଟ୍ସମ୍ୟାନ୍ ୪୭ ବଲ୍‌ରେ ଶତକୀୟ ଭାଗୀଦାରି କରି ଗୁଜରାଟକୁ ମ୍ୟାଚରୁ ବାହାର କରି ଦେଇଥିଲେ । କିନ୍ତୁ, ୮୧ ରନରେ ଜାସନ୍ ହୋଲ୍ଡରଙ୍କ ଦ୍ୱାରା ବୋଲ୍ଡ ହୋଇ ବିରାଟ କୋହଲି ଶତକରୁ ବଞ୍ଚିତ ହୋଇଥିଲେ ।

• ବ୍ୟର୍ଥ ଗଲା ସାଇ ସୁଦର୍ଶନଙ୍କ ଶତକ

ସାଇ ସୁଦର୍ଶନ ଗୁଜରାଟ ଟାଇଟାନ୍ସ ପାଇଁ ଏକ ଚମତ୍କାର ଶତକ ହାସଲ କରିଥିଲେ । ସେ ୫୮ ବଲରେ ୧୦୦ ରନ୍ ପୂରଣ କରିଥିଲେ । ଏହି ବାମହାତୀ ବ୍ୟାଟସମ୍ୟାନ ତାଙ୍କର ତୃତୀୟ IPL ଶତକ ହାସଲ କରିଥିଲେ ଏବଂ ସବୁଠାରୁ କମ୍ ଇନିଂସରେ ୨୦୦୦ IPL ରନ୍ ପୂରଣ କରିଥିବା ଖେଳାଳି ମଧ୍ୟ ହୋଇଥିଲେ । ତଥାପି, ତାଙ୍କର ଇନିଂସ ବ୍ୟର୍ଥ ଯାଇଥିଲା । ଶେଷରେ, RCB ଜିତିଥିଲା ଓ ଗୁଜରାଟ ହାରିଥିଲା ।

ଅଧିକ ଖବର ପଢନ୍ତୁ...