PM Modi / ପରୀକ୍ଷା ପେ ଚର୍ଚ୍ଚା; ନିଜ ସହ ପ୍ରତିଦ୍ଵନ୍ଦ୍ଵିତା କରିବାକୁ ଛାତ୍ରଛାତ୍ରୀଙ୍କୁ ମୋଦିଙ୍କ ପରାମର୍ଶ

ଆଜି 'ପରୀକ୍ଷା ପେ ଚର୍ଚ୍ଚା'ର ଦ୍ଵିତୀୟ ଏପିସୋଡରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବୋର୍ଡ ପରୀକ୍ଷା ଦେବାକୁ ଯାଉଥିବା ଦେଶର ବିଭିନ୍ନ ପ୍ରାନ୍ତର ଛାତ୍ରଛାତ୍ରୀଙ୍କ ସହିତ ଆଲୋଚନା କରିଛନ୍ତି । ପିଲାମାନେ ପ୍ରଧାନମନ୍ତ୍ରୀଙ୍କୁ ପରୀକ୍ଷା ଚିନ୍ତାରୁ କିପରି ମୁକ୍ତ ରହିବାଠୁ ଆରମ୍ଭ କରି ଦେଶ ପାଇଁ ଥିବା ସ୍ଵପ୍ନ ଉପରେ ଅନେକ ପ୍ରଶ୍ନ କରିଥିଲେ । ପ୍ରଧାନମନ୍ତ୍ରୀ ଅତି ସରଳ ଭାବେ ପିଲାଙ୍କ ପ୍ରଶ୍ନର ଜବାବ ରଖିଥିଲେ । ଆଲୋଚନା ସମୟରେ ପ୍ରଧାନମନ୍ତ୍ରୀ ଛାତ୍ରଛାତ୍ରୀଙ୍କୁ ଅନ୍ୟ ସହ ବଦଳରେ ନିଜ ସହ ପ୍ରତିଦ୍ଵନ୍ଦ୍ଵିତା କରିବାକୁ ପରାମର୍ଶ ଦେଇଥିଲେ । ଆତ୍ମବିଶ୍ଵାସ, ଉତ୍ତମ ସ୍ଵାସ୍ଥ୍ୟ ଓ ନିଷ୍ଠା ସଫଳତାର ଚାବିକାଠି ବୋଲି କହିଥିଲେ ମୋଦି ।

• ବିକଶିତ ରାଷ୍ଟ୍ରକୁ ନେଇ କଣ କହିଲେ ମୋଦି ?

ଆଲୋଚନାରେ କୋଏମ୍ବାଟୁର, ରାୟପୁର, ଗୁଜୁରାଟ, ଆସାମ ଓ ଦିଲ୍ଲୀର ଛାତ୍ରଛାତ୍ରୀମାନେ ସାମିଲ ହୋଇଥିଲେ । ଜଣେ ଛାତ୍ର ପ୍ରଶ୍ନ କରିଥିଲେ ଯେ ୨୦୪୭ରେ ଭାରତକୁ ବିକଶିତ ରାଷ୍ଟ୍ର କରିବା ଲାଗି ଛାତ୍ରଛାତ୍ରୀ କଣ କରିପାରିବେ ? ଏହାର ପ୍ରଶ୍ନର ମୋଦି କହିଥିଲେ ଯେ ଆମ ଦେଶର କୁନି କୁନି ପିଲାଙ୍କ ମନରେ ବିକଶିତ ଭାରତର ସ୍ଵପ୍ନ ଅଛି, ଯାହା ଶୁଣି ସେ ବେଶ ଆନନ୍ଦିତ । ସେ ଆହୁରି କହିଥିଲେ, "ବଡ଼ ପରିବର୍ତ୍ତନ ଛୋଟ ଛୋଟ କାମରୁ ଆରମ୍ଭ ହୋଇଥାଏ । ଦେଶକୁ ସର୍ବଦା ସ୍ଵଚ୍ଛ ରଖିବା ଉଚିତ । ଯଦି କେଉଁଠି ଅଳିଆ ଆବର୍ଜନା ଦେଖୁଛ, ତାକୁ ତୁରନ୍ତ ଡଷ୍ଟବିନରେ ପକାଇବା ଆବଶ୍ୟକ । ବିକଶିତ ରାଷ୍ଟ୍ର ହେବା ଲାଗି ବିକଶିତ ଦେଶର ଅଭ୍ୟାସକୁ ଆପଣେଇବା ଆବଶ୍ୟକ । ଏପରି କରିବା ଦ୍ଵାରା ଅନ୍ୟମାନେ ପ୍ରେରିତ ହୁଅନ୍ତି ଓ ଦେଶ ଦ୍ରୁତ ଗତିରେ ଆଗକୁ ବଢେ ।"

