କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଫେବୃଆରୀ ୧ ତାରିଖରେ କେନ୍ଦ୍ର ବଜେଟ୍ ୨୦୨୬ ଉପସ୍ଥାପନ କରିବେ । ସଂସଦରେ ନବମ ଥର ଲାଗି ନିର୍ମଳା ବଜେଟ ଉପସ୍ଥାପନା କରିବାକୁ ଯାଉଛନ୍ତି । ନିର୍ମଳାଙ୍କ ପେଡି ଉପରେ ପୁରା ଦେଶବାସୀଙ୍କ ନଜର ରହିଛି । ଆର୍ଥିକ ବର୍ଷ ୨୦୨୬-୨୭ ପାଇଁ ଆଗତ ଏହି ବଜେଟ୍‌ ଉପରେ ମଧ୍ୟବିତ୍ତଙ୍କ ଉପରେ ବିଶେଷ ଫୋକସ କରାଯାଇପାରେ ବୋଲି ଆଶା କରାଯାଉଛି । ଶିକ୍ଷାଠାରୁ ସ୍ବାସ୍ଥ୍ୟକ୍ଷେତ୍ର ପର୍ଯ୍ୟନ୍ତ ବଡ଼ ଆଶା ରହିଛି । ଅର୍ଥମନ୍ତ୍ରୀ ନିର୍ମଳା ସୀତାରମଣ ବଜେଟ୍‌ରେ ୫ ବଡ଼ ଘୋଷଣା କରିବେ ବୋଲି ମଧ୍ୟ ଆଶା କରାଯାଉଛି ।

ଟ୍ୟାକ୍ସ ସ୍ଲାବରେ ପୁଣି ମିଳିପାରେ ଖୁସି ଖବର

ନୂତନ ଆୟକର ବ୍ୟବସ୍ଥା ଅନୁଯାୟୀ, ମାନକ ରିହାତି ₹୭୫,୦୦୦ରୁ ₹୧ ଲକ୍ଷକୁ ବୃଦ୍ଧି କରାଯାଇପାରେ । ଏହାଦ୍ଵାରା ବେତନଭୋଗୀ ବ୍ୟକ୍ତିମାନଙ୍କର ₹୧୩ ଲକ୍ଷ ପର୍ଯ୍ୟନ୍ତ ଆୟ କରମୁକ୍ତ ହେବ । ବର୍ତ୍ତମାନ, ₹୧୨.୭୫ ଲକ୍ଷ ପର୍ଯ୍ୟନ୍ତ ଆୟ କରମୁକ୍ତ ଅଛି । ଭାରତୀୟ ଶିଳ୍ପ ମହାସଂଘ (CII) ସରକାରଙ୍କୁ ପରାମର୍ଶ ଦେଇଛି ଯେ ବ୍ୟବହାରତା ବୃଦ୍ଧି କରିବା ପାଇଁ ଲୋକଙ୍କ ହାତରେ ଅଧିକ ଟଙ୍କା ଛାଡିବା ଜରୁରୀ । ଟିକସ ଛାଡ଼ ବୃଦ୍ଧି କରିବା ଦ୍ୱାରା ଲୋକଙ୍କ କ୍ରୟ ଶକ୍ତି ବୃଦ୍ଧି ପାଇବ, ଯାହା ଅର୍ଥନୀତିକୁ ଲାଭ ଦେବ । ଏପରି ହେଲେ ମଧ୍ୟବିତ୍ତ ବର୍ଗଙ୍କ ହାତକୁ ଅଧିକ ଟଙ୍କା ଆସିବ । ମାସରେ କିଛି ହଜାର ଟଙ୍କା ସଞ୍ଚିତ ହୋଇପାରିବ । ଏହା ନିବେଶ ଏବଂ ସଞ୍ଚୟରେ ଲାଗିବ ।

