ଖରାଦିନ ଆସିବା ମାତ୍ରେ ଶରୀରରୁ ପ୍ରବଳ ଝାଳ ବାହାରେ ଏବଂ ଶରୀର ଦୁର୍ଗନ୍ଧ ହୁଏ । ସାଙ୍ଗସାଥୀ, ଲୋକଙ୍କ ମେଳରେ ଝାଳଦେହରେ ବସିବା ଲାଗି ସମସ୍ତଙ୍କୁ ଅସହଜ ମନେ ହୁଏ । ଏଣୁ ଏପରି ଏକ ପରିସ୍ଥିତିରୁ ବର୍ତ୍ତିବା ଲାଗି ସମସ୍ତେ ଘରୁ ବାହାରିବା ମାତ୍ରେ ପରଫ୍ୟୁମ ବ୍ୟବହାର କରନ୍ତି । କିଛି ଲୋକ ଅତର ବି ବ୍ୟବହାର କରନ୍ତି । ଏହି ଉଭୟ ପ୍ରଡକ୍ଟ ଶରୀରରେ ବାସ ଭରିବା କାମ କରନ୍ତି । ବେଳେବେଳେ ଗୋଟିଏ ପ୍ରଶ୍ନ ଲୋକଙ୍କ ମନରେ ଦ୍ଵନ୍ଦ୍ଵ ସୃଷ୍ଟି କରେ ଯେ ଅତର ଓ ପରଫ୍ୟୁମ ମଧ୍ୟରେ ଫରକ୍ କଣ ଓ ଖରାଦିନ ପାଇଁ କେଉଁଟି ଭଲ ହୋଇଥାଏ ।

କିଛି ଲୋକ ଉଭୟ ପ୍ରଡକ୍ଟକୁ ଗୋଟିଏ ବୋଲି ଭାବିନିଅନ୍ତି । ମାତ୍ର ଅସଲ କଥା ହେଉଛି ଯେ ଏହାର ବାସ୍ନା, ତିଆରି କରିବା ପ୍ରକ୍ରିୟା ଓ ସ୍ଥାୟିତ୍ଵ ସମ୍ପୂର୍ଣ୍ଣ ଅଲଗା । ଯେଉଁଠି ଅତର ପ୍ରାକୃତିକ ତେଲ ଓ ଫୁଲର ବାସ୍ନାରୁ ତିଆରି ହୁଏ, ସେଇଠି ପରଫ୍ୟୁମ୍ ଆଲକୋହଲ୍ ଓ ଅନେକ ପ୍ରକାରର ସୁଗନ୍ଧଯୁକ୍ତ ରାସାୟନିକ ପଦାର୍ଥକୁ ବ୍ୟବହାର କରି ତିଆରି ହୋଇଥାଏ । ତେବେ ଆସନ୍ତୁ ଏଠାରେ ଜାଣିବା ପ୍ରକୃତରେ ଏହି ଦୁଇ ପ୍ରଡକ୍ଟ ଭିତରେ ପ୍ରଭେଦ କଣ ଓ ଗରମ ପାଇଁ କେଉଁଟା ଭଲ ?

• ଅତର ବା ଇତର କଣ ?

ଅତରକୁ ଏକ ପ୍ରାକୃତିକ ସୁଗନ୍ଧ ବୋଲି କୁହାଯାଏ, କାରଣ ଏହାକୁ ତିଆରି କରିବା ଲାଗି ପ୍ରାକୃତିକ ପଦାର୍ଥର ବ୍ୟବହାର ହୋଇଥାଏ ଯେପରିକି ଫୁଲ, ହର୍ବସ୍‌, ମସଲା ଓ କିଛି ସୁଗନ୍ଧଯୁକ୍ତ କାଠ । ଏହାକୁ ପାରମ୍ପରିକ ଉପାୟରେ ଷ୍ଟିମ୍ ଡିଷ୍ଟିଲେସନ ଉପାୟରେ ପ୍ରସ୍ତୃତ କରାଯାଏ । ଏହାପରେ ଉକ୍ତ ମିଶ୍ରଣକୁ ଚନ୍ଦନ କିମ୍ବା ଅନ୍ୟ ପ୍ରାକୃତିକ ତେଲରେ ମିଶାଯାଏ । ଏହାର ସବୁଠୁ ଖାସ୍ କଥା ହେଉଛି ଯେ ଏଥିରେ କୌଣସି ପ୍ରକାର ଆଲକୋହଲର ବ୍ୟବହାର ହୁଏ ନାହିଁ । ଏଥିଲାଗି ସମ୍ବେଦନଶୀଳ ବା କୋମଳ ତ୍ଵଚା ଥିବା ଲୋକେ ଏହାକୁ ବ୍ୟବହାର କରନ୍ତି ।

