Argus News - ମୋହନ ଭାଗବତଙ୍କ ଏକତା ଡାକରା; 'ଏବେ ବି ବାଂଲାଦେଶରେ ଅଛନ୍ତି ୧.୨୫ କୋଟି ହିନ୍ଦୁ'

ବାଂଲାଦେଶରେ ଥିବା ହିନ୍ଦୁଙ୍କ ମଧ୍ୟରେ ଏକତାଭାବ ଜାଗ୍ରତ ପାଇଁ ରାଷ୍ଟ୍ରୀୟ ସ୍ଵୟଂସେବକ ସଂଘ (RSS) ମୁଖ୍ୟ ମୋହନ ଭାଗବତ ଆହ୍ଵାନ ଦେଇଛନ୍ତି । ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନା ଶାସନ ଗାଦିରୁ ହଟିବା ପରେ ପଡ଼ୋଶୀ ଦେଶରେ ଭାରତର ବିରୋଧୀ ଭାବନା ବିରୋଧରେ ସମସ୍ତ ହିନ୍ଦୁ ଏକାଠି ହେବା ଉଚିତ ବୋଲି କହିଛନ୍ତି ମୋହନ । ବାଂଲାଦେଶରେ ଏବେ ୧.୨୫ କୋଟି ହିନ୍ଦୁ ବସବାସ କରୁଛନ୍ତି । ସେମାନେ ଏକାଠି ହୋଇ ରାଜନୀତି ବ୍ୟବସ୍ଥାରୁ ଲାଭ ଉଠାଇବା ଉପରେ ଗୁରୁତ୍ଵ ଦେବା ଉଚିତ ।

ଗତ କିଛି ଦିନ ତଳେ ବାଂଲାଦେଶରେ ହିନ୍ଦୁଙ୍କୁ କରାଯାଉଥିଲା ଟାର୍ଗେଟ । ପଡ଼ୋଶୀ ଦେଶରେ ଅନେକ ହିନ୍ଦୁଙ୍କୁ ହତ୍ୟା କରାଯାଉଥିଲା । ଏହି ପ୍ରସଙ୍ଗ ଉପରେ ଏକ ଜାତୀୟ ଗଣମାଧ୍ୟମ ସରବରାହ ସଂସ୍ଥାକୁ ସାକ୍ଷାତକାର ଦେବା ସମୟରେ ମୋହନ ଭାଗବତ କହିଛନ୍ତି, "ବିଗତ ଦିନରେ ବାଂଲାଦେଶରେ ଯାହା ଘଟିଲା...ବାଂଲାଦେଶରେ ଏବେ ବି ୧.୨୫ କୋଟି ହିନ୍ଦୁ ଅଛନ୍ତି । ଯଦି ସେମାନେ ଏକାଠି ହୁଅନ୍ତି, ତେବେ ନିଜର ଫାଇଦା ପାଇଁ ରାଜନୈତିକ ବ୍ୟବସ୍ଥାକୁ ବ୍ୟବହାର କରିପାରନ୍ତି । ଯାହାଦ୍ଵାରା ସେମାନେ ସେଠାରେ ସୁରକ୍ଷିତ ରହିପାରିବେ, କିନ୍ତୁ ଏଥିଲାଗି ସେମାନଙ୍କୁ ଏକଜୁଟ ହେବାକୁ ପଡ଼ିବ । ସୌଭାଗ୍ୟବଶତଃ, ଏଥର ସେମାନେ ପଳାୟନ କରିବାକୁ ଚିନ୍ତା କରିନାହାନ୍ତି । ସେଠାରେ ରହି ଲଢେଇ କରିବାକୁ ନିଷ୍ପତ୍ତି ନେଇଛନ୍ତି । ଏବେ ଯଦି ସେମାନେ ଲଢିବାକୁ ଚାହୁଁଛନ୍ତି, ତେବେ ସେମାନଙ୍କୁ ପ୍ରଥମେ ଏକଜୁଟ ହେବାକୁ ପଡ଼ିବ । ଯେତେ ଶୀଘ୍ର ସେମାନେ ଏକାଠି ହେବେ ସେତେ ଜଲଦି ସବୁକିଛି ଠିକ୍ ହେବ ।"

