ଛତିଶଗଡ଼ରେ ନିୟୋଜିତ ଡିଏସପି କଳ୍ପନା ବର୍ମାଙ୍କ ବିରୋଧରେ ଗମ୍ଭୀର ଅଭିଯୋଗ । ରାଜ୍ୟ ସରକାରଙ୍କ ଟଙ୍କା ହଡ଼ପ, ପଦବୀର ଦୁରୂପଯୋଗ ଓ ସମ୍ବେଦନଶୀଳ ସୂଚନା ଲିକ୍ କରିବା ଅଭିଯୋଗରେ ତାଙ୍କୁ ନିଲମ୍ବିତ କରାଯାଇଛି । ପ୍ରାରମ୍ଭିକ ଯାଞ୍ଚ ରିପୋର୍ଟରେ ଏପରି ତଥ୍ୟ ସାମ୍ନାକୁ ଆସିଛି, ଯାହାପରେ ପୋଲିସ ବିଭାଗ ତାଙ୍କ ବିରୋଧରେ ବଡ଼ ନିଷ୍ପତ୍ତି ନେଇଛି । ମହିଳା ପୋଲିସ ଅଧିକାରିଣୀ ଜଣକ ଲଭ୍ ଟ୍ରାପ୍, କୋଟି କୋଟି ଟଙ୍କା ନେଣଦେଣ ଓ ହ୍ବାଟ୍ସଆପ୍ ଚାଟ୍ ଜରିଆରେ ଗୁରୁତ୍ବପୂର୍ଣ୍ଣ ତଥ୍ୟ ସେୟାର କରିବା ଭଳି ତାଙ୍କ ବିରୋଧରେ ଗମ୍ଭୀର ଅଭିଯୋଗ ରହିଛି ।

ସରକାରୀ ନିର୍ଦ୍ଦେଶ ଅନୁଯାୟୀ, ପ୍ରାଥମିକ ତଦନ୍ତରେ ଆର୍ଥିକ କାରବାର, ରେକର୍ଡ ହୋଇଥିବା ବୟାନ ଏବଂ ଡିଜିଟାଲ୍ ଚାଟ୍ ରେକର୍ଡରେ ଗୁରୁତର ଅସଙ୍ଗତି ପ୍ରକାଶ ପାଇଛି । ତଦନ୍ତରେ ଅବୈଧ ଉପାୟରେ ଅର୍ଥ ହଡ଼ପ କରିବା ଓ ଆୟ ବର୍ହିଭୂତ ସମ୍ପତ୍ତି ଠୁଳ କରିବା ଭଳି ଅଭିଯୋଗ ରହିଛି । ଏହାକୁ ଛତିଶଗଡ଼ ସିଭିଲ ସେଭା ଆଚରଣ ବିଭାଗ, ୧୯୬୫ର ସିଧାସଳଖ ଉଲ୍ଲଙ୍ଘନ ବୋଲି କୁହାଯାଉଛି । ଡିଏସପି କଳ୍ପନା ବର୍ମା ଦନ୍ତେୱାଡା ଜିଲ୍ଲାରେ କାମ କରୁଥିଲେ । କିନ୍ତୁ ନିଲମ୍ବନ ପରେ ତାଙ୍କ ପୋଲିସ ମୁଖ୍ୟାଳୟକୁ ନୱା ରାୟପୁରକୁ ପରିବର୍ତ୍ତନ କରାଯାଇଛି ।

• କଣ ପୁରା ଘଟଣା ?

ଏହି ପୁରା ଘଟଣା ରାୟପୁର ବ୍ୟବସାୟୀ ଦୀପକ ଟଣ୍ଡନଙ୍କ ସହିତ ଜଡ଼ିତ । ବ୍ୟବସାୟୀ ଜଣକ ଅଭିଯୋଗ କରିଛନ୍ତି ଯେ ୨୦୨୧ ମସିହାରେ ପ୍ରେମଜାଲରେ ଫସାଇ ପ୍ରାୟ ଦେଢ କୋଟି ଟଙ୍କା ହଡ଼ପ କରାଯାଇଥିଲା । ଏହି ଟଙ୍କାକୁ ପର୍ଯ୍ୟାୟକ୍ରମେ ନିଆଯାଇଥିଲା । ଏହାସହିତ ମହିଳା ପୋଲିସ ଅଧିକାରିଣୀ ଜଣକ ୨ କୋଟି ନଗଦ ଟଙ୍କା, ଗୋଟିଏ ବିଳାସପୂର୍ଣ୍ଣ କାର, ପ୍ରାୟ ୧୨ ଲକ୍ଷ ଟଙ୍କାର ହୀରା ମୁଦି, ପ୍ରାୟ ୫ ଲକ୍ଷ ଟଙ୍କାର ସୁନା ଅଳଙ୍କାର ଓ ଅନ୍ୟ ମହଙ୍ଗା ଉପହାର ନେଇଥିଲେ । ଏହି ଅଭିଯୋଗ ପରେ ମଧ୍ୟ ପୋଲିସ ଅଧିକାରିଣୀ ଜଣକ ଟଙ୍କା ଓ କାର ଫେରାଇନାହାନ୍ତି ।

