ମଧ୍ୟପ୍ରଦେଶ ରିୱାଠାରେ ଭୟଙ୍କର ସଡ଼କ ଦୁର୍ଘଟଣା । ପୁଅର ବାହାଘର କାର୍ଡ ବାଣ୍ଟିବାକୁ ଯାଇଥିବା ପିତାର ମୃତ୍ୟୁ । ଏହାସହିତ ବରର ସାନଭାଇ ଓ ଜଣେ ସମ୍ପର୍କୀୟଙ୍କ ମଧ୍ୟ ମୃତ୍ୟୁ ଘଟିଛି । ୧୮୦ ସ୍ପିଡ୍‌ରେ ଆସୁଥିବା ଅଡି କାରଟି ବାଇକ ଆରୋହୀଙ୍କୁ ଧକ୍କା ଦେବା ପରେ ଘଟିଛି ଏହି ମର୍ମନ୍ତୁଦ ସଡ଼କ ଦୁର୍ଘଟଣା । ପୋଲିସ ଘଟଣାସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ଅଡି କାରକୁ ଜବତ କରିବା ସହ ମୃତଦେହକୁ ବ୍ୟବଚ୍ଛେଦ ପାଇଁ ନିକଟସ୍ଥ ହସ୍ପିଟାଲକୁ ପଠାଇଛି । ସେପଟେ ଅଡି ଡ୍ରାଇଭର ଫେରାର ଥିବା ଜଣାପଡ଼ିଛି ।

• କେମିତି ଘଟିଲା ଦୁର୍ଘଟଣା ?

ଏହି ଘଟଣାଟି ରିୱାର ରାୟପୁର କର୍ଚୁଲିୟାନ ଥାନା ଅଞ୍ଚଳର । ରିୱା-ପ୍ରୟାଗରାଜ ଜାତୀୟ ରାଜପଥରେ ଶନିବାର ଅପରାହ୍ନ ସମୟରେ ଏହି ଦୁର୍ଘଟଣା ଘଟିଛି । ଏହି ଦୁର୍ଘଟଣାରେ ବାଇକରେ ବସିଥିବା ୩ ଜଣଙ୍କ ମୃତ୍ୟୁ ଘଟିଛି । ପ୍ରତ୍ୟକ୍ଷଦର୍ଶୀଙ୍କ କହିବା ମୁତାବକ, ବାଇକ୍‌ରେ ଦୁଇ ଜଣ ପୁରୁଷ ଓ ଜଣେ ମହିଳା ନିଜ ପୁଅର ବିବାହ କାର୍ଡ ବାଣ୍ଟିବାକୁ ବାହାରିଥିଲେ । ରାସ୍ତାରେ ସାମ୍ନା ପଟୁ ଆସି ଦ୍ରୁତ ଗତିର ଅଡି କାରଟି ଧକ୍କା ଦେଇଥିଲା । ବାଇକ୍ ଓ କାର ପରସ୍ପର ମଧ୍ୟରେ ଏତେ ଜୋରରେ ଧକ୍କା ହୋଇଥିଲା ଯେ କାରର ଚକ ବାହାରିଯାଇଥିଲା ଏବଂ ଘଟଣାସ୍ଥଳରେ ସମସ୍ତ ବାଇକ ଆରୋହୀଙ୍କ ମୃତ୍ୟୁ ଘଟିଛି ।

• କାର ଚାଳକ ଫେରାର

ଦୁର୍ଘଟଣା ଘଟିବା ପରେ କାର ଡିଭାଇଡରକୁ ଧକ୍କା ଦେଇଥିଲା । ତେବେ ଅଡି କାରରେ କେତେ ଜଣ ଥିଲେ ସେ ସମ୍ପର୍କରେ ଜଣାପଡ଼ିନାହିଁ । ଅଡି କାର ଚାଳକଙ୍କ ସମେତ ଅନ୍ୟ ଯାତ୍ରୀମାନେ ମଧ୍ୟ ଘଟଣାସ୍ଥଳରୁ ଫେରାର ଅଛନ୍ତି । ତେବେ ପୋଲିସ ଘଟଣାସ୍ଥଳରେ ପହଞ୍ଚି ସିସିଟିଭି ଯାଞ୍ଚ କରି ସେମାନଙ୍କୁ ଖୋଜୁଛି ।

• ଫେବୃଆରୀ ୨୪ ତାରିଖରେ ଥିଲା ବିବାହ

ମୃତ ବ୍ୟକ୍ତି ଜଣକ ହେଉଛନ୍ତି ଚାଚାଇ ନିବାସୀ ଭାଗବତ ବିଶ୍ୱକର୍ମା । ତାଙ୍କ ପୁଅ ଶୁଭମ ବିଶ୍ୱକର୍ମାଙ୍କ ବିବାହ ଫେବୃଆରୀ ୨୪ ତାରିଖରେ ହେବାର ଥିଲା । ସେ ତାଙ୍କ ସାନପୁଅ ଶିବମ ବିଶ୍ୱକର୍ମାଙ୍କ ସହିତ ବିବାହ କାର୍ଡ ବାଣ୍ଟିବା ପାଇଁ ଏକ ବାଇକ୍ ଯୋଗେ ଘରୁ ବାହାରିଥିଲେ । ତାଙ୍କ ମହିଳା ସମ୍ପର୍କୀୟ ଘୁମା ଗ୍ରାମର ବାସିନ୍ଦା ଶୀତଲ ବିଶ୍ୱକର୍ମା ମଧ୍ୟ ସେମାନଙ୍କ ସହିତ ଯାତ୍ରା କରୁଥିଲେ । ୫୫ ବର୍ଷୀୟ ଭାଗବତ ବିଶ୍ୱକର୍ମା, ପୁଅ ଶିବମ ବିଶ୍ୱକର୍ମା ଏବଂ ସମ୍ପର୍କୀୟ ଶୀତଲ ବିଶ୍ୱକର୍ମା ସମସ୍ତେ ହାଇୱେରେ ରେୱା ଅଭିମୁଖେ ବାଇକ୍ ଯୋଗେ ଯାଉଥିଲେ, ସେତେବେଳେ ରେୱାରୁ ଆସୁଥିବା ଏକ ଦ୍ରୁତଗାମୀ ଅଡି କାର ସାମ୍ନାରୁ ବାଇକ୍‌କୁ ଧକ୍କା ଦେଇଥିଲା, ଯାହା ଫଳରେ ଘଟଣାସ୍ଥଳରେ ହିଁ ତିନି ଜଣଙ୍କର ମୃତ୍ୟୁ ଘଟିଛି ।

ଏଥିସହ ପଢନ୍ତୁ: ଆକାଶରେ ଫେଲ୍ ହୋଇଗଲା ବିମାନର ଇଞ୍ଜିନ୍, ବିଲରେ ଖସିପଡ଼ିଲା