ବଢିପାରେ ପିଏମ-କିଷାନ ଯୋଜନା ରାଶି

ସଂସଦରେ ଉପସ୍ଥାପନ ହେବାକୁ ଥିବା କେନ୍ଦ୍ରୀୟ ବଜେଟ୍୨୦୨୬ରେ ପ୍ରଧାନମନ୍ତ୍ରୀ କିଷାନ ଯୋଜନା ରାଶିକୁ ବାର୍ଷିକ ୬୦୦୦ରୁ ୯୦୦୦ ଟଙ୍କାକୁ ବୃଦ୍ଧି କରାଯାଇପାରେ । ଗତ ୩ ବର୍ଷ ଧରି ଏହି ରାଶିକୁ ବଢାଇବା ଉପରେ ଚର୍ଚ୍ଚା ହେଉଛି । ୨୦୧୯ରେ ଯୋଜନା ଆରମ୍ଭ ହେବାପରଠାରୁ ଏଥିରେ କୌଣସି ପରିବର୍ତ୍ତନ କରାଯାଇନାହିଁ । ୨୦୨୪ ସଂସଦୀୟ ସ୍ଥାୟୀ ସମିତି ଏହି ରାଶିକୁ ଦୁଇଗୁଣା କରି ୧୨,୦୦୦ କରିବାକୁ ପରାମର୍ଶ ଦେଇଥିଲେ । ଚାଷୀ ସଂଗଠନର କହିବାନୁସାରେ, ୨୦୧୯ରେ ମିଳୁଥିବା ୬୦୦୦ ଟଙ୍କା ଦରଦାମ ବୃଦ୍ଧି ଯୋଗୁଁ ଏବେ ୫୦୦୦ ହୋଇଛି । ଏହାକୁ ବଢାଇ ୧୨,୦୦୦ ଟଙ୍କା କରିବା ଉଚିତ । ଏହି ରାଶି ବଢିଲେ ୧୧ କୋଟି ଚାଷୀ ପରିବାର ଏହାର ଲାଭ ଉଠାଇପାରିବେ । ୩ ହଜାର ଟଙ୍କାର ଅତିରିକ୍ତ ରାଶିରେ ଚାଷକାର୍ଯ୍ୟର ଛୋଟ ଆବଶ୍ୟକତା ପୂରଣ ହୋଇପାରିବ ।

ଆଉ ୩୦୦+ ଅମୃତ ଭାରତ ଓ ବନ୍ଦେ ଭାରତ ଟ୍ରେନ

ସରକାର ନୂଆ ଟ୍ରେନ ଆଣି ୨୦୩୦ ସୁଦ୍ଧା ଦେଶରେ ଟ୍ରେନ୍ ବୁକିଂ କରିବା ସମୟରେ ୱେଟିଂ ଲିଷ୍ଟ ସମସ୍ୟାକୁ ଶେଷ କରିବାକୁ ଚାହୁଁଛନ୍ତି । ଏଥିଲାଗି ପ୍ରାୟ ୩୦୦ରୁ ଅଧିକ ନୂଆ ଅମୃତ ଭାରତ ଓ ବନ୍ଦେ ଭାରତ ଟ୍ରେନ ଘୋଷଣା ହୋଇପାରେ । ଗତ ବଜେଟ୍‌ରେ ରେଳ ବିଭାଗ ଲାଗି ୨.୬୫ ଲକ୍ଷ କୋଟି ଟଙ୍କା ଆବଣ୍ଟନ କରାଯାଇଥିଲା, ଯାହାକି ଏଯାବତ ସବୁଠୁ ଅଧିକ ଫଣ୍ଡ୍ ଥିଲା । ଚଳିତ ଥର ମଧ୍ୟ ଏହାକୁ ବୃଦ୍ଧି କରାଯିବ ବୋଲି ଆଶା କରାଯାଉଛି । ବର୍ତ୍ତମାନ ପାର୍ବଣ ଋତୁ ଏବଂ ପର୍ଯ୍ୟଟନ ଋତୁରେ ଡିମାଣ୍ଡ ଓ ସିଟ୍ ଉପଲବ୍ଧତା ମଧ୍ୟରେ ୨୦-୨୫% ପ୍ରଭେଦ ରହିଥାଏ । ଏହାକୁ କମାଇବା ଲାଗି ଟ୍ରେନ ସଂଖ୍ୟା ବୃଦ୍ଧି କରିବା ସହିତ ରେଳ ଟ୍ରାକ୍‌କୁ ବିସ୍ତାର କରିବାକୁ ପଡ଼ିବ । ଏହାଦ୍ବାରା ପ୍ରତିଦିନ ଟ୍ରେନରେ ଯାତ୍ରା କରୁଥିବା ପ୍ରାୟ ୨ କୋଟି ଯାତ୍ରୀଙ୍କୁ ଫାଇଦା ମିଳିବ ।