• ଅପରେସନ ସିନ୍ଦୂରକୁ ନେଇ ପ୍ରଶ୍ନ କଲେ ଛାତ୍ରଛାତ୍ରୀ

ଗୁଜରାଟର ଜଣେ ଛାତ୍ର ଆଲୋଚନା ସମୟରେ ପହଲଗାମ ଆକ୍ରମଣ ଓ ଅପରେସନ ସିନ୍ଦୂରକୁ ନେଇ ପ୍ରଧାନମନ୍ତ୍ରୀଙ୍କୁ ପ୍ରଶ୍ନ କରିଥିଲେ । ଅପରେସନ ସିନ୍ଦୂରକୁ ନେଇ ସାରା ଦେଶ ଚିନ୍ତାରେ ଥିବାବେଳେ ଦେଶର ମୁଖିଆ ପ୍ରଧାନମନ୍ତ୍ରୀ ନିଜ ଷ୍ଟ୍ରେସକୁ କିପରି ନିୟନ୍ତ୍ରଣରେ ରଖିଥିଲେ ବୋଲି ପିଲାମାନେ ପ୍ରଶ୍ନ କରିଥିଲେ । ଏହାର ଉତ୍ତରରେ ମୋଦି କହିଥିଲେ ଯେ ଚିନ୍ତାଗ୍ରସ୍ତ ଆଦୌ ହେବା ଉଚିତ ନୁହେଁ । ଏହା ପରିବର୍ତ୍ତେ ନିଜ ଯୋଜନା ଉପରେ ଧ୍ୟାନ ଦେବା ଉଚିତ । ପ୍ରସ୍ତୁତି କରିବା ଉଚିତ । ଯେତେବେଳେ ଉତ୍ତମ ପ୍ରସ୍ତୁତି ହୋଇଥାଏ, ସେତେବେଳେ ଚିନ୍ତା ହ୍ରାସ ପାଏ । ସେ ଠିକ ସମୟରେ ଶୋଇଥିଲେ ଓ ନିଜକୁ ଶାନ୍ତ ରଖି ପରିସ୍ଥିତିର ମୁକାବିଲା କରିଥିଲେ ବୋଲି କହିଥିଲେ ।

ଏଥିସହ ପଢନ୍ତୁ: ପରୀକ୍ଷାର ହେବ ଲାଇଭ ଷ୍ଟ୍ରିମିଙ୍ଗ, ପରିଚାଳନାରେ ଅବହେଳାକୁ ବରଦାସ୍ତ କରାଯିବନି

ଏହାସହିତ ସୁସ୍ଥ ଜୀବନଯାପନ କରିବା ପାଇଁ ସର୍ବଦା ସ୍ଵାସ୍ଥ୍ୟ ଉପରେ ଧ୍ୟାନ କେନ୍ଦ୍ରିତ କରିବାକୁ ଛାତ୍ରଛାତ୍ରୀଙ୍କୁ ପ୍ରଧାନମନ୍ତ୍ରୀ ପରାମର୍ଶ ଦେଇଥିଲେ । ପ୍ରାତଃରୁ ଉଠିବା, ଠିକ ସମୟରେ ଖାଦ୍ୟ ଖାଇବା ଏବଂ ନିୟମିତ ଭାବେ ବ୍ୟାୟାମ କରିବାକୁ ପିଲାଙ୍କୁ କହିଥିଲେ ମୋଦି । ଦୈନନ୍ଦିନ ଜୀବନରେ ଶୃଙ୍ଖଳା ଆଚରଣ ବଜାୟ ରଖିବା, ପରବର୍ତ୍ତୀ ସମୟରେ ସଫଳତା ପାଇବାରେ ଏକ ବଡ଼ ଭୂମିକା ଗ୍ରହଣ କରିଥାଏ । ଏହାସହିତ ସ୍ଵାସ୍ଥ୍ୟ ଉପଯୋଗୀ ଖାଦ୍ୟ ଖାଇବାକୁ ସେ ପିଲାମାନଙ୍କୁ ପରାମର୍ଶ ଦେଇଥିଲେ ।