କୋଲକାତା: କୌଣସି ବିଦେଶୀଙ୍କ ଜମି ରେକର୍ଡ ଭାରତୀୟ ନାଗରିକତାର ପ୍ରମାଣ ନୁହେଁ । ଅର୍ଥାତ ଜଣେ ବିଦେଶୀ ଆସି ଭାରତରେ ଜମି ଖଣ୍ଡେ କିଣିଦିଲେ ସେ ଭାରତୀୟ ହୋଇଯାଆନ୍ତି ନାହିଁ । ଗତ ଜୁନ ମାସରେ ପଶ୍ଚିମବଙ୍ଗରେ ବାଂଲାଦେଶୀ ଅନୁପ୍ରବେଶକାରୀ ଅଭିଯୋଗରେ ଅଟକ ଥିବା ନାସିର ମୋଲ୍ଲାଙ୍କ ଆବେଦନର ଶୁଣାଣି କରି କୋଲିକତା ହାଇକୋର୍ଟ ଏହି ରାୟ ଦେଇଛନ୍ତି ।

ହାଇକୋର୍ଟ ତାଙ୍କ ଆଦେଶ ଉପରେ ବିସ୍ତାର କରି କହିଛନ୍ତି ଯେ କେବଳ ଜଣେ ବିଦେଶୀ ଭାରତରେ ସମ୍ପତ୍ତି କିଣିଲେ ତାହାର ଅର୍ଥ ନୁହେଁ ଯେ ସେ ଜଣେ ଭାରତୀୟ ନାଗରିକ । କୋର୍ଟ ଏହି ମାମଲାର ଶୁଣାଣି ବେଳେ ଦୁଇ ପୃଷ୍ଠାର ଆଦେଶରେ କହିଛନ୍ତି ଯେ ଜଣେ ବିଦେଶୀ ନାଗରିକ ଭାରତରେ ସମ୍ପତ୍ତି କିଣିପାରିବେ । ହେଲେ ଜଣେ ବାହାର ଦେଶର ନାଗରିକ କେବଳ ଭାରତରେ ଏକ ଅସ୍ଥାବର ସମ୍ପତ୍ତି କିଣୁଥିବାରୁ ତାଙ୍କୁ ଭାରତୀୟ ନାଗରିକ ଆଦୌ କୁହାଯିବ ନାହିଁ ।

• କଣ ଏହି ମାମଲା ?

ମୋଲ୍ଲାଙ୍କ ସମ୍ପର୍କୀୟଙ୍କ ଦ୍ଵାରା କୋଲକାତା ହାଇକୋର୍ଟରେ ଏହି ଆବେଦନ ଦାଖଲ ହୋଇଥିଲା । ମୋଲ୍ଲା ବର୍ତ୍ତମାନ ଡିଟେନସନ୍ ହୋମରେ ଅଛନ୍ତି । ତାଙ୍କ ଓକିଲ ଦର୍ଶାଇଥିଲେ ଯେ ବନ୍ଦୀ ଜଣକ ଜଣେ ଭାରତୀୟ ନାଗରିକ, କିନ୍ତୁ ପଶ୍ଚିମବଙ୍ଗ ସରକାର ଦାବି କରୁଛନ୍ତି ଯେ ମୋଲ୍ଲା ଜଣେ ବିଦେଶୀ ବୋଲି ନିଜେ ସ୍ୱୀକାର କରିଥିଲା । ଏହାପରେ କୋର୍ଟ ଆବେଦନକାରୀଙ୍କୁ ତାଙ୍କର ଭାରତୀୟ ନାଗରିକତା ପ୍ରମାଣ କରୁଥିବା କାଗଜପତ୍ର ଦାଖଲ କରିବାକୁ କହିଥିଲେ ।

ହାଇକୋର୍ଟ ଏହି ମାମଲାର ଶୁଣାଣି କରିବା ସମୟରେ କହିଛନ୍ତି ଯେ କେବଳ ଜମି ରେକର୍ଡ ବ୍ୟତୀତ ସେ ଜଣେ ଭାରତୀୟ ନାଗରିକ ବୋଲି କୌଣସି ପ୍ରମାଣ ମିଳିନାହିଁ । ଆବେଦନକାରୀ ପୁଣି ଯେଉଁ ଜମି ରେକର୍ଡ ବିଷୟରେ କହୁଛନ୍ତି, ତାହା ଭାରତୀୟ ନାଗରିକତାର ପ୍ରମାଣର ଦଲିଲ ନୁହେଁ । କୋର୍ଟ ଆବେଦନକାରୀଙ୍କୁ ଜୁଲାଇ ୨୦ରେ ଭାରତୀୟ ନାଗରିକ ବୋଲି ପ୍ରମାଣ କରୁଥିବା ଯେକୌଣସି ଦଲିଲ ଦାଖଲ କରିବାକୁ ଆଉ ଏକ ସୁଯୋଗ ଦେଇଛନ୍ତି ।

ପଢନ୍ତୁ ଏହି ଖବର: 'ପାନ୍ କାର୍ଡ ଏବଂ ଭୋଟର ପରିଚୟପତ୍ର ଭାରତୀୟ ନାଗରିକତା ପରିଚୟ ନୁହେଁ'

• 'ପାସପୋର୍ଟ ବି ନୁହଁ ନାଗରିକତାର ପ୍ରମାଣ'

ଗତ ମାସରେ କେନ୍ଦ୍ର ସରକାର ସ୍ପଷ୍ଟ କରିଥିଲେ ଯେ ପାସପୋର୍ଟ ଭାରତୀୟ ନାଗରିକତାର ଚୂଡ଼ାନ୍ତ ପ୍ରମାଣ ନୁହେଁ । ଏହି ଡକ୍ୟୁମେଣ୍ଟଗୁଡ଼ିକ ଅଣ-ନାଗରିକମାନଙ୍କୁ ମଧ୍ୟ ଦିଆଯାଇପାରିବ । ବମ୍ବେ ହାଇକୋର୍ଟ ୨୦୧୩ର ଏକ ରାୟରେ ସମାନ କଥା ଉପସ୍ଥାପନ କରିଥିଲେ ଏବଂ କହିଥିଲେ ଯେ ଅଣ-ନାଗରିକମାନଙ୍କୁ ପାସପୋର୍ଟ ପାଇଁ ଅନୁମତି ଦେଉଥିବାରୁ ଏହାକୁ ନାଗରିକତାର 'ନିର୍ଣ୍ଣାୟକ' ପ୍ରମାଣ ଭାବରେ ବିବେଚନା କରାଯାଇପାରିବ ନାହିଁ ।

• ବଙ୍ଗରେ NRC କଣ ?

ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ରାଜ୍ୟରେ ଆସାମ ଭଳି ଜାତୀୟ ନାଗରିକ ପଞ୍ଜିକା (NRC) ଆରମ୍ଭ କରିବାକୁ ସଙ୍କେତ ଦେଇଛନ୍ତି । ସେ ଗତ ମାସରେ କହିଥିଲେ, "ଆମକୁ କିଛି ସମୟ ଦିଅନ୍ତୁ । ପଶ୍ଚିମବଙ୍ଗରେ ଭୂମି ଜିହାଦ, ଲଭ୍ ଜିହାଦ ଏବଂ ବଳପୂର୍ବକ ଧର୍ମାନ୍ତରୀକରଣ ବିରୁଦ୍ଧରେ ଏକ କଠୋର ଆଇନ ଏବଂ ଏକ ସମାନ ନାଗରିକ ସଂହିତା ପ୍ରଚଳନ କରାଯିବ ।"