ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗୀକୃତ ହେଲା ୭୫ ଅମୃତ ଭାରତ ରେଳ ଷ୍ଟେସନ । ଏକାସଙ୍ଗେ ଦେଶର ୨୦ଟି ରାଜ୍ୟରେ ଥିବା ୭୫ଟି ପୁନଃବିକଶିତ ଅମୃତ ଭାରତ ରେଳ ଷ୍ଟେସନର ଲୋକାର୍ପଣ କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହା ମଧ୍ୟରେ ଓଡ଼ିଶାର ୭ଟି ରେଳ ଷ୍ଟେସନ ସହ ପଞ୍ଜାବର ୧୧୦ ବର୍ଷ ପୁରୁଣା ଐତିହାସିକ ଜଲନ୍ଧର କ୍ୟାଣ୍ଟ ଷ୍ଟେସନ ମଧ୍ୟ ସାମିଲ ରହିଛି ।

ବଲାଙ୍ଗୀର, ବାରିପଦା, ବରପାଲୀ, ବିମଲଗଡ଼, ତାଲଚେର, କେସିଙ୍ଗା ଓ ପାରଳାଖେମୁଣ୍ଡି ରେଳ ଷ୍ଟେସନକୁ ମିଳିବ ନୂଆ ଗତି । ପଞ୍ଜାବର ଜଳନ୍ଧର ଗସ୍ତ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଜ୍ୟର ଭିତ୍ତିଭୂମି ଓ ବିକାଶ ପାଇଁ ଏକାଧିକ ଗୁରୁତ୍ୱପୂର୍ଣ୍ଣ ପ୍ରକଳ୍ପର ଶିଳାନ୍ୟାସ ଓ ଉଦଘାଟନ କରିଛନ୍ତି ।

ଅଧିକ ପଢ଼ନ୍ତୁ: ବିଦେଶୀ ଭାରତରେ ସମ୍ପତ୍ତି କିଣିଲେ ସେ ଭାରତୀୟ ହୋଇଯାଆନ୍ତିନି: କୋଲକାତା ହାଇକୋର୍ଟ

ଅଭିଭାଷଣରେ ମୋଦି କହିଛନ୍ତି, ରେଳବାଇ ହେଉଛି ଗରିବ ଓ ମଧ୍ୟବିତ୍ତ ପରିବାରର ମୁଖ୍ୟ ପରିବହନ ମାଧ୍ୟମ । କିନ୍ତୁ ଦୀର୍ଘ ଦଶନ୍ଧି ଧରି ଏହାକୁ ଅବହେଳା କରାଯାଇଥିଲା । ରେଳବାଇର ଯେଉଁ ବିକାଶମୂଳକ କାର୍ଯ୍ୟ ଆଜି କରାଯାଉଛି, ତାହା ପ୍ରାୟ ୩୦ ରୁ ୪୦ ବର୍ଷ ପୂର୍ବରୁ ଶେଷ ହେବା ଉଚିତ ଥିଲା ।

ଏଭଳି ପୁରୁଣା ମାନସିକତାକୁ ନେଇ ଏକ 'ବିକଶିତ ଭାରତ' ଗଠନ କରିବା ଅସମ୍ଭବ ଥିଲା। ସେଥିପାଇଁ ବିଜେପି ସରକାର ଗତ କିଛି ବର୍ଷ ହେବ ଏହି ସ୍ଥିତିରେ ବଡ଼ ପରିବର୍ତ୍ତନ ଆଣିବା ଆରମ୍ଭ କରିଛନ୍ତି । ଆଧୁନିକୀକରଣ ହୋଇଥିବା ନୂଆ ରେଳ ଷ୍ଟେସନଗୁଡ଼ିକ କେବଳ ଯାତାୟାତର ମାଧ୍ୟମ ହୋଇ ରହିନାହିଁ, ବରଂ ଏହା ଦେଶର କଳା, ସଂସ୍କୃତି ଏବଂ ବ୍ୟବସାୟର ପ୍ରମୁଖ କେନ୍ଦ୍ର ପାଲଟିଛି କହିଲେ ମୋଦି ।