ଅତରରେ ଆପଣଙ୍କୁ ଅନେକ ପ୍ରକାରର ସୁଗନ୍ଧ ମିଳିବ । ଏଥିରେ ସବୁଠୁ ଅଧିକ ଗୋଲାପ ଅତର, ଜାସ୍ମିନ୍ ଅତର, ଅଗରଉଡ୍ ଅତର, ଖସ୍ ଅତର ଏବଂ କସ୍ତୁରୀ ଅତର ସାମିଲ । ଏହି ଅତର ବେଶ ଗାଢା ହୋଇଥାଏ, ଯାହାଦ୍ଵାରା ଆପଣ ଶରୀରରେ ଏହାକୁ ଟିକେ ଲଗାଇଲେ ଏହା ସାରା ଦିନ ସୁଗନ୍ଧ ଦେଇଥାଏ । ଏହାକୁ ବ୍ୟବହାର କରିବାର ପ୍ରକ୍ରିୟା ମଧ୍ୟ ସମ୍ପୂର୍ଣ୍ଣ ଅଲଗା । ଆପଣ ପରଫ୍ୟୁମକୁ ସ୍ପ୍ରେ କରୁଥିବାବେଳେ ଅତରକୁ ଶରୀର ଓ କପଡ଼ାରେ ଲଗାଯାଏ ।

• ଅତରଠାରୁ କିପରି ଭିନ୍ନ ପରଫ୍ୟୁମ୍ ?

ପରଫ୍ୟୁମକୁ ପ୍ରସ୍ତୁତ କରିବା ଲାଗି ସୁଗନ୍ଧଯୁକ୍ତ ପଦାର୍ଥ, ତେଲ ଏବଂ ଆଲକୋହଲକୁ ବ୍ୟବହାର କରି ପ୍ରସ୍ତୁତ କରାଯାଏ । ଆଧୁନିକ ପରଫ୍ୟୁମକୁ ଅଲଗା ଅଲଗା ପ୍ରକାରରେ ତିଆରି କରାଯାଏ, ଯେପରି Eau de Parfum, Eau de Toilette ଓ Cologne । ପରଫ୍ୟୁମରେ ପ୍ରାକୃତିକ ସୁଗନ୍ଧଯୁକ୍ତ ପଦାର୍ଥ ସହ କିଛି ରାସାୟନିକ ପଦାର୍ଥ ମଧ୍ୟ ମିଶାଯାଏ । ଏହାଦ୍ଵାରା ଅନେକ ପ୍ରକାରର ପରଫ୍ୟୁମକୁ ତିଆରି କରାଯାଏ ଯେପରି ଫ୍ଲୋରାଲ୍‌, ଆକ୍ଵାଟିକ୍ । ଅଧିକାଂଶ ପରଫ୍ୟୁମ ସ୍ପ୍ରେ ବୋତଲରେ ଆସିଥାଏ, ଯାହାଦ୍ଵାରା ଏହାର ବ୍ୟବହାର ମଧ୍ୟ ସହଜ ହୋଇଯାଏ ।

ପଢନ୍ତୁ ଏହି ଖବର: କାହିଁକି ହୋଟେଲ ବେଡରେ ବିଛାଯାଏ ଧଳା ବେଡସିଟ୍, ରଙ୍ଗୀନ କାହିଁକି ନୁହେଁ ?

• ଖରାଦିନ ପାଇଁ କେଉଁଟା ଭଲ ?

ଶରୀରରେ ସୁଗନ୍ଧ ଭରିବା ଲାଗି ଏହି ଦୁଇ ପ୍ରକାରର ସୁଗନ୍ଧଯୁକ୍ତ ପଦାର୍ଥକୁ ବ୍ୟବହାର କରାଯାଇପାରିବ, କିନ୍ତୁ ଆପଣଙ୍କୁ ନିଜର ତ୍ଵଚା ପାଇଁ ଉପଯୁକ୍ତ ଅତର ବା ପରଫ୍ୟୁମକୁ ଚୟନ କରିବାକୁ ପଡ଼ିବ । ଆପଣ ନିଜ ପସନ୍ଦ ସୁଗନ୍ଧ ଅନୁସାରେ ଏହାକୁ ଚୟନ କରିବେ । ଯଦି ଆପଣ ପ୍ରାକୃତିକ ଓ ଅଧିକ ସମୟ ପର୍ଯ୍ୟନ୍ତ ସୁଗନ୍ଧ ଚାହୁଁଛନ୍ତି, ତେବେ ଅତର ବ୍ୟବହାର କରିପାରିବେ । ମାତ୍ର ଦୈନନ୍ଦିନ ବ୍ୟବହାର ଲାଗି ଆପଣ ପରଫ୍ୟୁମ ବ୍ୟବହାର କରିପାରିବେ । ଆଧୁନିକ ପରଫ୍ୟୁମରେ ଆପଣଙ୍କୁ ଅନେକ ପ୍ରକାର ମିଳିଥାଏ, ଯାହାଦ୍ଵାରା ଆପଣ ନିଜ ମୁଡ୍ ଅନୁଯାୟୀ ସୁଗନ୍ଧକୁ ଚୟନ କରିପାରିବେ । ଖରାଦିନେ ଅଧିକ ଝାଳ ବାହାରୁଥିବାରୁ ଆପଣ ଅତର ବ୍ୟବହାର କରିବା ଉଚିତ, ଯାହାଦ୍ଵାରା ଅଧିକ ସମୟ ପର୍ଯ୍ୟନ୍ତ ଆପଣଙ୍କ ଶରୀରରେ ସୁଗନ୍ଧ ରହିବ ।