ଏହି ଘଟଣାରେ ଛତିଶଗଡ଼ ପୋଲିସଙ୍କ ନିର୍ଦ୍ଦେଶନୁସାରେ, ଅତିରିକ୍ତ ପୋଲିସ ଅଧିକ୍ଷକ ସ୍ତର ପର୍ଯ୍ୟନ୍ତ ଯାଞ୍ଚ କରାଯାଉଛି । ପ୍ରାୟ ୧୪୭୫ ପୃଷ୍ଠାର ରିପୋର୍ଟରେ ଅନେକ ଗମ୍ଭୀର କଥା ଜଣାପଡ଼ିଛି । ରିପୋର୍ଟକୁ ମାମଲାରେ ଜଡ଼ିତ ଅଧିକାରୀଙ୍କୁ ହସ୍ତାନ୍ତର କରାଯାଇଛି, ଏହାପରେ ରାଜ୍ୟ ପୋଲିସ ନିଲମ୍ବନ ନିଷ୍ପତ୍ତି ନେଇଥିବା କହିଛି ।

• ସାମ୍ନାକୁ ଆସିଲା ହ୍ବାଟ୍ସଆପ୍ ଚାଟ୍

ଯାଞ୍ଚ ବେଳେ ପୋଲିସ ହାତରେ ମହିଳା ପୋଲିସ ଅଧିକାରୀ ଓ ବ୍ୟବସାୟୀଙ୍କ ମଧ୍ୟରେ ହୋଇଥିବା ଚାଟ୍ ମଧ୍ୟ ଲାଗିଛି । ଏହି ଚାଟ୍ରେ ପୋଲିସ ସହ ଜଡ଼ିତ ଅନେକ ସମ୍ବେଦନଶୀଳ ତଥ୍ୟକୁ ସେୟାର କରାଯାଇଛି । ଯଦି ଏହି ତଥ୍ୟ ଯଦି ସତ ପ୍ରମାଣିତ ହୁଏ, ତେବେ ଏହାକୁ ଇଣ୍ଟେଲିଜେନ୍ସି ଓ ଗୋପନୀୟତାର ଉଲ୍ଲଙ୍ଘନ ଭାବେ ବିବେଚନା କରାଯାଇ ମହିଳା ପୋଲିସ ଅଧିକାରୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ବ୍ୟବସାୟୀ ଜଣକ ଏହା ମଧ୍ୟ ଅଭିଯୋଗ କରିଛନ୍ତି ଯେ ଡିଏସପିଙ୍କ ଭାଇଙ୍କ ନାମରେ ଏକ ହୋଟେଲ ଖୋଲିବା ପାଇଁ ବହୁ ପରିମାଣର ଟଙ୍କା ନିଆଯାଇଥିଲା । ଏହି ଦିଗ ଉପରେ ଏକ ପୃଥକ ତଦନ୍ତ ଦାବି କରାଯାଇଛି ।

ଅଧିକାରୀମାନେ କହିଛନ୍ତି ଯେ ଅଭିଯୋଗର ସତ୍ୟତା ଯାଞ୍ଚ କରିବା ପାଇଁ ସମସ୍ତ ଆର୍ଥିକ କାରବାର, ସମ୍ପତ୍ତି ବିବରଣୀ, ଡିଜିଟାଲ୍ ପ୍ରମାଣ ଏବଂ କଲ୍/ଚାଟ୍ ରେକର୍ଡର ଫରେନସିକ୍ ଯାଞ୍ଚ କରାଯାଉଛି । ଅନ୍ୟପଟେ ଏହି ସମଗ୍ର ଘଟଣା ପୋଲିସ ବିଭାଗ ମଧ୍ୟରେ ହଇଚଇ ସୃଷ୍ଟି କରିଛି । ଜଣେ ବରିଷ୍ଠ ଅଧିକାରୀଙ୍କ ବିରୁଦ୍ଧରେ ଏପରି ଅଭିଯୋଗ ଏବଂ ଡିଜିଟାଲ୍ ପ୍ରମାଣ ପ୍ରକାଶ ପାଇବା ପ୍ରଶାସନିକ ସ୍ୱଚ୍ଛତା ଏବଂ ଆଚରଣ ଉପରେ ନୂତନ ପ୍ରଶ୍ନ ଉଠାଇବାରେ ଲାଗିଛି ।

ଏଥିସହ ପଢନ୍ତୁ: ରିଲ୍ କରୁଥିଲେ; ଭୁଲରେ ଚାଲିଗଲା ମହିଳାଙ୍କ ଜୀବନ