୨KW ସୋଲାର ପ୍ୟାନେଲ ଉପରେ ₹୮୦,୦୦୦ ସବସିଡି

ବଜେଟ୍‌ରେ ୨ କିଲୋୱାଟ୍ ପର୍ଯ୍ୟନ୍ତ ସୋଲାର ପ୍ୟାନେଲ ସିଷ୍ଟମ ଉପରେ ସବସିଡି ପ୍ରତି କିଲୋୱାଟ୍ ପିଛା ୩୦ ହଜାରରୁ ବୃଦ୍ଧି କରାଯାଇ ୪୦,୦୦୦ କରାଯାଇପାରେ । ବର୍ତ୍ତମାନର ନିୟମ ଅନୁସାରେ, ୨KW ସୋଲାର ସିଷ୍ଟମ ଲଗାଇଲେ ପ୍ରତି କିଲୋୱାଟ ପିଛା ୩୦ ହଜାର ଟଙ୍କା ହିସାବରେ ୬୦,୦୦୦ ଟଙ୍କା ସବସିଡି ମିଳୁଛି । ଯଦି ବଜେଟ୍‌ରେ ସବସିଡି ପ୍ରତି କିଲୋୱାଟ୍ ପିଛା ୧୦ ହଜାର ଟଙ୍କା ବୃଦ୍ଧି କରାଯାଏ ତେବେ ୨KW ସୋଲାର ସିଷ୍ଟମ ଲଗାଇଲେ ୮୦ ହଜାର ଟଙ୍କା ସବସିଡି ମିଳିବ । ଅର୍ଥାତ ୨୦ ହଜାର ଟଙ୍କା ବଞ୍ଚିବ । କେନ୍ଦ୍ର ସରକାର ଲକ୍ଷ୍ୟ ରଖିଛନ୍ତି ଯେ ୨୦୨୬ ମାର୍ଚ୍ଚ ମାସ ସୁଦ୍ଧା ୪୦ ଲକ୍ଷ ଓ ୨୦୨୭ ସୁଦ୍ଧା ୧ କୋଟି ଲୋକଙ୍କ ଘରେ ସୋଲାର ଗ୍ରୀଡ ଯୋଡ଼ିବା । ଏହି ଯୋଜନାରେ ସରକାରଙ୍କୁ ନିଜ ଲକ୍ଷ୍ୟ ହାସଲ କରିବାରେ ଦ୍ରୁତ ସଫଳତା ମିଳିବ । ଯଦି ଆମେ ତଥ୍ୟ ଦେଖିବା, ତେବେ ୨୦୨୫ ସୁଦ୍ଧା ପ୍ରାୟ ୧୯.୪୫ ଲକ୍ଷରୁ ଅଧିକ ସୋଲାର ପ୍ୟାନେଲ ଲାଗିସାରିଛି । ତେବେ ଯଦି ଚଳିତ ବଜେଟ୍‌ରେ ସରକାର ସବସିଡି ବୃଦ୍ଧି କରୁଛନ୍ତି ତେବେ 2KW ସିଷ୍ଟମ ଲଗାଇବାକୁ ଯାଉଥିବା ପରିବାରକୁ ସିଧାସଳଖ ୨୦,୦୦୦ ଟଙ୍କା ପର୍ଯ୍ୟନ୍ତ ଲାଭ ମିଳିବ ।

ଆୟୁଷ୍ମାନ ଭାରତରେ ବରିଷ୍ଠଙ୍କୁ ଫାଇଦା

ସରକାର ଆୟୁଷ୍ମାନ ଭାରତ ଯୋଜନାର ପରିସରକୁ ବିସ୍ତାର କରିପାରନ୍ତି । ବର୍ତ୍ତମାନ, ୭୦ ବର୍ଷରୁ ଅଧିକ ବୟସ୍କ ବୃଦ୍ଧ ଏହି ଯୋଜନା ପାଇଁ ଯୋଗ୍ୟ, କିନ୍ତୁ ଏହାକୁ ୬୦ ବର୍ଷକୁ ହ୍ରାସ କରାଯାଇପାରେ । ଏହା ବ୍ୟତୀତ, କର୍କଟ ଏବଂ ହୃଦରୋଗ ଭଳି ମାରାତ୍ମକ ରୋଗର ଖର୍ଚ୍ଚକୁ ପୂରଣ କରିବା ପାଇଁ ମାଗଣା ଚିକିତ୍ସାର ବାର୍ଷିକ ସୀମା ₹୫ ଲକ୍ଷକୁ ବୃଦ୍ଧି କରାଯାଇପାରେ । ଆଉଟଲୁକ୍‌ର ଏକ ରିପୋର୍ଟ ଅନୁସାରେ, ଭାରତରେ ୬୦ରୁ ଅଧିକ ବୟସ୍କ ବ୍ୟକ୍ତିଙ୍କ ମଧ୍ୟରୁ ପ୍ରାୟ ୮୨% ନିକଟରେ ସ୍ବାସ୍ଥ୍ୟ ବୀମା ନାହିଁ । ଏଣୁ ଏହି ବୟସ ସୀମାକୁ ହ୍ରାସ କରାଯାଇପାରେ । ବଜେଟ୍‌ରେ ଏପରି ଘୋଷଣା ହେଲେ, କୋଟି କୋଟି ପରିବାର ଏହି ଯୋଜନାରେ ଯୋଡ଼ି ହୋଇପାରିବେ । ଏହାସହିତ ମାଗଣା ଚିକିତ୍ସାର ଅର୍ଥରାଶି ବଢିଲେ ବଡ଼ ବଡ଼ ଅପରେସନ ଲାଗି ଲୋକେ ଆର୍ଥିକ ସହାୟତା ପାଇପାରିବେ ।

ଏଥିସହ ପଢନ୍ତୁ: କାହିଁକି ଖସୁଛି ଟଙ୍କା ମୂଲ୍ୟ; କେମିତି ରୋକାଯାଇପାରିବ ? ଖୋଲିଲା ରାଜ୍