ଅର୍ଥମନ୍ତ୍ରୀ ନିର୍ମଳା ସୀତାରମଣ ଆଜି ପୂର୍ବାହ୍ନ ୧୧ଟାରେ ନବମ ଥର ପାଇଁ ବଜେଟ୍ ଉପସ୍ଥାପନ କରି ରେକର୍ଡ ସୃଷ୍ଟି କରିବାକୁ ଯାଉଛନ୍ତି । ଏହା ପୂର୍ବରୁ ସେ ରାଷ୍ଟ୍ରପତି ଭବନ ଗସ୍ତ କରିଥିଲେ, ଯେଉଁଠାରେ ସେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ବଜେଟ୍ ବିଷୟରେ ଅବଗତ କରାଇଥିଲେ । ଏହି ସମୟରେ ରାଷ୍ଟ୍ରପତି ମୁର୍ମୁ ସୀତାରମଣଙ୍କୁ ଦହି ଏବଂ ଚିନି ଖୁଆଇଛନ୍ତି । ଶୁଭ କାମକୁ ଯିବା ବେଳେ ଯେପରି ମାଆମାନେ ଦହି ଚିନି ଖୁଆଇ ଶୁଭ ମନାସିଥାନ୍ତି, ଠିକ୍ ସେହିପରି ରାଷ୍ଟ୍ରପତି ଦ୍ରୌପଦୀ ମୁର୍ମୁ ଅର୍ଥମନ୍ତ୍ରୀଙ୍କୁ ବଜେଟ୍ ଭଳି ଶୁଭକାର୍ଯ୍ୟ ଲାଗି ମିଠା ଖୁଆଇଛନ୍ତି ।

ଏହି ବଜେଟ୍‌ରେ ସରକାର ପାଞ୍ଚଟି ପ୍ରମୁଖ ଘୋଷଣା କରିବେ ବୋଲି ଆଶା ଅନୁମାନ କରାଯାଉଛି ଯେ ବେତନଭୋଗୀଙ୍କ ପାଇଁ ୧୩ ଲକ୍ଷ ପର୍ଯ୍ୟନ୍ତ ଆୟ କରମୁକ୍ତ ହୋଇପାରେ । ଏହି ସମୟରେ, ଆମଦାନୀ ଶୁଳ୍କ ହ୍ରାସ ଯୋଗୁଁ ସୁନା ଏବଂ ରୂପା ମୂଲ୍ୟ ହ୍ରାସ ପାଇପାରେ ।

ମଧ୍ୟବିତ୍ତଙ୍କ ପାଇଁ ହୋଇପାରେ ୫ ବଡ଼ ଘୋଷଣା
୧. ଆୟକର: ନୂତନ ଟିକସ ବ୍ୟବସ୍ଥା ମାନକ ଡିଡକ୍ସନକୁ ₹୭୫,୦୦୦ରୁ ₹୧ ଲକ୍ଷକୁ ବୃଦ୍ଧି କରିପାରେ, ଯାହା ଦ୍ଵାରା ୧୩ ଲକ୍ଷ ଟଙ୍କା ପର୍ଯ୍ୟନ୍ତ ଦରମା ଆୟକରମୁକ୍ତ ହୋଇପାରିବ ।

୨. କିଷାନ ସମ୍ମାନ ନିଧି: ପ୍ରଧାନମନ୍ତ୍ରୀ-କିଷାନ ଯୋଜନାର ପାଣ୍ଠି ପରିମାଣ ₹୩,୦୦୦ ବୃଦ୍ଧି କରାଯାଇ ₹୬,୦୦୦ରୁ ₹୯,୦୦୦ ପର୍ଯ୍ୟନ୍ତ ବଢିପାରେ । ଏହି ପରିମାଣ ବୃଦ୍ଧି କରିବା ବିଷୟରେ ଗତ ଦୁଇରୁ ତିନି ବର୍ଷ ଧରି ଆଲୋଚନା ଚାଲିଛି ।

୩. ରେଳ ଭିତ୍ତିଭୂମି: ଟ୍ରେନ୍ ବୁକିଂ କରିବା ସମୟରେ ୱେଟିଂଲିଷ୍ଟ ହ୍ରାସ କରିବା ପାଇଁ ୩୦୦+ ନୂତନ ଅମୃତ ଭାରତ ଏବଂ ବନ୍ଦେ ଭାରତ ଟ୍ରେନ୍ ଘୋଷଣା କରାଯାଇପାରେ । ରେଳବାଇ ଏପର୍ଯ୍ୟନ୍ତ ସବୁଠାରୁ ବଡ଼ ପାଣ୍ଠି ପାଇପାରେ ।

୪. ପିଏମ ସୂର୍ଯ୍ୟ ଘର ଯୋଜନା: ବଜେଟରେ ୨ କିଲୋୱାଟ ପର୍ଯ୍ୟନ୍ତ ସୌରଶକ୍ତି ଉପରେ ସବସିଡି ପ୍ରତି କିଲୋୱାଟ ୩୦ ହଜାର ଟଙ୍କାରୁ ୪୦ ହଜାର ଟଙ୍କାକୁ ବୃଦ୍ଧି କରିବାକୁ ଘୋଷଣା କରାଯାଇପାରେ ।

୫. ଆୟୁଷ୍ମାନ ଭାରତ: ସେହିପରି ଆୟୁଷ୍ମାନ ଭାରତ ଯୋଜନାର ପରିସରକୁ ବିସ୍ତାର କରାଯାଇପାରିବ । ବର୍ତ୍ତମାନ, ୭୦ ବର୍ଷରୁ ଅଧିକ ବୟସ୍କ ବ୍ୟକ୍ତି ଏହି ଯୋଜନାର ଲାଭ ପାଆନ୍ତି, କିନ୍ତୁ ଏହାକୁ ୬୦ ବର୍ଷକୁ ହ୍ରାସ କରାଯାଇପାରିବ ।

ଅର୍ଥମନ୍ତ୍ରୀ ନିର୍ମଳାଙ୍କ ବଜେଟ୍‌ ପେଡି ଉପରେ ସାରା ଦେଶର ନଜର ରହିଛି । ବିଶେଷ ଭାବେ ମଧ୍ୟବିତ୍ତ ବର୍ଗଙ୍କୁ ବଜେଟ୍‌ରେ ପ୍ରାଧାନ୍ୟ ଦିଆଯିବ ବୋଲି ଆଶା କରାଯାଉଛି । ସେହିପରି କୃତ୍ରିମ ବୁଦ୍ଧିମତା ଏଆଇ ଉପରେ ମଧ୍ୟ ଗୁରୁତ୍ବ ଦିଆଯାଇପାରେ ।

ଏଥିସହ ପଢନ୍ତୁ: କେଉଁ ସେକ୍ଟରରେ ସବୁଠୁ ଅଧିକ ଖର୍ଚ୍ଚ କରନ୍ତି ସରକାର ? ବଜେଟ୍ ପୂର୍ବରୁ ଜାଣିନିଅନ୍ତୁ..