ବାଂଲାଦେଶରେ ଥିବା ହିନ୍ଦୁମାନଙ୍କ ସୁରକ୍ଷା ଲାଗି ଆରଏସଏସ ଯଥାସମ୍ଭବ ସାହାଯ୍ୟ କରିପାରିବ ବୋଲି ପ୍ରତିଶ୍ରୁତି ଦେଇଛନ୍ତି ମୋହନ । ସେ ଆହୁରି କହିଛନ୍ତି ଯେ ବାଂଲାଦେଶରେ ଯେତେ ସଂଖ୍ୟାରେ ହିନ୍ଦୁ ଅଛନ୍ତି, ସେମାନେ ନିଜର ସ୍ଥିତିକୁ ସୁଧାରିପାରିବେ । ବାଂଲାଦେଶୀ ହିନ୍ଦୁମାନଙ୍କ ଲାଗି ସାରା ବିଶ୍ଵରେ ଥିବା ହିନ୍ଦୁମାନେ ସାହାଯ୍ୟ କରିବେ ବୋଲି କହିଛନ୍ତି ଭାଗବତ । ସେ ଏଥିଲାଗି ପ୍ରତିଶ୍ରୁତିବଦ୍ଧ ବୋଲି ମଧ୍ୟ କହିଛନ୍ତି । ଏଠାରେ କହିରଖୁଛୁ କି, ଆରଏସଏସ ନିଜର ଶତବାର୍ଷିକୀ ସମାରୋହକୁ ମୁମ୍ବାଇରେ ଆୟୋଜନ କରିଛି । ସେହି କାର୍ଯ୍ୟକ୍ରମରେ ସଂଘର ମୁଖ୍ୟ ମୋହନ ଭାଗବତ ଯୋଗଦେଇ ବାଂଲାଦେଶୀ ହିନ୍ଦୁଙ୍କ ସମସ୍ୟା ଉପରେ ଆଲୋଚନା କରିଛନ୍ତି ।

ଏଥିସହ ପଢନ୍ତୁ: RSSର ଶତବାର୍ଷିକୀ ସମାରୋହ; କାର୍ଯ୍ୟକ୍ରମରେ ଖାସ୍ ଅନ୍ଦାଜରେ ପହଞ୍ଚିଲେ ସଲମାନ ଖାନ୍

ବାଂଲାଦେଶରେ ଗତ କିଛି ମାସ ମଧ୍ୟରେ ସଂଖ୍ୟାଲଘୁ, ବିଶେଷକରି ହିନ୍ଦୁମାନଙ୍କ ବିରୁଦ୍ଧରେ ହିଂସାତ୍ମକ ଘଟଣା ବୃଦ୍ଧି ପାଇବାରେ ଲାଗିଛି । ୨୦୨୪ ଅଗଷ୍ଟ ୫ରେ ଛାତ୍ର-ନେତୃତ୍ୱାଧୀନ ଜୁଲାଇ ବିଦ୍ରୋହ ପରେ ପ୍ରଧାନମନ୍ତ୍ରୀ ଶେଖ୍ ହାସିନାଙ୍କୁ ଦେଶ ଛାଡି ପଳାଇବାକୁ ବାଧ୍ୟ କରାଯିବା ପରେ ଉତ୍ତେଜନା ବୃଦ୍ଧି ପାଇଥିଲା । ଭାରତ ବିରୋଧୀ ଉଗ୍ରବାଦୀ ଛାତ୍ର ନେତା ସରିଫ ଓସମାନ ହାଦିଙ୍କ ମୃତ୍ୟୁ ପରେ ଗତ କିଛି ମାସ ମଧ୍ୟରେ ହିଂସା ବୃଦ୍ଧି ପାଇଛି । ଦେଶର ବିଭିନ୍ନ ସ୍ଥାନରେ ହିଂସାତ୍ମକ ଘଟଣା ହିନ୍ଦୁ ନାଗରିକ, ବ୍ୟବସାୟୀ ଏବଂ ଛାତ୍ରମାନଙ୍କୁ ଟାର୍ଗେଟ କରିଛି, ଯାହା ଫଳରେ ବାଂଲାଦେଶରେ ଅନେକ ହିନ୍ଦୁଙ୍କ ମୃତ୍ୟୁ ଘଟିଛି ।